തീ അണയ്ക്കാൻ യുഎഇ ഡ്രോണുകൾ അവതരിപ്പിച്ചു. ‘സുഹൈല്‍’ എന്ന് പേരിട്ടിരിക്കുന്ന ഡ്രോണ്‍ ഈ വര്‍ഷം തന്നെ യുഎഇയില്‍ പ്രവര്‍ത്തനക്ഷമമാകും.
ജപ്പാനിലെ ഒസാക്കയില്‍ നടക്കുന്ന എക്സ്‌പോ 2025-ലെ യുഎഇ പവിലിയനില്‍ അബുദാബി സിവില്‍ ഡിഫന്‍സ് അതോറിറ്റിയാണ് ലോകത്തിലെ ആദ്യ ജെറ്റ് പവേര്‍ഡ് അഗ്നിശമന ഡ്രോണ്‍ പുറത്തിറക്കിയത്.
അഗ്നിശമനരംഗത്തെ വെല്ലുവിളികളെ നേരിടാന്‍ സുഹൈലിന് നിഷ്പ്രയാസം കഴിയും. സ്മാര്‍ട്ട് സംവിധാനങ്ങള്‍ സജ്ജീകരിച്ചിരിക്കുന്ന സുഹൈല്‍ ഡ്രോണ്‍ തീപ്പിടിത്തമുണ്ടാകുമ്പോള്‍ മനുഷ്യന് എത്തിച്ചേരാന്‍ സാധിക്കാത്തയിടങ്ങളില്‍ അതിവേഗത്തിലെത്തി അഗ്നിശമന പ്രവര്‍ത്തനങ്ങളിലേര്‍പ്പെടും.
ഉയര്‍ന്ന ശക്തിയുള്ള ജലപീരങ്കിയാണ് ഇതില്‍ ഘടിപ്പിച്ചിരിക്കുന്നത്. നിര്‍മിതബുദ്ധിയുടെ പിന്തുണയോടെ ഡ്രോണ്‍ ദൗത്യം നിര്‍വഹിക്കും. ഇത് അഗ്നിശമന സേനാംഗങ്ങളുടെ അപകടസാധ്യത കുറയ്ക്കും. സാധാരണ അഗ്നിശമനപ്രവര്‍ത്തനങ്ങളെ അപേക്ഷിച്ച് വേഗവും ഫലപ്രാപ്തിയും കൂടുതലുണ്ടെന്നതാണ് ജെറ്റ് പവേര്‍ഡ് അഗ്നിശമനഡ്രോണുകളുടെ പ്രത്യേകത.
കൃത്യമായ മാപ്പിങ്, ലക്ഷ്യം കണ്ടെത്തല്‍, തടസ്സങ്ങള്‍ ഒഴിവാക്കല്‍ എന്നിവയ്ക്കായി അത്യാധുനികസംവിധാനവും ലിഡാര്‍ അടിസ്ഥാനമാക്കിയുള്ള ത്രീഡി സ്‌കാനിങ്ങും ഇതിലുണ്ടാകും.
അപകടകരമായ ഘട്ടങ്ങളില്‍ അഗ്നിരക്ഷാസംഘത്തിന്റെ പ്രവര്‍ത്തനം വൈകുകയോ പ്രശ്നങ്ങള്‍ നേരിടുകയോ ചെയ്താല്‍ ഡ്രോണ്‍ ഉടനടി പിന്തുണ നല്‍കും.
തിരക്കേറിയപ്രദേശങ്ങള്‍, വ്യാവസായികമേഖലകള്‍, ബഹുനിലക്കെട്ടിടങ്ങള്‍, ജിപിഎസ് പ്രവര്‍ത്തിക്കാത്തയിടങ്ങള്‍ എന്നിവിടങ്ങളിലെല്ലാം പുതിയ സംവിധാനം സഹായകരമാകും.