അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സിനിമാ നിര്‍മ്മാതാക്കളുടെ സംഘടനയിലെ തിരഞ്ഞെടുപ്പ് നടക്കാനിരിക്കെ ഫേസ്ബുക്കില്‍ പരസ്പരം ഏറ്റുമുട്ടി വിജയ് ബാബുവും സാന്ദ്ര തോമസും. അസോസിയേഷന്‍ തിരഞ്ഞെടുപ്പിലെ തന്റെ പത്രികകള്‍ തള്ളിയതിനെതിരെ സാന്ദ്ര തോമസ് സമര്‍പ്പിച്ച ഹര്‍ജി കോടതി തള്ളിയിരുന്നു. ഇതിന് പിന്നാലെ സാന്ദ്രക്കെതിരെ വിജയ് ബാബു ഫെയ്‌സ്ബുക്കില്‍ പങ്കുവെച്ച പോസ്റ്റും ശ്രദ്ധ നേടുകയാണ്.
നിയമം പരിശോധിക്കുന്നത് വിജയ്ബാബുവിന്റെ സര്‍ട്ടിഫിക്കറ്റ് അല്ല, മറിച്ച് അസോസിയേഷന്റെ ബെലോയില്‍ പറഞ്ഞിരിക്കുന്ന കാര്യങ്ങളാണ്, നിയമത്തിന്റെ കണ്ണില്‍ എങ്ങനെ എന്നുള്ളതാണ്, അത് കോടതി വിലയിരുത്തും. അത്രേ എനിക്കുപറയാനുള്ളു എന്ന് വിജയ് ബാബു ഫേസ്ബുക്കില്‍ കുറിച്ചിരുന്നു. തുടര്‍ന്ന് സാന്ദ്രയ്ക്ക് ഫ്രൈഡേ ഫിലിം ഹൗസുമായി ഒരു ബന്ധവുമില്ല എന്ന തന്റെ പഴയ കുറിപ്പും വിജയ് ബാബു വീണ്ടും ഫേസ്ബുക്കില്‍ പങ്കുവച്ചു. സൂക്ഷ്മത പുലര്‍ത്തിയാല്‍ ഇനിയും സമൂഹത്തിനു മുന്നില്‍ അപഹാസ്യരാവാതിരിക്കാമെന്ന് സാന്ദ്ര ഓര്‍ക്കണം എന്ന് വിജയ് ബാബു പരിഹാസിച്ചിരുന്നു. ഇതിനൊപ്പം ഒരു കുറുക്കന്റെ ചിത്രവും ചേര്‍ത്തിരുന്നു. മറ്റൊരു പോസ്റ്റില്‍ സാന്ദ്രയുമായുള്ള പാര്‍ട്ണര്‍ഷിപ്പ് അവസാനിപ്പിച്ചതിനു ശേഷം താനൊരു നായ്ക്കുട്ടിയെ വളര്‍ത്താന്‍ തുടങ്ങിയെന്നും അത് സാന്ദ്രയേക്കാള്‍ വിശ്വസിക്കാന്‍ കൊള്ളാമെന്നും വിജയ് ബാബു കുറിച്ചു.
വിജയ് ബാബുവിന് പട്ടിയെ വിശ്വസിക്കാം, പട്ടി വിജയ് ബാബുവിനെ വിശ്വസിക്കുന്നതിലാണ് തനിക്ക് പേടി എന്നായിരുന്നു സാന്ദ്രയുടെ മറുപടി. സാന്ദ്രയുടെ പട്ടി ഷോയ്ക്ക് മറുപടി നല്‍കാന്‍ ഇനി സമയമില്ലെന്ന് വിജയ് ബാബുവും തിരിച്ചടിച്ചു.
