ഇന്ത്യയിൽ ക്രിപ്റ്റോ കറൻസിയുടെ നിയന്ത്രണവുമായി ബന്ധപ്പെട്ട് ഡിസ്കഷൻ പേപ്പർ അവതരിപ്പിക്കും. ക്രിപ്റ്റോ ആസ്തികളുമായി ബന്ധപ്പെട്ട നയരൂപീകരണത്തിലെ പ്രധാന ചുവടു വെയ്പായി ഇത് മാറും. ലോകമെങ്ങും ഡിജിറ്റൽ കറൻസികൾക്ക് സ്വീകര്യത വർധിക്കുന്ന സാഹചര്യത്തിലാണ് ഇന്ത്യ ചട്ടങ്ങൾ രൂപീകരിക്കുന്നത്.
യു.എസ് പ്രസിഡന്റ് ഡൊണാൾഡ് ട്രംപ് നൽകുന്ന പിന്തുണ ഈ വർഷം ക്രിപ്റ്റോ കറൻസികൾക്ക് ഊർജ്ജം പകർന്നിരുന്നു. യു.എസിൽ ഡിജിറ്റൽ ആസ്തികളുമായി ബന്ധപ്പെട്ട കരട് തയ്യാറായി വരികയുമാണ്. ഭാരതി എയർടെൽ ഗ്രൂപ്പ് ചെയർമാൻ സുനിൽ മിത്തൽ കഴിഞ്ഞ ദിവസം ക്രിപ്റ്റോയ്ക്ക് അനുകൂലമായി പ്രസ്താവന നടത്തിയത് ചർച്ചയായിരുന്നു.
ഇന്റർനാഷണൽ മോണിറ്ററി ഫണ്ട് (IMF), ഫിനാൻഷ്യൽ സ്റ്റെബിലിറ്റി ബോർഡ് (FSB) എന്നിവയുടെ ചട്ടങ്ങൾ പിന്തുടർന്നാണ് ഇന്ത്യയിലും നയ രൂപീകരണം സാധ്യമാകുന്നത്. വിവിധ രാജ്യങ്ങൾ എങ്ങനെയാണ് ക്രിപ്റ്റോ റെഗുലേഷൻ നടപ്പാക്കുന്നത് എന്നതും പ്രാധാന്യത്തോടെ പരിഗണിക്കുന്നു. കഴിഞ്ഞ വർഷം ഇന്ത്യയിൽ നടന്ന ജി-20 ഉച്ചകോടിയിലും ലോകരാജ്യങ്ങളുടെ സഹകരണത്തോടെ ക്രിപ്റ്റോ റെഗുലേഷൻസ് കൊണ്ടുവരാൻ ഇന്ത്യ മുൻകയ്യെടുത്തിരുന്നു.
നിലവിൽ തയ്യാറായി വരുന്ന ഇന്ത്യയുടെ ഡിസ്കഷൻ പേപ്പർ അതിന്റെ അവസാന ഘട്ട മിനുക്കു പണികളിലാണെന്ന് ഔദ്യോഗിക വക്താവ് പറഞ്ഞു. പൊതുജനങ്ങളുടെ അഭിപ്രായം ആരായുന്നതിനായി അടുത്ത മാസം തുടക്കത്തിൽ പേപ്പർ റിലീസ് ചെയ്യും.
ദക്ഷിണേഷ്യയിലെ ക്രിപ്റ്റോ കറൻസി ഹബ്ബ് ആയി മാറാൻ പാകിസ്ഥാൻ സമീപ കാലത്തായി ശ്രമങ്ങൾ നടത്തി വരികയാണ്. യു.എസ് പ്രസിഡന്റായി ഡൊണാൾഡ് ട്രംപ് അധികാരമേറ്റതോടെ ക്രിപ്റ്റോ വിപണികൾ ഉയരാൻ തുടങ്ങിയിരുന്നു. ദുബായിൽ അടക്കം ഗ്ലോബൽ ക്രിപ്റ്റോ ഇവന്റുകളും സംഘടിപ്പിക്കപ്പെടുന്നു.
എന്നാൽ ഈ സാഹചര്യങ്ങളിലെല്ലാം ക്രിപ്റ്റോ വിപണിയുമായി ബന്ധപ്പെട്ട് ഇന്ത്യ കരുതലോടെയാണ് നീങ്ങിയത്. ഇന്ത്യയിൽ പ്രവർത്തിക്കുന്ന ക്രിപ്റ്റോ എക്സ്ചേഞ്ചുകൾ ഫിനാൻഷ്യൽ ഇന്റലിജൻസ് യൂണിറ്റിൽ രജിസ്റ്റർ ചെയ്യണമെന്ന വ്യവസ്ഥ കർശനമാണ്.
ക്രിപ്റ്റോ കറൻസിക്കെതിരെ നേരത്തേ റിസർവ് ബാങ്ക് രംഗത്തെത്തിയിരുന്നു. കള്ളപ്പണം വെളുപ്പിക്കൽ, ഭീകരവാദത്തിനുള്ള ഫണ്ടിങ് തുടങ്ങിയ നിയമവിരുദ്ധ പ്രവർത്തനങ്ങൾക്കായി ക്രിപ്റ്റോ കറൻസികൾ ഉപയോഗപ്പെടുത്തുമെന്ന ആശങ്കയാണ് കേന്ദ്ര ബാങ്ക് പങ്കുവെച്ചത്. ക്രിപ്റ്റോയ്ക്ക് പകരം സുരക്ഷിതമായ ഡിജിറ്റൽ കറൻസി ഓപ്ഷൻ എന്ന നിലയിൽ സെൻട്രൽ ബാങ്ക് ഡിജിറ്റൽ കറൻസി (Central Bank Digital Currency CBDC) പുറത്തിറക്കുമെന്നും ആർ.ബി.ഐ അറിയിച്ചിരുന്നു