അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വീഴിഞ്ഞം തീരത്ത് നിന്ന് കടലില് പോയ ഏഴ് വളളങ്ങള് മടങ്ങിയെത്തിയില്ല. ഇന്നലെ 2.15 ന് പോയ വളളങ്ങളാണ് മടങ്ങി എത്താത്. ഇന്ന് പുലര്ച്ചെ മടങ്ങി എത്തേണ്ടിരുന്ന വളളങ്ങളില് 27 പേരുണ്ട്. വളളത്തിലുളളവരുടെ ഫോണ് സ്വിച്ച് ഓഫ് ആണെന്നും വളളത്തിന്റെ ഉടമ പറഞ്ഞു. കടലില് അതിശക്തമായ കാറ്റാണ് അടിക്കുന്നതെന്നും കടലില് നിന്ന് തിരിച്ചെത്തിയവര് പറയുന്നു. തീരസംരക്ഷണസേന തിരച്ചില് ആരംഭിച്ചിട്ടുണ്ട്.
ബോട്ട് ഉടമ പറയുന്നു….
”അതിശക്തമായ കാറ്റ് അടിച്ചുവെന്നാണ് കടലില് പോയിട്ട് തിരിച്ചെത്തിയവര് പറയുന്നത്. ഈ സമയത്ത് മത്സ്യതൊഴിലാളികള്ക്ക് വലയിടാനും സാധിച്ചില്ല. വളരെ ഭയത്തോടെ കാത്തിരുന്നാണ് മത്സ്യതൊഴിലാളികള് വലയിട്ട് തിരിച്ചെത്തിയത്”.
അതേസമയം കാണാതായവരെ കുറിച്ച് വേറെ സൂചനകള് ഒന്നും ലഭിച്ചിട്ടില്ലെന്നും കാണാതായവര്ക്കായുളള തിരച്ചില് ആരംഭിച്ചിട്ടുണ്ടെന്നും എം.വിന്സന്റെ എംഎല്എ പ്രതികരിച്ചു. നിലവില് കോസ്റ്റ് ഗാര്ഡില് നിന്നും വിവരം ലഭിച്ചിട്ടില്ല. അവര് തിരച്ചില് നടത്തുകയാണെന്നും എം.വിന്സന്റെ പറഞ്ഞു.
സംസ്ഥാനത്ത് അതിശക്തമായ മഴയാണ് തുടരുന്നത്. ഇന്ന് എട്ട് ജില്ലകളില് റെഡ് അലര്ട്ട് പ്രഖ്യാപിച്ചിരിക്കുകയാണ്. ആലപ്പുഴ, കോട്ടയം, എറണാകുളം, തൃശൂര്, പത്തനംതിട്ട, ഇടുക്കി, കണ്ണൂര്, കാസര്കോട് ജില്ലകളിലാണ് മുന്നറിയിപ്പ്. മറ്റ് ആറ് ജില്ലകളിലും ഓറഞ്ച് അലര്ട്ടുമുണ്ട്.
സംസ്ഥാനത്ത് കാലവര്ഷക്കെടുതിയില് ഇന്ന് അഞ്ച് മരണം. കാസര്കോട് മധൂരില് കാല്വഴുതി തോട്ടില്വീണ് പ്രവാസി സാദിഖ് (39) മരിച്ചു. ഇടുക്കി തോട്ടില്വീണ് പാറത്തോട് പുത്തന്പറമ്പില് ബാബു മരിച്ചു. വിഴിഞ്ഞത്ത് വള്ളംമറിഞ്ഞ് മല്സ്യത്തൊഴിലാളി ആന്റണി മരിച്ചു. എറണാകുളം തിരുമാറാടി വാളിയപ്പാടത്ത് അന്നക്കുട്ടി ചാക്കോ മരം വീണ് മരിച്ചു. ആലപ്പുഴ പുന്നപ്രയില് വെള്ളക്കെട്ടില്വീണ് കെ.ജെ.ജയിംസ് മരിച്ചു.കാലവര്ഷക്കെടുതികളില് മരണം 24 ആയി.
റെഡ് അലര്ട്ട് ഉള്ള കണ്ണൂര് ജില്ലയില് മഴക്കെടുതി രൂക്ഷം. വിവിധ ഇടങ്ങളില് വെള്ളം കയറി ഗതാഗതം തടസ്സപ്പെട്ടു. വീടുകളില് നിന്ന് ആളുകളെ മാറ്റിപ്പാര്പ്പിച്ചു. അതിനിടെ തളിപ്പറമ്പ് കുപ്പത്ത് ദേശീയപാത നിര്മാണമേഖലയില് വീണ്ടും മണ്ണിടിഞ്ഞു.
