അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മോഹന്‍ലാല്‍-സത്യന്‍ അന്തിക്കാട് കൂട്ടുകെട്ട് വീണ്ടും ഒന്നിക്കുന്ന ചിത്രമാണ് ഹൃദയപൂര്‍വ്വം. വലിയ പ്രതീക്ഷയോടെയാണ് പ്രേക്ഷകര്‍ ഈ സിനിമയെ കാത്തിരിക്കുന്നത്. ഇപ്പോഴിതാ സിനിമയെക്കുറിച്ച് മനസ് തുറന്നിരിക്കുകയാണ് സംവിധായകന്‍ സത്യന്‍ അന്തിക്കാട്. ക്യു സ്റ്റുഡിയോക്ക് നല്‍കിയ അഭിമുഖത്തില്‍ ആയിരുന്നു സത്യന്‍ അന്തിക്കാടിന്റെ വെളിപ്പെടുത്തല്‍.
‘ഹൃദയപൂര്‍വ്വം വളരെ ഇന്ററസ്റ്റിങ്ങ് ആയിട്ടുള്ളൊരു സിനിമയായി മാറിയിട്ടുണ്ടെന്നാണ് എനിക്ക് തോന്നുന്നത്. ചിത്രത്തിന്റെ എഡിറ്റിങ് കഴിഞ്ഞു, ഇപ്പോള്‍ നമ്മള്‍ ബാക്ക്ഗ്രൗണ്ട് സ്‌കോര്‍ ചെയ്യാനിരിക്കുകയാണ്. ‘പാച്ചുവും അത്ഭുതവിളക്കും’ ഒക്കെ ചെയ്ത ജസ്റ്റിന്‍ പ്രഭാകരനാണ് സംഗീതസംവിധാനം. ഓണത്തിന് ഒരാഴ്ച മുന്‍പാകും തിയറ്ററുകളില്‍ എത്തുന്നുണ്ടാവുക, അതുകൊണ്ട് കുടുംബപ്രേക്ഷകര്‍ക്ക് രസം തോന്നാവുന്ന, ഒരുമിച്ചിരുന്ന് ആസ്വദിക്കാവുന്ന ഒരു സിനിമ തന്നെയാണ്’.കുറച്ച് കാലമായി നമ്മള്‍ കാണാത്ത ലാലിന്റെ മുഖവും, മുഖഭാവങ്ങളും ഈ സിനിമയില്‍ കാണാന്‍ പറ്റുമെന്നാണ് വിചാരിക്കുന്നത്. ഒരു പ്ലെസന്റ് ആയിട്ടുള്ള സിനിമയാണ് ഹൃദയപൂര്‍വ്വമെന്നും-സത്യന്‍ അന്തിക്കാട് പറഞ്ഞു.
സിനിമയുടെ ഫസ്റ്റ് ലുക്ക് നേരത്തെ പുറത്തുവന്നിരുന്നു. നടന്‍ മോഹന്‍ലാലിന്റെ സ്വന്തം കൈപ്പടയിലാണ് ഹൃദയപൂര്‍വ്വം എന്ന ടൈറ്റില്‍ ഡിസൈന്‍ ചെയ്തിരിക്കുന്നത്. ആഗസ്റ്റ് 28 ന് ഹൃദയപൂര്‍വ്വം തിയേറ്ററിലെത്തും. സത്യന്‍ അന്തിക്കാടും മോഹന്‍ലാലും ഒന്നിക്കുന്ന ഇരുപതാമത്തെ ചിത്രമാണ് ഹൃദയപൂര്‍വ്വം. ആശിര്‍വാദ് സിനിമാസും സത്യന്‍ അന്തിക്കാടും ഒന്നിക്കുന്ന അഞ്ചാമത്തെ ചിത്രം കൂടിയാണിത്. 2015-ല്‍ പുറത്തിറങ്ങിയ ‘എന്നും എപ്പോഴും’ എന്ന ചിത്രത്തിലായിരുന്നു മോഹന്‍ലാല്‍-സത്യന്‍ അന്തിക്കാട് കൂട്ടുകെട്ട് ഒടുവില്‍ ഒന്നിച്ചത്.
സത്യന്‍ അന്തിക്കാടിന്റെ മക്കളായ അഖില്‍ സത്യനും അനൂപ് സത്യനും അദ്ദേഹത്തിനൊപ്പം പ്രവര്‍ത്തിക്കുന്നു എന്ന പ്രത്യേകതയും ഹൃദയപൂര്‍വ്വത്തിനുണ്ട്. ചിത്രത്തിന്റെ കഥ ഒരുക്കിയിരിക്കുന്നത് അഖില്‍ സത്യനാണ്. അനൂപ് സത്യന്‍ സിനിമയില്‍ അസോസിയേറ്റ് ആയി പ്രവര്‍ത്തിക്കുന്നു.
