അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പൊന്‍മുടി റോഡിലെ തൊളിക്കോട് ജംഗ് ക്ഷനില്‍ നിര്‍മ്മാണത്തിലെ അപാകത കാരണം വെള്ളക്കെട്ടുണ്ടാവുന്നു എന്ന പരാതിയില്‍ കെ.എസ്.റ്റി.പി. ഉദ്യോഗസ്ഥര്‍ സ്ഥലം പരിശോധിക്കണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സന്‍ ജസ്റ്റിസ് അലക്‌സാണ്ടര്‍ തോമസ് ഉത്തരവിട്ടു. അസിസ്റ്റന്റ് എക്‌സിക്യൂട്ടീവ് എഞ്ചിനീയറുടെ റാങ്കില്‍ കുറയാത്ത ഒരുദ്യോഗസ്ഥനെ സ്ഥലപരിശോധനക്കായി ചുമതലപ്പെടുത്തണമെന്ന് കൊട്ടാരക്കര ഡിവിഷന്‍ എക്‌സിക്യൂട്ടീവ് എഞ്ചിനീയര്‍ക്ക് കമ്മീഷന്‍ നിര്‍ദ്ദേശം നല്‍കി.
സ്ഥലപരിശോധനക്ക് മുമ്പ് തൊളിക്കോട് ഗ്രാമപഞ്ചായത്ത് അസിസ്റ്റന്റ് എഞ്ചിനീയര്‍ക്കും പരാതിക്കാരനും നോട്ടീസ് നല്‍കണം. കെ.എസ്.റ്റി.പി അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ പരാതി വിശദമായി പരിശോധിച്ച് പരിഹാരമാര്‍ഗങ്ങള്‍ ഉള്‍ക്കൊള്ളിച്ച് ഒരു മാസത്തിനുള്ളില്‍ റിപ്പോര്‍ട്ട് സമര്‍പ്പിക്കണമെന്നും കമ്മീഷന്‍ ആവശ്യപ്പെട്ടു. തൊളിക്കോട്പഞ്ചായത്ത് അസിസ്റ്റന്റ് എഞ്ചിനീയര്‍ പ്രത്യേകം റിപ്പോര്‍ട്ട് സമര്‍പ്പിക്കണം. ജൂലൈ 3ന് കമ്മീഷന്‍ ഓഫീസില്‍ നടക്കുന്ന സിറ്റിംഗില്‍ കേസ് പരിഗണിക്കും.
കേരള സംസ്ഥാന ഗതാഗതപദ്ധതി എക്‌സിക്യൂട്ടീവ് എഞ്ചിനീയര്‍ സമര്‍പ്പിച്ച റിപ്പോര്‍ട്ടില്‍ പൊന്‍മുടി റോഡിന്റെ പഴകുറ്റി മുതല്‍ പൊന്‍മുടി വരെയുള്ള ഭാഗം പുനരുദ്ധാരണം നടത്തി വരികയാണെന്നും വെള്ളപ്പൊക്കത്തെ അതിജീവിക്കാനുള്ള സാങ്കേതിക വിദ്യയാണ് ഇതിനുവേണ്ടി ചെയ്യുന്നതെന്നും പറയുന്നു. 20 വര്‍ഷം മുന്നില്‍കണ്ടാണ് പുനരുദ്ധാരണം നടത്തുന്നതെന്ന് റിപ്പോര്‍ട്ടില്‍ പറയുന്നു. പരാതിക്കാരന്‍ അനുഭവിക്കുന്നത് താത്ക്കാലിക പ്രശ്‌നം മാത്രമാണെന്നും റിപ്പോര്‍ട്ടില്‍ പറയുന്നു.
എന്നാല്‍ ചുള്ളിമാനൂര്‍ മുതല്‍ ഇരുക്കലമൂല വരെ റോഡിന്റെ ഇരുവശവും താമസിക്കുന്നവര്‍ ബുദ്ധിമുട്ട് അനുഭവിക്കുകയാണെന്ന് പരാതിക്കാരന്‍ പറഞ്ഞു. പി. എം. ഇസ്മായില്‍ സമര്‍പ്പിച്ച പരാതിയിലാണ് നടപടി.
CONTENT HIGH LIGHTS;Waterlogging at Tholikode Junction: Human Rights Commission asks KSTP officials to investigate
