അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.പുതിയ ലുക്കിനെ പരിഹസിച്ച ആരാധകന് മറുപടിയുമായി നടൻ നസ്ലിൻ. ‘ലോക’ സിനിമയുടെ റിലീസിന് ശേഷം തിയറ്ററിൽ പ്രേക്ഷകരോട് സംവദിക്കാനെത്തിയപ്പോഴായിരുന്നു കാണികളിൽ ഒരാൾ നടന്റെ പുതിയ ലുക്കിനെ പരിഹസിച്ച് കമന്റ് പറഞ്ഞത്.
നസ്ലിൻ സംസാരിക്കുന്നതിനിടെ ഒരു പ്രേക്ഷകൻ ‘ബംഗാളി ലുക്ക് അടിപൊളി ആയിട്ടുണ്ട്’ എന്ന് വിളിച്ചു പറയുകയായിരുന്നു. എന്നാൽ ഒട്ടും പ്രകോപിതനാകാതെ ആരാധകനോട് നന്ദി പറയുന്ന നസ്‌ലിനെയാണ് വിഡിയോയിൽ കാണുന്നത്.
കഴിഞ്ഞ കുറച്ച് ദിവസങ്ങൾക്കു മുമ്പ് നസ്‌ലിന്റെ വേറിട്ടൊരു ലുക്ക് സമൂഹ മാധ്യമങ്ങളിൽ വൈറലായിരുന്നു. ആകെ മെലിഞ്ഞ് മുടി നീട്ടി വളർത്തിയ ലുക്കിലുള്ള നടനെ കണ്ട് ബംഗാളിയെപ്പോലെ ഉണ്ട് എന്നായിരുന്നു സമൂഹമാധ്യമങ്ങളിലെ ചർച്ച. പുതിയ സിനിമയായ ‘മോളിവുഡ് ടൈംസി’നു വേണ്ടിയാണോ ഈ പുതിയ ലുക്ക് എന്ന് പലരും സംശയം പ്രകടിപ്പിച്ചു.
അതേസമയം പാൻ-ഇന്ത്യ തലത്തിൽ വലിയ നിരൂപക പ്രശംസ നേടുന്ന ‘ലോക’ ഒരു സൂപ്പർഹീറോ സിനിമാറ്റിക് യൂണിവേഴ്സിലെ ആദ്യ ചിത്രമാണ്. കല്യാണിക്ക് പുറമേ നസ്ലിൻ, സാൻഡി എന്നിവരും ഈ സിനിമയിൽ മികച്ച പ്രകടനം കാഴ്ചവെച്ചിട്ടുണ്ട്. ചന്തു സലിംകുമാർ, അരുൺ കുര്യൻ, ശരത് സഭ, നിഷാന്ത് സാഗർ, വിജയരാഘവൻ തുടങ്ങിയവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. കേരളത്തിന് അകത്തും പുറത്തും ബോക്സ് ഓഫീസിൽ ചിത്രം വലിയ കുതിപ്പ് തുടരുകയാണ്.
ആസിഫ് അലി നായകനാകുന്ന ‘ടിക്കി ടാക്ക’യിലും നസ്ലിൻ പ്രധാന വേഷത്തിലെത്തുന്നുണ്ട്. ഗാറ്റ്സ്ബി എന്ന കഥാപാത്രത്തെയാണ് നസ്ലിൻ അവതരിപ്പിക്കുക.
