മോഹിത് സൂരി സംവിധാനം ചെയ്ത് അഹാന് പാണ്ഡെ, അനീറ്റ് പദ്ദ എന്നിവര് കേന്ദ്രകഥാപാത്രങ്ങളായി എത്തിയ ചിത്രമാണ്’സൈയാരാ’. ഇപ്പോഴിതാ ചിത്രം ഗംഭീര പ്രതികരണവുമായി ബോക്സ് ഓഫീസില് റെക്കോര്ഡുകള് തകര്ക്കുകയാണ്. ഈ വര്ഷം പുറത്തുവന്ന ആമിര് ഖാന്, സല്മാന് ഖാന്, അക്ഷയ് കുമാര് ചിത്രങ്ങളെയെല്ലാം സൈയാരാ ഇതിനോടകം മറികടന്നു എന്നാണ് റിപ്പോര്ട്ട്.
ആഗോള ബോക്സ് ഓഫീസില് നിന്ന് സിനിമ നേടിയത് 281.75 കോടിയാണെന്നാണ് റിപ്പോര്ട്ടുകള് പറയുന്നത്. ചിത്രം നേടിയിരിക്കുന്ന നെറ്റ് കളക്ഷന് 217.25 കോടിയാണ്. ഗ്രോസ് 228.9 കോടിയും. വിദേശ മാര്ക്കറ്റുകളില് നിന്ന് ഇതിനകം നേടിയിട്ടുള്ളത് 52.85 കോടിയുമാണ്. സല്മാന് ഖാന് ചിത്രമായ സിക്കന്ദര്, ആമിര് ചിത്രം സിത്താരെ സമീന് പര്, അക്ഷയ് കുമാര് ചിത്രങ്ങളായ കേസരി ചാപ്റ്റര് 2, ഹൗസ്ഫുള് 5 എന്നീ സിനിമകളെയാണ് കളക്ഷനില് സൈയാരാ മറികടന്നിരിക്കുന്നത്. ബോളിവുഡ് ഹങ്കാമയുടെ റിപ്പോര്ട്ട് പ്രകാരം 103.45 കോടിയാണ് സിക്കന്ദറിന്റെ കളക്ഷന്, സിത്താരെ സമീന് പര് 164.02 കോടി നേടിയാണ് തിയേറ്റര് വിട്ടത്. കേസരി 2 93.28 കോടി നേടിയപ്പോള് ഹൗസ്ഫുള് 5 160.72 കോടി നേടി.
ഇന്ത്യന് സിനിമയില് എല്ലാ ഭാഷകളും എടുത്താലും ഈ വര്ഷം 300 കോടിക്ക് മുകളില് നേടുന്ന രണ്ടാമത്തെ ചിത്രമായിരിക്കും സൈയാര. ആഷിഖി 2 , ഏക് വില്ലന് തുടങ്ങിയ സിനിമകളിലൂടെ പ്രേക്ഷക ശ്രദ്ധ നേടിയ സംവിധായകനാണ് മോഹിത് സൂരി. അദ്ദേഹത്തിന്റെ ചിത്രത്തിലെ ഗാനങ്ങള് എല്ലാം വലിയ സ്വീകാര്യത നേടുക പതിവാണ്. സൈയാരായിലെ ഗാനങ്ങളും വലിയ ശ്രദ്ധ നേടുന്നുണ്ട്. യഷ് രാജ് ഫിലിംസിന്റെ ബാനറില് ആദിത്യ ചോപ്ര ആണ് സിനിമ നിര്മിക്കുന്നത്. സങ്കല്പ് സദാനഹ്, രോഹന് ശങ്കര് എന്നിവരാണ് സിനിമയുടെ എഴുത്തുകാര്. വികാസ് ശിവരാമന് ആണ് സിനിമയുടെ ഛായാഗ്രഹണം നിര്വഹിക്കുന്നത്.