കോഴിക്കോട് : കോഴിക്കോട് വടകരയില്‍ മൂരാട് പാലത്തിന് സമീപം ട്രാവലറും കാറും കൂട്ടിയിടിച്ച് വന്‍ അപകടം.അപകടത്തില്‍ നാല് പേര്‍ മരിച്ചു. കാര്‍ യാത്രക്കാരായ മൂന്ന് സ്ത്രീകളും ഒരു പുരുഷനുമാണ് മരിച്ചത്. ന്യൂ മാഹി സ്വദേശിനി റോജ, പുന്നോല്‍ സ്വദേശിനി ജയവല്ലി, അഴിയൂര്‍ സ്വദേശിനി രഞ്ജി, മാഹി സ്വദേശി ഷിഗിന്‍ ലാല്‍ എന്നിവരാണ് മരിച്ചത്.
ട്രാവലറിലുണ്ടായിരുന്ന എട്ട് പേര്‍ക്കും കാറിലുണ്ടായിരുന്ന ഒരാള്‍ക്കും പരിക്കുണ്ട്. ഇവരെ വടകര ആശുപത്രിയിലേക്ക് മാറ്റിയിട്ടുണ്ട്. ഞായറാഴ്ച വൈകിട്ട് ഏകദേശം 3 മണിയോടെ ആയിരുന്നു സംഭവം. മൃതദേഹങ്ങള്‍ വടകര സഹകരണ ആശുപത്രിയില്‍ സൂക്ഷിച്ചിരിക്കുകയാണ്.
ഇടിയുടെ ആഘാതത്തില്‍ കാറിന്റെ മുന്‍ഭാഗം പൂര്‍ണമായും തകര്‍ന്നു. കാര്‍ വെട്ടിപൊളിച്ചാണ് യാത്രക്കാരെ പുറത്തെടുത്തത്. കണ്ണൂര്‍ ഭാഗത്തേക്ക് പോവുകയായിരുന്ന കാറും കര്‍ണാടക രജിസ്‌ട്രേഷന്‍ ട്രാവലര്‍ വാനുമാണ് കൂട്ടിയിടിച്ചത്. പൊലീസ് സ്ഥലത്തെത്തി തുടര്‍നടപടികള്‍ സ്വീകരിച്ചു.