അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മെഗാസ്റ്റാർ മമ്മൂട്ടി ആരോഗ്യം വീണ്ടെടുത്ത സന്തോഷത്തിലാണ് ഓരോ സിനിമാ പ്രേമിയും. ഇപ്പോഴിതാ മമ്മൂട്ടിയുമായി നടത്തിയ ഫോൺ സംഭാഷണം സോഷ്യൽ മീഡിയയിൽ പങ്കുവെച്ച് വി.കെ ശ്രീരാമൻ. ‘അവസാനത്തെ ടെസ്റ്റ് പാസായി’, എന്ന് മമ്മൂട്ടി പറഞ്ഞപ്പോള്‍ അത് തനിക്കറിയാമായിരുന്നുവെന്ന് വി.കെ. ശ്രീരാമന്‍ മറുപടി നല്‍കി. ‘നീ ആര് പടച്ചോനോ’, എന്നായിരുന്നു മമ്മൂട്ടിയുടെ മറുചോദ്യമെന്നും അദ്ദേഹം ഫെയ്‌സ്ബുക്കില്‍ കുറിച്ചു.
മമ്മൂട്ടിക്കൊപ്പമുള്ള ഒരു പഴയകാല ചിത്രവും ഓട്ടോറിക്ഷയിൽ നിന്നെടുത്ത ഒരു ചിത്രവും ചേർത്താണ് വി.കെ ശ്രീരാമൻ താരത്തിനൊപ്പം നടത്തിയ സൗഹൃദസംഭാഷണം ആരാധകർക്കായി പങ്കുവച്ചത്.
വി.കെ. ശ്രീരാമന്റെ കുറിപ്പ് വായിക്കാം:
‘‘നിന്നെ ഞാൻ കൊറേ നേരായീലോ വിളിക്കണ് ? നീ വളരെ ബിസി ആണ് ആണ് ലേ?’’
‘‘ബിസി ആയിട്ട് പൊക്കോണ്ടിരിയ്ക്കായിരുന്നു ഓട്ട്രഷേല്. ഇതിന്റെ സൗണ്ട് കാരണം ഫോണടിച്ചത് അറിഞ്ഞില്ല.’’
‘‘കാറോ ?’’
‘‘ഡ്രൈവൻ വീട്ടിപ്പോയി. ഇന്ദുചൂഡൻസ് പ്രദർദശനത്തിന് വന്നതാ. അത് കഴിഞ്ഞ്, അമൃതേം കഴിഞ്ഞേ ചെറുവത്താനിക്ക് പോവാമ്പറ്റു. അപ്പ അവൻ പോയി.’’
‘ഡാ ഞാൻ വിളിച്ചതെന്തിനാന്ന് ചോദിക്ക്.. നീ’’
‘‘എന്തിനാ?’’
‘‘അവസാനത്തെ ടെസ്റ്റും പാസ്സായടാ’’
‘‘ദാപ്പോവല്യേ കാര്യം ? ങ്ങള് പാസ്സാവുംന്ന് എനിക്ക് നേരത്തെ അറിയാമായിരുന്നു.’’
നീയ്യാര് പടച്ചോനോ?
‘‘ഞാൻ കാലത്തിനു മുമ്പേ നടക്കുന്നവൻ. ഇരുളിലും വെളിച്ചത്തിലും മഴയിലും വെയിലിലും വടിയോ കുടയോ ഇല്ലാതെ സഞ്ചരിക്കുന്നവൻ, എന്താ മിണ്ടാത്ത്?’’
‘‘ഏതു നേരത്താ നിന്നെ വിളിക്കാൻ തോന്നിയത് എന്ന് ചിന്തിക്കുകയായിരുന്നു ഞാൻ.’’
യാ ഫത്താഹ് സർവ ശക്തനായ തമ്പുരാനേ, കാത്തു കൊള്ളണേ !
അതേസമയം, മമ്മൂട്ടി പൂർണ ആരോഗ്യവാനായി മടങ്ങിയെത്തുന്നു എന്ന വാർത്ത ആഘോഷമാക്കുകയാണ് മലയാള ചലച്ചിത്രലോകം. സന്തോഷക്കുറിപ്പുകളും ചിത്രങ്ങളും പങ്കുവച്ചാണ് മലയാള സിനിമയിലെ പ്രമുഖർ മമ്മൂട്ടിയുടെ തിരിച്ചുവരവിനെ ആഘോഷിക്കുന്നത്. ‘കേൾക്കാനായി കാതോർത്തു പ്രാർഥനയോടെ കാത്തിരുന്ന സന്തോഷവാർത്ത,’ എന്നാണ് സിബി മലയിൽ ഔദ്യോഗിക പേജിൽ കുറിച്ചത്.
‘എല്ലാം ഓക്കെ ആണ്’ എന്നായിരുന്നു രമേശ് പിഷാരടിയുടെ പ്രതികരണം. ‘വാക്കുകൾക്ക് ഈ സന്തോഷതെ അതേപടി പ്രകടിപ്പിക്കാനില്ല. ഒരിക്കൽ കൂടി എല്ലാം ഓക്കെ ആണ്,’ രമേശ് പിഷാരടി കുറിച്ചു. ‘രാജാവ് തിരിച്ചെത്തിയിരിക്കുന്നു’ എന്ന ആവേശക്കുറിപ്പാണ് മാലാ പാർവതി പങ്കുവച്ചത്. ‘ഇതിൽ കൂടുതൽ ഒരു നല്ല വർത്തമാനം ഇല്ല. മമ്മൂക്ക പൂർണ്ണ ആരോഗ്യം വീണ്ടെടുത്തിരിക്കുന്നു. ചികിത്സിച്ച ഡോക്ടർമാർക്കും, ശ്രുശൂഷിച്ച എല്ലാവവർക്കും, ആശുപത്രിയോടും കടപ്പാട്. സ്നേഹം. അതെ… രാജാവ് തിരിച്ചെത്തിയിരിക്കുന്നു! സന്തോഷം, നന്ദി… പ്രാർഥനകൾക്ക് ഉത്തരം കിട്ടിയല്ലോ,’ മാലാ പാർവതി കുറിച്ചു.
