അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ആമിര്‍ ഖാന്‍ നായകനായി എത്തിയ ഏറ്റവും പുതിയ സിനിമയാണ് ‘സിത്താരെ സമീന്‍ പര്‍’. സിനിമ തിയേറ്ററില്‍ മികച്ച പ്രതികരണമാണ് നേടിയത്. സിനിമ യൂട്യൂബില്‍ റിലീസ് ചെയ്യുമെന്ന് കഴിഞ്ഞ ദിവസം ആമിര്‍ ഖാന്‍ അറിയിച്ചിരുന്നു. ഇപ്പോഴിതാ ഒടിടിയുടെ ഡീല്‍ നിരസിച്ചതിനെക്കുറിച്ച് തുറന്ന് പറയുകയാണ് ആമിര്‍ ഖാന്‍. ഒരു വലിയ കമ്പനി നല്‍കുന്ന 125 കോടി തനിക്ക് വേണ്ടെന്നും പകരം ഇന്ത്യയിലെ ഓരോ പ്രേക്ഷകന്റെയും 100 രൂപയാണ് തനിക്ക് ആവശ്യമെന്നും ആമിര്‍ മാധ്യമങ്ങളോട് പറഞ്ഞു.
ആമിറിന്റെ വാക്കുകള്‍…..
‘ഇന്ത്യയിലെ ഓരോ പ്രേക്ഷകന്റെയും 100 രൂപയാണ് എനിക്ക് വേണ്ടത് അല്ലാതെ ഒരു വലിയ കമ്പനി നല്‍കുന്ന 125 കോടി വേണ്ട. എനിക്ക് എന്റെ വര്‍ക്കിലും എന്റെ പ്രേക്ഷകരിലും വിശ്വാസമുണ്ട്. എന്റെ സിനിമകള്‍ നല്ലതാണെങ്കില്‍ പ്രേക്ഷകര്‍ അത് തിയേറ്ററിലും തുടര്‍ന്ന് യൂട്യൂബില്‍ പേ പെര്‍ വ്യൂവില്‍ വരുമ്പോഴും കാണും. എനിക്ക് മാത്രം ഗുണമുണ്ടാകുന്നത് കൊണ്ട് ഒരിക്കലും ഒരു ഇന്‍ഡസ്ട്രി മുഴുവനായും രക്ഷപ്പെടില്ല. അതുകൊണ്ടാണ് ഒടിടിയുടെ ഓഫറിന് ഞാന്‍ നോ പറഞ്ഞത്’.
ആഗസ്റ്റ് 1ന് ചിത്രം യുട്യൂബില്‍ റിലീസ് ചെയ്യും. ലോകത്തിന്റെ എല്ലാ കോണുകളിലും താങ്ങാനാവുന്ന നിരക്കില്‍ സിനിമ എത്തുന്നുവെന്ന് ഉറപ്പാക്കുകയാണ് ആമിറിന്റെ ലക്ഷ്യം. നെറ്റ്ഫ്‌ലിക്‌സ്, ആമസോണ്‍ പ്രൈം പോലുള്ള ഒ ടി ടി പ്ലാറ്റ്ഫോമുകള്‍ക്ക് പകരം, പേ-പെര്‍-വ്യൂ മോഡല്‍ പിന്തുടര്‍ന്ന് യൂട്യൂബില്‍ ചിത്രം റിലീസ് ചെയ്യാനാണ് ആമിര്‍ പദ്ധതിയിടുന്നത്.
ഒരു ബാസ്‌കറ്റ്‌ബോള്‍ കോച്ചിന്റെ വേഷത്തിലാണ് ആമിര്‍ ഖാന്‍ സിനിമയിലെത്തുന്നത്. ആര്‍ എസ് പ്രസന്നയാണ് ചിത്രം സംവിധാനം ചെയ്തിരിക്കുന്നത്. ചിത്രത്തിന്റെ തിരക്കഥ ഒരുക്കിയത് ദിവ്യ നിധി ശര്‍മ്മ ആണ്. ആമിര്‍ ഖാനും അപര്‍ണ പുരോഹിതും ചേര്‍ന്നാണ് ചിത്രം നിര്‍മിച്ചിരിക്കുന്നത്.
