അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കൊച്ചി: രാജ്യത്തെ ഏറ്റവും വലിയ പൊതുമേഖലാ ഇൻഷുറൻസ് സ്ഥാപനമായ ലൈഫ് ഇൻഷുറൻസ് കോർപറേഷൻ ഓഫ് ഇന്ത്യയുടെ (എൽഐസി) പുതിയ മാനേജിങ് ഡയറക്ടർമാരായി രത്‌നാകർ പ്ടനായിക്, ദിനേഷ് പന്ത് എന്നിവർ ചുമതലയേറ്റു. ജൂൺ 1 മുതലാണ് നിയമനം.
1990 മാർച്ചിൽ എൽഐസിയിൽ ഡയറക്റ്റ് റിക്രൂട്ട് ഓഫീസറായി കരിയർ ആരംഭിച്ച രത്‌നാകർ പ്ടനായിക് കമ്പനിയുടെ നിക്ഷേപ വിഭാഗം എക്സിക്യുട്ടീവ് ഡയറക്ടറായും ചീഫ് ഇൻവസ്റ്റ്മെന്റ് ഓഫീസറായും സേവനമനുഷ്ഠിച്ചിട്ടുണ്ട്. ഇൻഡോർ, ജംഷഡ്പൂർ എന്നിവിടങ്ങളിൽ സീനിയർ ഡിവിഷണൽ മാനേജരായും രാജ്യത്തിന്റെ കിഴക്കൻ മേഖലയിൽ കമ്പനിയുടെ റീജണൽ മാനേജരായും പ്രവർത്തിച്ചിട്ടുണ്ട്. എൽഐസിയിൽ 35 വർഷത്തെ പ്രവൃത്തിപരിചയമുള്ള രത്‌നാകർ പ്ടനായിക്, ഫിസിക്സിൽ ബിരുദവും പബ്ലിക് അഡ്മിനിസ്ട്രേഷനിൽ ബിരുദാനന്തര ബിരുദവും പൂർത്തീകരിച്ചിട്ടുണ്ട്. ഇൻഷുറൻസ് ഇൻസ്റ്റിറ്റ്യൂട്ട് ഓഫ് ഇന്ത്യയുടെ ഫെല്ലോ മെമ്പർ കൂടിയാണ് രത്‌നാകർ പ്ടനായിക്.
2022ൽ എൽഐസിയുടെ മെഗാ പ്രാരംഭ ഓഹരി വിൽപന (ഐപിഒ) വൻ വിജയമാക്കിയതിൽ നിർണായക പങ്കുവഹിച്ച ആളാണ് ദിനേഷ് പന്ത്. 1989ൽ ഡയറക്റ്റ് റിക്രൂട്ട് ഓഫീസറായാണ് ആരംഭം. തുടർന്ന് കമ്പനിയുടെ നിർണായ ചുമതലകൾ വഹിച്ചു. നിലവിൽ എൽഐസിയുടെ ആക്ച്വറി ആൻഡ് എക്സിക്യുട്ടീവ് ഡയറക്ടറായി പ്രവർത്തിക്കുന്ന ദിനേഷ് പന്ത്, 2017 മുതൽ കമ്പനിയുടെ ബോർഡിൽ പ്രത്യേക ക്ഷണിതാവാണ്‌. എൽഐസിയുടെ ഇൻവസ്റ്റ്മെന്റ് കമ്മിറ്റി, റിസ്ക് കമ്മിറ്റി, വിത്ത്- പ്രൊഫിറ്റ് കമ്മിറ്റി എന്നിവയിൽ അംഗമാണ്. കെനിയ ആസ്ഥാനമായി പ്രവർത്തിക്കുന്ന കെൻഇന്ത്യ അഷുറൻസ് കമ്പനിയുടെ ജനറൽ മാനേജരായി (ലൈഫ്) സേവനമനുഷ്ഠിച്ചിട്ടുണ്ട്.
കമ്പനിയുടെ പ്രവർത്തന മേഖല, ഉൽപന്ന വൈവിധ്യം, മൂല്യനിർണയം, റിസ്ക് മാനേജ്‌മന്റ് തുടങ്ങിയവയിൽ മാനേജ്മെന്റിന്റെ പ്രധാന ഉപദേശകൻ കൂടിയാണ് ദിനേഷ് പന്ത്. നിയമത്തിൽ വിദ്യാഭ്യാസം പൂർത്തിയാക്കിയ ദിനേഷ് പന്ത്, നാഷണൽ ഇൻഷുറൻസ് അക്കാദമി ഉൾപ്പടെ രാജ്യത്തെ വിവിധ വിദ്യാഭ്യാസ സ്ഥാപനങ്ങളുടെ വിസിറ്റിംഗ് ഫാക്കൽറ്റി മെമ്പർ കൂടിയാണ്.
