അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നിലമ്പൂർ ഉപതെരഞ്ഞെടുപ്പിൽ എൽ.ഡി.എഫ് വൻവിജയം നേടുമെന്ന് എഴുത്തുകാരൻ അശോകൻ ചരുവിൽ. ഫേസ്ബുക്ക് പോസ്റ്റിലൂടെയായിരുന്നു അദ്ദേഹത്തിന്റെ പ്രതികരണം. കഴിഞ്ഞ ഒൻപതു വർഷമായി കേരളത്തിലെ ജനങ്ങളെ സംരക്ഷിക്കുന്ന സർക്കാരിനോടുള്ള സ്നേഹം ഈ തെരഞ്ഞെടുപ്പിൽ പ്രതിഫലിക്കുമെന്നും നിലമ്പൂരിൽ ആര്യാടൻ ഷൗക്കത്തിന് പ്രതികൂലമായ നിരവധി ഘടകങ്ങളുണ്ടെന്നും അദ്ദേഹം പറയുന്നു.
ഫേസ്ബുക്ക് പോസ്റ്റിന്റെ പൂർണരൂപം…
നിലമ്പൂർ ഉപതെരഞ്ഞെടുപ്പിൽ എൽ.ഡി.എഫ് വൻവിജയം നേടും.
എന്തു കൊണ്ട്?
1. പ്രകൃതി ദുരന്തങ്ങൾ, മഹാവ്യാധികൾ, കേന്ദ്രത്തിലെ ബി.ജെ.പി.സർക്കാർ എന്നിവയുടെ ആക്രമണത്തിൽ നിന്നും കഴിഞ്ഞ ഒൻപതു വർഷമായി കേരളത്തിലെ ജനങ്ങളെ സംരക്ഷിക്കുന്ന സർക്കാരിനോടുള്ള സ്നേഹം ഈ തെരഞ്ഞെടുപ്പിൽ പ്രതിഫലിക്കും.
2. സ്വന്തം പാർട്ടിയിലും മുന്നണിയിലും അണിനിരന്ന / അണിനിരക്കേണ്ട ജനവിഭാഗങ്ങളുടെ നൂറുശതമാനം പിന്തുണ എന്നത് തെരഞ്ഞെടുപ്പിലെ പ്രധാനഘടകമാണ്. അത് നേടാൻ പ്രാപ്തനായ ഒരു സ്ഥാനാർത്ഥിയെയാണ് എൽ.ഡി.എഫ് അവതരിപ്പിച്ചിരിക്കുന്നത്. ഒപ്പം എം.സ്വരാജിൻ്റെ പ്രതിച്ഛായയുടെ തിളക്കം നിഷ്പക്ഷ /എതിർപക്ഷ വോട്ടുകളേയും ആകർഷിക്കും.
3. എന്നാൽ സിനിമാനിർമ്മാതാവ് എന്ന നിലയിൽ കൂടി പ്രശസ്തനാണെങ്കിലും ആര്യാടൻ ഷൗക്കത്തിന് നിലമ്പൂരിൽ പ്രതികൂലമായ നിരവധി ഘടകങ്ങളുണ്ട്. ഇക്കാര്യത്തിൽ പി.വി.അൻവർ പറയുന്നത് വാസ്തവമാണ്. ഘടകകക്ഷി എന്ന നിലയിൽ ഉത്തരവാദിത്വം പുലർത്തിക്കൊണ്ട് മുസ്ലിംലീഗ് നേതൃത്വം ഷൗക്കത്തിൻ്റെ ഒപ്പം നിന്നേക്കാം. പക്ഷേ ലീഗ് അണികൾ മുഴുവൻ അദ്ദേഹത്തിന് വോട്ടു ചെയ്യുമെന്ന് കരുതാനാവില്ല.
4. ഇന്നത്തെ നിലക്ക് പി.വി.അൻവറിന് മണ്ഡലത്തിൽ എന്തെങ്കിലും സ്വാധീനം അവശേഷിക്കുന്നുണ്ടോ എന്നു നിശ്ചയമില്ല. അദ്ദേഹത്തിൻ്റെ മഖ്യശത്രു എൽ.ഡി.എഫ്. തന്നെ ആയിരിക്കും. തെരഞ്ഞെടുപ്പ് പ്രചരണം സജീവമാകുന്നതോടെ അദ്ദേഹം യു.ഡി.എഫ് വേദികളിൽ പ്രത്യക്ഷപ്പെടും. പക്ഷേ ആര്യാടൻ ഷൗക്കത്ത് വിജയിക്കാതിരിക്കേണ്ടത് പി.വി.അൻവറിൻ്റെ നിലനിൽപ്പിൻ്റെ ആവശ്യമാണ്.
അശോകൻ ചരുവിൽ
31 05 2025
content highlight: Ashokan Charuvil FB post
