അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.തമിഴ് സിനിമയിലെ മുന്‍ നിര സംവിധായകരില്‍ ഒരാളാണ് വെട്രിമാരന്‍. ആടുകളം, വിടുതലൈ, വിസാരണൈ, അസുരന്‍, തുടങ്ങി നിരവധി ചിത്രങ്ങള്‍ അദ്ദേഹം തമിഴ് സിനിമയ്ക്ക് നല്‍കിയിട്ടുണ്ട്. ഇപ്പോഴിതാ തന്റെ സിനിമകളില്‍ സ്‌ക്രിപ്റ്റ് ഇല്ലാതെയാണ് അഭിനേതാക്കള്‍ അഭിനയിക്കുന്നതെന്ന് തുറന്ന് പറയുകയാണ് വെട്രിമാരന്‍. ഹോളിവുഡ് റിപ്പോര്‍ട്ടര്‍ ഇന്ത്യയ്ക്ക് നല്‍കിയ അഭിമുഖത്തിലാണ് വെട്രിമാരന്‍ ഇക്കാര്യം പറഞ്ഞത്.
വെട്രിമാരന്റെ വാക്കുകള്‍……
‘എന്റെ പ്രശ്‌നം എന്താണെന്ന് വെച്ചാല്‍, ഒരു ആര്‍ട്ടിസ്റ്റിനും പടത്തിന്റെ സ്‌ക്രിപ്റ്റ് കൊടുക്കാറില്ല. സ്‌ക്രിപ്റ്റില്ലാതെയാണ് എല്ലാവരും എന്റെ പടത്തില്‍ അഭിനയിക്കുന്നത്. കഥ പോലും അറിയാതെയാണ് അഭിനയിക്കുന്നതെന്ന് എന്നൊന്നും പറയാനാകില്ല. കഥയെക്കുറിച്ച് നല്ല ബോധ്യമുണ്ടാകും. എന്താണ് ഷൂട്ട് ചെയ്യുകയെന്നതിനെക്കുറിച്ചും അറിവുണ്ടാകും.
പക്ഷേ, ഷോട്ട് എടുക്കുന്നതിന് മുമ്പായിരിക്കും ഞാന്‍ ഡയലോഗില്‍ മാറ്റം വരുത്തുന്നത്. അത് പലര്‍ക്കും പ്രശ്നമായിരിക്കും. വലിയ സീനുകളെക്കുറിച്ച് ഞാന്‍ ആദ്യമേ വിശദമായി പറഞ്ഞിട്ടുണ്ടാകും. ചെറിയ സീനുകളൊന്നും വിവരിക്കാറില്ല. എന്റെ അറിവില്‍ പല സംവിധായകരും ഇതേ രീതിയാണ് പിന്തുടരുന്നത്. എന്റെ മിക്ക സ്‌ക്രിപ്റ്റുകളും മിനിമം 400 പേജൊക്കെയുണ്ടാകും. ഇത്രയും എഴുതണം എന്നുള്ള ചിന്തയിലല്ല അങ്ങനെ ചെയ്യുന്നത്. ഇടക്കിടെ ഉണ്ടാകുന്ന മാറ്റങ്ങള്‍ കാരണമാണ്.
എഴുതി തുടങ്ങുമ്പോള്‍ വെറും 150 പേജൊക്കെയേ ഉണ്ടാകൂ. അത് പിന്നീട് വികസിക്കുന്നതാണ്. എന്റെ ഫസ്റ്റ് ഡ്രാഫ്റ്റ് ഒരിക്കലും വിശ്വസിക്കരുതെന്ന് പലരോടും ഞാന്‍ പറഞ്ഞിട്ടുണ്ട്. ഈ രീതിയുമായി സഹകരിക്കാന്‍ കഴിയുന്നവരാണ് എന്റെ ഒപ്പം വര്‍ക്ക് ചെയ്യുന്നത്. എന്നാല്‍ ഇതുമായി പൊരുത്തപ്പെട്ട് പോകാനാകാത്ത ചില നടന്മാരുണ്ട്. അവര്‍ എന്റെ കൂടെ വര്‍ക്ക് ചെയ്യാനാഗ്രഹിക്കുന്നില്ലെന്ന് പറഞ്ഞിട്ടുണ്ട്. അതില്‍ നിരാശയില്ല. ഞാന്‍ ആ ശീലം മാറ്റാനും പോകുന്നില്ല’.
