അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ദേശീയ ചലച്ചിത്ര പുരസ്‌കാര പ്രഖ്യാപനത്തിന് പിറകേ ജൂറിയെ സോഷ്യല്‍ മീഡിയയില്‍ വിമര്‍ശനങ്ങള്‍ നിറയുകയാണ്. കേരളത്തെ വേണ്ട വിധത്തില്‍ പരിഗണിച്ചില്ലെന്നു മാത്രമല്ല മലയാള സിനിമയായ ആടുജീവിതത്തിന് എന്തുകൊണ്ട് പുരസ്‌കാരം നിരസിച്ചു എന്ന ചോദ്യവും സോഷ്യല്‍ മീഡിയയില്‍ ഉയര്‍ന്നു. ഇപ്പോഴിതാ ആടുജീവിതം ദേശീയ അവാര്‍ഡില്‍ പരിഗണിക്കപ്പെടാതെ പോയതിനെക്കുറിച്ച് മനസുതുറക്കുകയാണ് സംവിധായകന്‍ ബ്ലെസി. നേരത്തെ ആടുജീവിതം കണ്ടു ഇഷ്ടപ്പെടുകയും സിനിമയെ പ്രശംസിക്കുകയും ചെയ്ത അശുതോഷ് ഗോവാരിക്കര്‍ ഇപ്പോള്‍ സിനിമയെ തള്ളിപ്പറഞ്ഞത് തന്നെ അതിശയിപ്പിച്ചെന്ന് ബ്ലെസി പറഞ്ഞു.
ബ്ലെസിയുടെ വാക്കുകള്‍…….
‘നാഷണല്‍ അവാര്‍ഡ് കിട്ടാത്തതിന്റെ പരിഭവം പറയുന്നത് എന്റെ മാന്യതയ്ക്ക് ചേരുന്നതായിട്ട് എനിക്ക് തോന്നുന്നില്ല. കാരണം അത്തരം അഭിപ്രായങ്ങള്‍ പറയുന്തോറും കൂടുതല്‍ കൂടുതല്‍ ഒരു ഫിലിം മേക്കര്‍ എന്ന നിലയില്‍ ഞാന്‍ ചെറുതാകുന്നതായിട്ട് എനിക്ക് തോന്നും. ജൂറി ആണ് ആര്‍ക്ക് കൊടുക്കണം എന്ന് തീരുമാനിക്കേണ്ടത്. എനിക്ക് ആകെയുള്ള വിയോജിപ്പ് എന്നുള്ളത്, കഴിഞ്ഞ ദിവസം പ്രദീപ് നായര്‍ ഏതോ മീഡിയയില്‍ പറയുന്നത് കേട്ടു അശുതോഷ് ഗോവാരിക്കര്‍ പറഞ്ഞു ആടുജീവിതത്തിന്റെ അഡാപ്‌റ്റേഷന്‍ നന്നായില്ല അല്ലെങ്കില്‍ ടെക്‌നിക്കല്‍ ക്വാളിറ്റി നന്നായില്ല എന്നതുകൊണ്ടാണ് സഹനടനും ഗാനരചയിതാവിനും അവാര്‍ഡ് കിട്ടാതെ പോയത് എന്ന്. എന്നെ അതിശയപ്പെടുത്തിയ കാര്യം അശുതോഷ് ഗോവാരിക്കര്‍ എന്നെ നേരിട്ട് കണ്ട് ആടുജീവിതത്തിനെക്കുറിച്ച് പ്രശംസിച്ച് സംസാരിച്ചിട്ടുള്ളതാണ്’.
‘ഞാന്‍ ബോംബെയില്‍ ഓസ്‌കര്‍ കാമ്പയിനുമായി ബന്ധപ്പെട്ടു പോയപ്പോള്‍ അദ്ദേഹം എന്നെ ഫോണില്‍ വിളിച്ച് സംസാരിക്കുകയും ലോറന്‍സ് ഓഫ് അറേബ്യയ്ക്ക് ശേഷം മരുഭൂമിയെ ഇത്രയധികം മനോഹരമായിട്ട് ഷൂട്ട് ചെയ്തതിനെക്കുറിച്ച് വളരെ അഭിനന്ദിച്ച് സംസാരിക്കുകയും പിറ്റേ ദിവസത്തേക്ക് എന്നെ ലഞ്ചിന് ക്ഷണിക്കുകയും ചെയ്തിരുന്നു. പക്ഷെ അന്ന് രാത്രി തന്നെ ഞാന്‍ മടങ്ങും എന്നുള്ളത് കൊണ്ട് അതിന് പോകാന്‍ എനിക്ക് കഴിഞ്ഞിരുന്നില്ല. അങ്ങനെ സംസാരിച്ച ഒരാളില്‍ നിന്നും ഇപ്പോള്‍ വ്യത്യസ്തമായ ഒരു കമന്റ് കേള്‍ക്കുമ്പോള്‍ അത് ഒരു ജൂറി ചെയര്‍മാന്‍ ആയതിന് ശേഷം ഉണ്ടായത് ആണല്ലോ എന്ന പബ്ലിക് അറിയാത്ത കാര്യമുണ്ട്. പല കാറ്റഗറിയിലും അവാര്‍ഡ് കിട്ടാതെപോയവരോട് കാണിക്കുന്ന നീതികേടാണ് അത് എന്നുള്ളത് കൊണ്ടാണ് ഞാന്‍ ഇതില്‍ പ്രതികരിക്കുന്നത്. മന്ത്രിമാര്‍ ഉള്‍പ്പെടെയുള്ളവര്‍ അതിനെക്കുറിച്ച് സംസാരിക്കുന്നു എന്നതൊക്കെ നല്ല കാര്യങ്ങളാണ്’.
