അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ന്യൂഡല്ഹി : പാർലമെന്റിലെ ഗുരുതരമായ സുരക്ഷാവീഴ്ചയിൽ മറുപടിയില്ലാതെ കേന്ദ്രസർക്കാരും ബി.ജെ.പി.യും. പാർലമെന്റിനകത്തും പുറത്തും പ്രതിപക്ഷ പ്രതിഷേധം ആഞ്ഞടിക്കുന്നു. മൂന്നുദിവസം പിന്നിട്ടിട്ടും പ്രധാനമന്ത്രിയോ ആഭ്യന്തരമന്ത്രിയോ സഭയിലെത്തിയില്ല. അതേസമയം, സർക്കാരിന്റെ വിശദീകരണം ആവശ്യപ്പെട്ട് പ്രതിഷേധിച്ച അംഗങ്ങളെ സസ്പെൻഡ് ചെയ്തതും ആഭ്യന്തരമന്ത്രി പാർലമെന്റിൽ മിണ്ടാതെ പുറത്ത് വിഷയത്തിൽ പ്രതികരിച്ചതും പ്രതിപക്ഷത്തിന് രാഷ്ട്രീയ ആയുധങ്ങളായി.
സംഭവത്തിൽ വീഴ്ചപറ്റിയെന്ന് ഒരു സ്വകാര്യ ടി.വി. ചാനലിൽ അമിത് ഷാ തുറന്നുപറഞ്ഞത് സർക്കാർ പ്രതിരോധത്തിലാണെന്നതിന്റെ സൂചനയാണെന്ന് പ്രതിപക്ഷ നേതാക്കൾ ചൂണ്ടിക്കാട്ടുന്നു. പ്രതിഷേധക്കാർ ഉയർത്തിയ മുദ്രാവാക്യങ്ങൾ കേന്ദ്രനയങ്ങൾക്കെതിരാണെന്ന വ്യാഖ്യാനവും സർക്കാരിന് തലവേദനയാണ്. സഭയുടെ സുരക്ഷാച്ചുമതല തനിക്കാണെന്ന് സ്പീക്കറും പണ്ടും സമാനസംഭവങ്ങളുണ്ടായിട്ടുണ്ടെന്ന് പാർലമെന്ററികാര്യമന്ത്രി പ്രഹ്ലാദ് ജോഷിയും പാസുകൾ നൽകുന്നതിൽ എം.പി.മാർ ജാഗ്രതപാലിക്കണമെന്ന് പ്രതിരോധമന്ത്രി രാജ്നാഥ് സിങ്ങും പറഞ്ഞതൊഴിച്ചാൽ, മറ്റു വിശദീകരണങ്ങളൊന്നും വെള്ളിയാഴ്ചവരെ സർക്കാർ നൽകിയിട്ടില്ല.
സഭാസമ്മേളനം നടക്കുമ്പോൾ പാർലമെന്റിൽ പ്രതികരിക്കാതെ ആഭ്യന്തരമന്ത്രി പുറത്ത് വിഷയം പറഞ്ഞത് ശരിയായില്ലെന്ന് പ്രതിപക്ഷം ചൂണ്ടിക്കാട്ടുന്നു. എന്നാൽ, വിശദമായ അന്വേഷണം നടത്തി വസ്തുതകൾ ശേഖരിച്ചശേഷം മാത്രമേ കേന്ദ്രസർക്കാരിന് വിശദീകരണം നൽകാൻ കഴിയൂ എന്നാണ് ബി.ജെ.പി. കേന്ദ്രങ്ങളുടെ നിലപാട്.
മൂന്ന് നിയമസഭാ തിരഞ്ഞെടുപ്പുകളിലെ വിജയത്തിളക്കത്തിനിടയിലുണ്ടായ സംഭവം ബി.ജെ.പി.ക്കും രാഷ്ട്രീയക്ഷീണമുണ്ടാക്കിയിട്ടുണ്ട്. ജയിച്ച സംസ്ഥാനങ്ങളിലെ സർക്കാർ രൂപവത്കരണം, സത്യപ്രതിജ്ഞ തുടങ്ങിയ നടപടികൾ ഇതിനിടയിൽ മങ്ങിപ്പോയതായും വിലയിരുത്തലുണ്ട്. അതേസമയം, നിയമസഭാ തിരഞ്ഞെടുപ്പ് തോൽവി നൽകിയ ആഘാതത്തിൽ ക്ഷീണിച്ച കോൺഗ്രസിനും ഇന്ത്യാ സഖ്യത്തിനും സംഭവം കളഞ്ഞുകിട്ടിയ വടിയായി. ഈ മാസം 19-ന് ചേരുന്ന ഇന്ത്യാ സഖ്യം യോഗത്തിൽ വിഷയം ചർച്ചചെയ്യുമെന്നാണ് സൂചന.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
