അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.നടനും ബിജെപി നേതാവുമായ കൃഷ്ണകുമാറിന്റെ മകള്‍ ദിയ കൃഷ്ണയുടെ ‘ഓ ബൈ ഓസി’ എന്ന സ്ഥാപനത്തിലെ ജീവനക്കാര്‍ക്കെതിരായ സാമ്പത്തിക തട്ടിപ്പ് പരാതിയില്‍ കൂടുതല്‍ വിശദീകരണവുമായി കൃഷ്ണകുമാറിന്റെ ഭാര്യ സിന്ധു കൃഷ്ണ രംഗത്ത്. ദിയയുടെ ഓഫീസിലെ ജീവനക്കാരെപ്പറ്റിയും അവര്‍ കസ്റ്റമേഴ്‌സിനോട് ഇടപെടുന്നതിനെപ്പറ്റിയും തനിക്ക് അത്ര മതിപ്പില്ലായിരുന്നു എന്നും പക്ഷേ മക്കളുടെ സാമ്പത്തിക കാര്യങ്ങളിലും ബിസിനസ് കാര്യങ്ങളിലും അധികം ഇടപെടാത്തവരാണ് തങ്ങളെന്നും സിന്ധു കൃഷ്ണ പറയുന്നു. ഒരു യൂട്യൂബ് ചാനലിനു നല്‍കിയ അഭിമുഖത്തില്‍ ആയിരുന്നു സിന്ധു കൃഷ്ണയുടെ പ്രതികരണം.
സിന്ധു കൃഷ്ണയുടെ വാക്കുകള്‍…
”ഞങ്ങള്‍ കുട്ടികളുടെ സാമ്പത്തിക കാര്യങ്ങളില്‍ അധികം ഇടപെടാറില്ല. ദിയയുടെ ബിസിനസിലും ഞങ്ങളാരും ഇടപെടാറില്ലായിരുന്നു. അവര്‍ക്കൊരു സഹായം വേണമെങ്കില്‍ ചെയ്യും. അല്ലാതെ ഞങ്ങളായി ഇടിച്ച് കയറി ഒന്നും ചെയ്യാറില്ല. പക്ഷേ ദിയയുടെ ജിഎസ്ടി അടയ്ക്കുന്നതുമായി ബന്ധപ്പെട്ട കാര്യങ്ങളെല്ലാം ഞാനാണ് നോക്കുന്നത്. അതെല്ലാം കൃത്യമായി ചെയ്യുന്നുണ്ട്. അഡ്വാന്‍സ് ടാക്‌സ് വരെ അടച്ച് പോകുന്നതാണ്. പക്ഷേ ബിസിനസില്‍ നിന്നും എത്ര വരുമാനം കിട്ടുന്നു, എത്ര വിറ്റ് പോകുന്നു എന്നൊന്നും നോക്കാറില്ല. ഇന്‍കം ടാക്‌സ് ഡിപാര്‍ട്‌മെന്റിലേക്ക് വിവരങ്ങള്‍ പോകുമ്പോള്‍ സ്വാഭാവികമായും ഞാന്‍ കാണാറുണ്ട്. പേയ്‌മെന്റ് ഇത്ര അല്ലല്ലോ കുറച്ച് കൂടെ വരേണ്ടതല്ലേ എന്നൊക്കെ ഞാന്‍ ആലോചിക്കാറുണ്ടായിരുന്നു. ഇടയ്ക്ക് അക്കാര്യം ചോദിച്ചിട്ടുമുണ്ട്. ഒരു പരിധി കഴിയുമ്പോള്‍ നമ്മള്‍ അധികം ചോദിക്കില്ല. എന്തിനാണ് അവരുടെ പ്രൈവസിയില്‍ കയറി ഇടപെടുന്നത്, അവര്‍ക്കെത്ര ലാഭം കിട്ടുന്നെന്ന് എന്തിന് അറിയണം എന്ന ചിന്തയില്‍ വിട്ട് കളയും. ഈ സംഭവമറിഞ്ഞപ്പോള്‍ തന്നെ ഞങ്ങള്‍ക്ക് ബ്രേക്കിംഗ് ന്യൂസ് ആക്കാമായിരുന്നു. ഞങ്ങളുടെ കയ്യിലുള്ള ദൃശ്യങ്ങള്‍ വെച്ച് വീഡിയോ ഇടാമായിരുന്നു. പക്ഷെ അതൊന്നും ചെയ്തില്ല. അവര്‍ ഞങ്ങള്‍ക്കെതിരെ കേസുമായി നീങ്ങിയപ്പോളാണ് അതെല്ലാം പബ്ലിക് ആക്കിയത്”.
അതേസമയം കേസില്‍ ദിയയുടെയും ദിയയുടെ സ്ഥാപനത്തിലെ ജീവനക്കാരികളുടെയും അക്കൗണ്ട് വിവരങ്ങള്‍ പോലീസ് ശേഖരിച്ചു. രണ്ടും പൊലീസ് പരിശോധിക്കുകയാണ്. തട്ടിക്കൊണ്ടു പോയെന്ന ജീവനക്കാരികളുടെ പരാതിയില്‍ സിസിടിവി ദൃശ്യങ്ങളും പൊലീസ് ശേഖരിച്ചു. വിശദമായ പരിശോധനക്ക് ശേഷം മാത്രമേ പൊലീസ് മറ്റ് നടപടികളിലേക്ക് കടക്കൂകയുള്ളു. ജീവനക്കാരികള്‍ 69 ലക്ഷം തട്ടിയെടുത്തെന്ന പരാതിയും കൃഷ്ണകുമാറും ദിയയും തട്ടിക്കൊണ്ടുപോയെന്ന ജീവനക്കാരികളുടെ പരാതിയുമാണ് പൊലീസ് അന്വേഷിക്കുന്നത്. പണം തിരിമറി നടന്നുവെന്നാണ് പൊലീസിന്റെ പ്രാഥമിക വിലയിരുത്തല്‍. പക്ഷെ 69 ലക്ഷം നഷ്ടമായിട്ടുണ്ടോ എന്നതടക്കം പരിശോധിക്കണം. ദിയയുടെയും ജീവനക്കാരികളുടയും അക്കൗണ്ടുകള്‍ വഴിയുള്ള പണമിടപാട് വിശദമായി പരിശോധിച്ചാല്‍ മാത്രമേ ഇതില്‍ വ്യക്തതയുണ്ടാകൂ.
