അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇന്ത്യൻ പൗരന്മാരുടെ സുരക്ഷ ഉറപ്പാക്കുന്നതിനും തന്ത്രപരമായ ആവശ്യങ്ങൾക്കുമായി കുറഞ്ഞത് 10 ഉപഗ്രഹങ്ങളെങ്കിലും 24 മണിക്കൂറും പ്രവർത്തിക്കുന്നുണ്ടെന്ന് ഇന്ത്യൻ ബഹിരാകാശ ഗവേഷണ സംഘടന (ഐഎസ്ആർഒ) ചെയർമാൻ വി നാരായണൻ പറഞ്ഞു.
ഇംഫാലിൽ നടന്ന സെൻട്രൽ അഗ്രികൾച്ചറൽ യൂണിവേഴ്‌സിറ്റിയുടെ (സിഎയു) അഞ്ചാമത് ബിരുദദാന ചടങ്ങിൽ പ്രസംഗിക്കവേയാണ് ഈക്കാര്യം അറിയിച്ചത്. ഏപ്രിൽ 22-ന് പഹൽഗാമിൽ 26 പേർ കൊല്ലപ്പെട്ട ഭീകരാക്രമണത്തെത്തുടർന്ന് ഇന്ത്യയും പാകിസ്ഥാനും തമ്മിലുള്ള സംഘർഷം രൂക്ഷമാകുന്നതിനിടെയാണ് നാരായണന്റെ പരാമർശം.
“നമ്മുടെ അയൽക്കാരെക്കുറിച്ച് നിങ്ങൾക്കെല്ലാവർക്കും അറിയാം. നമ്മുടെ രാജ്യത്തിന്റെ സുരക്ഷ ഉറപ്പാക്കണമെങ്കിൽ, നമ്മുടെ ഉപഗ്രഹങ്ങൾ വഴി സേവനം നൽകണം. നമ്മുടെ 7,000 കിലോമീറ്റർ കടൽത്തീര പ്രദേശങ്ങൾ നാം നിരീക്ഷിക്കണം. വടക്കൻ ഭാഗം മുഴുവൻ തുടർച്ചയായി നിരീക്ഷിക്കണം. ഉപഗ്രഹ, ഡ്രോൺ സാങ്കേതികവിദ്യ ഇല്ലാതെ നമുക്ക് അത് നേടാൻ കഴിയില്ല,” അദ്ദേഹം പറഞ്ഞു.
പഹൽഗാം ആക്രമണത്തിന് പ്രതികാരമായി, മെയ് 7 ന് ഓപ്പറേഷൻ സിന്ദൂറിന്റെ ഭാഗമായി പാകിസ്ഥാനിലെയും പാക് അധിനിവേശ കശ്മീരിലെയും ഒമ്പത് ഭീകര ക്യാമ്പുകൾ ഇന്ത്യ ആക്രമിച്ചു. ഇതോടെ, പാകിസ്ഥാൻ ഇന്ത്യയ്ക്ക് നേരെ ഡ്രോൺ, മിസൈൽ ആക്രമണങ്ങൾ നടത്തി. ഇന്ത്യ അവയെ തടഞ്ഞുനിർത്തി നിർവീര്യമാക്കി. ഒടുവിൽ കര, വ്യോമ, കടൽ വഴിയുള്ള എല്ലാ സൈനിക നടപടികളും ഉടനടി നിർത്താൻ ശനിയാഴ്ച ഇരു രാജ്യങ്ങളും സമ്മതിച്ചു.
ചന്ദ്രയാൻ-1 ദൗത്യം ചന്ദ്രന്റെ ഉപരിതലത്തിൽ ജല തന്മാത്രകളുടെ തെളിവുകൾ കണ്ടെത്തിയെന്നും, അങ്ങനെ ചെയ്യുന്ന ആദ്യ രാജ്യമായി ഇന്ത്യ മാറിയെന്നും ബഹിരാകാശത്തെ ഇന്ത്യയുടെ നേട്ടങ്ങളെക്കുറിച്ച് സംസാരിക്കവെ ഐഎസ്ആർഒ ചെയർമാൻ പറഞ്ഞു. ഇന്ത്യ ഒരു “ഊർജ്ജസ്വലമായ ബഹിരാകാശ ശക്തി”യായി മാറുകയാണെന്നും 2040 ഓടെ ആദ്യത്തെ ബഹിരാകാശ നിലയം ഉണ്ടാകുമെന്നും അദ്ദേഹം പറഞ്ഞു.
ഇന്ത്യ 34 രാജ്യങ്ങൾക്കായി 433 ഉപഗ്രഹങ്ങൾ വിക്ഷേപിച്ച് ഭ്രമണപഥത്തിൽ എത്തിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
ഇന്ത്യയുടെ അടിയന്തര പ്രതികരണശേഷി വർഷങ്ങളായി വളരെയധികം മെച്ചപ്പെട്ടിട്ടുണ്ടെന്നും വി നാരായണൻ പറഞ്ഞു. “മുമ്പ്, ദുരന്തങ്ങളിൽ ആയിരക്കണക്കിന് ആളുകൾക്ക് ജീവൻ നഷ്ടപ്പെടാറുണ്ടായിരുന്നു, എന്നാൽ ഇപ്പോൾ അത് സംഭവിക്കുന്നില്ല,” അദ്ദേഹം പറഞ്ഞു.
ഇന്ത്യയുടെ ബഹിരാകാശ സാങ്കേതികവിദ്യ ഇപ്പോൾ ടെലിമെഡിസിൻ, വിദ്യാഭ്യാസം, കാലാവസ്ഥാ പ്രവചനം, ടിവി പ്രക്ഷേപണം എന്നിവയുൾപ്പെടെ നിരവധി മേഖലകളിൽ സഹായിക്കുന്നു. കൂടാതെ ദേശീയ സുരക്ഷയ്ക്കും ദൈനംദിന സിവിലിയൻ ആവശ്യങ്ങൾക്കും ഇത് ഉപയോഗപ്രദമാണെന്ന് അദ്ദേഹം കൂട്ടിച്ചേർത്തു.
കാലാവസ്ഥ, വായു മലിനീകരണം എന്നിവ പഠിക്കുന്നതിനും കാലാവസ്ഥ നിരീക്ഷിക്കുന്നതിനുമായി ജി 20 രാജ്യങ്ങൾക്കായി ഇസ്രോ ഒരു ഉപഗ്രഹം വികസിപ്പിച്ചുകൊണ്ടിരിക്കുകയാണെന്ന് വി നാരായണൻ കൂട്ടിച്ചേർത്തു.
