അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ദോഹ: ചാമ്പ്യന്മാർക്കൊത്ത പകിട്ടുമായി ആതിഥേയരായ ഖത്തർ ഏഷ്യൻ കപ്പിൽ വിജയക്കുതിപ്പ് തുടരുന്നു. തിങ്കളാഴ്ച ഖലീഫ സ്റ്റേഡിയത്തിൽ നിറഞ്ഞ സ്വന്തം നാട്ടുകാർക്ക് മുന്നിൽ കരുത്തരായ ചൈനയെ നായകൻ ഹസൻ അൽ ഹൈദോസിന്റെ തകർപ്പൻ ഗോളിന്റെ കരുത്തിൽ 1-0ത്തിന് വീഴ്ത്തി ഖത്തറിന്റെ ജൈത്രയാത്ര. കളിച്ച മൂന്നിലും ജയിച്ച് ഒമ്പത് പോയന്റും സ്വന്തമാക്കിയാണ് ആതിഥേയർ അടുത്ത അങ്കത്തിനൊരുങ്ങുന്നത്.
Read also: സൗദി ഏഷ്യൻ കപ്പ് പ്രീക്വാർട്ടറിൽ
ആവേശപ്പോരാട്ടത്തിൽ കളിയുടെ 66ാം മിനിറ്റിലായിരുന്നു ഹസൻ അൽ ഹൈദോസ് വിജയ ഗോൾ കുറിച്ചത്. ജയിച്ചാൽ മാത്രം പ്രീക്വാർട്ടർ എന്ന നിലയിൽ പോരാടിയ ചൈന, ആദ്യ പകുതിയിൽ ഇരു വിങ്ങുകളിലൂടെയുമായി നീങ്ങി മികച്ച അവസരങ്ങൾ സൃഷ്ടിച്ചെങ്കിലും അൽമഹ്ദി അലിയും ബൗലം ഖൗഖിയും നിയന്ത്രിച്ച പ്രതിരോധ കോട്ട പിളർത്താനായില്ല. കഴിഞ്ഞ രണ്ടു മത്സരങ്ങളിലും കളിച്ചവരെ പുറത്തിരുത്തി യുവതാരങ്ങൾക്ക് അവസരം നൽകിയാണ് കോച്ച് മാർക്വേസ് ലോപസ് െപ്ലയിങ് ഇലവൻ ഒരുക്കിയത്.
എന്നാൽ, രണ്ടാം പകുതിയിൽ ആറ് മാറ്റങ്ങളും ഉപയോഗിച്ച് കോച്ച് ടീമിനെ പുതുക്കിപ്പണിതു. അതിന്റെ ഫലമായി 66ാം മിനിറ്റിൽ ഗോളും പിറന്നു. അക്രം അഫിഫ് നൽകിയ കോർണർ കിക്കിനെ ഫുൾ വോളിയിലൂടെ വലയിലേക്ക് പായിച്ചാണ് ഹൈദോസ് വിജയം കുറിച്ചത്.
ഖലീഫ സ്റ്റേഡിയത്തിൽ ചൈന തോറ്റപ്പോൾ, അതേസമയം ജാസിം ബിൻ ഹമദ് സ്റ്റേഡിയത്തിൽ ലബനാനെ ഇഞ്ചുറി ടൈം ഗോളിൽ വീഴ്ത്തിയ തജികിസ്താൻ വിലപ്പെട്ട മൂന്ന് പോയന്റുമായി ഗ്രൂപ്പിൽ നിന്നും രണ്ടാം സ്ഥാനക്കാരായി പ്രീക്വാർട്ടറിൽ ഇടം നേടി. കളിയുടെ 47ാം മിനിറ്റിൽ ലബനാനാണ് ഗോൾ നേടിയത്. എന്നാൽ, അവസാന 12 മിനിറ്റിനുള്ളിൽ രണ്ട് ഗോളുമായി തജികിസ്താൻ കളി കൈയിലെടുത്തു.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
