അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഏറെ ആരാധകരുള്ള തെലുങ്ക് സൂപ്പര്‍ താരമാണ് പവന്‍ കല്യാണ്‍. താരത്തിന്റേതായി അവസാനം പുറത്തുവന്ന ഹരി ഹര വീരമല്ലു എന്ന സിനിമ ബോക്‌സ് ഓഫീസില്‍ വലിയ തോല്‍വി ഏറ്റുവാങ്ങിയിരുന്നു. ഇപ്പോഴിതാ അടുത്ത റിലീസിന് തയ്യറെടുക്കുകയാണ് താരം. സാഹോ എന്ന സിനിമയിലൂടെ പ്രശസ്തനായ സുജിത് സംവിധാനം ചെയ്യുന്ന ‘ഒജി’ ആണ് ഇനി പുറത്തിറങ്ങാനുള്ള പവന്‍ കല്യാണ്‍ ചിത്രം. ഇപ്പോഴിതാ റിലീസിന് ദിവസങ്ങള്‍ ബാക്കി നില്‍ക്കെ സിനിമ ബോക്‌സ് ഓഫീസില്‍ റെക്കോര്‍ഡ് ഓപ്പണിങ് നേടുമെന്ന സൂചനകളാണ് പുറത്തുവരുന്നത്.
റിലീസിന് 23 ദിവസം ബാക്കി നില്‍ക്കെ നോര്‍ത്ത് അമേരിക്കയില്‍ നിന്ന് ഇതിനോടകം ചിത്രം 500k യുഎസ് ഡോളര്‍ നേടിയെന്ന റിപ്പോര്‍ട്ടുകളാണ് പുറത്തുവരുന്നത്. ചിത്രം ഉടന്‍ ഒരു മില്യണ്‍ ഡോളര്‍ എന്ന റെക്കോര്‍ഡിലേക്ക് എത്തുമെന്നാണ് ട്രേഡ് അനലിസ്റ്റുകളുടെ പ്രവചനം. ഇന്ത്യയില്‍ സിനിമ ആദ്യ ദിനങ്ങളില്‍ ഉള്‍പ്പെടെ വമ്പന്‍ ഓപ്പണിങ് നേടുമെന്നാണ് കണക്കുകൂട്ടല്‍. സിനിമയുടെ പുതിയ ടീസര്‍ ഇന്നലെ പുറത്തുവന്നിരുന്നു. പവന്‍ കല്യാണിന്റെ പക്കാ തിരിച്ചുവരവാകും സിനിമയെന്ന സൂചനയാണ് ടീസര്‍ നല്‍കുന്നത്.
രണ്ട് വര്‍ഷം മുന്‍പ് പവന്‍ കല്ല്യാണിന്റെ ജന്മദിനത്തില്‍ ടീസര്‍ പുറത്തുവിട്ട് പ്രഖ്യാപിക്കപ്പെട്ട ചിത്രമാണ് ഇത്. എന്നാല്‍ പിന്നീട് പവന്‍ കല്ല്യാണ്‍ രാഷ്ട്രീയത്തില്‍ ഇറങ്ങുകയും ആന്ധ്രാപ്രദേശ് ഉപമുഖ്യമന്ത്രി ആകുകയും ചെയ്തതോടെ ചിത്രം വൈകി. ചിത്രം ഈ വര്‍ഷം സെപ്തംബര്‍ 25 ന് തിയേറ്ററിലെത്തും. വലിയ പ്രതീക്ഷയോടെയാണ് പവന്‍ കല്യാണ്‍ ആരാധകര്‍ ഈ സിനിമയ്ക്കായി കാത്തിരിക്കുന്നത്. ആര്‍ആര്‍ആര്‍ എന്ന ചിത്രം നിര്‍മ്മിച്ച ഡിവിവി പ്രൊഡക്ഷന്‍ ആണ് ഈ ചിത്രം നിര്‍മിക്കുന്നത്.
ഒജിയില്‍ ബോളിവുഡ് താരം ഇമ്രാന്‍ ഹാഷ്മി നെഗറ്റീവ് റോളില്‍ എത്തുന്നു എന്ന പ്രത്യേകതയുമുണ്ട്. പ്രിയങ്ക മോഹന്‍ ആണ് സിനിമയിലെ നായിക. രവി കെ ചന്ദ്രനാണ് ചിത്രത്തിന്റെ ഛായാഗ്രാഹണം. ആക്ഷന് പ്രാധാന്യം നല്‍കി ഒരുങ്ങുന്ന സിനിമയില്‍ പ്രകാശ് രാജും, അര്‍ജുന്‍ ദാസും ശ്രിയ റെഡ്ഡിയും ഹരിഷ് ഉത്തമനും പ്രധാന വേഷങ്ങളില്‍ എത്തുന്നുണ്ട്. ഡി വി വി ദനയ്യയാണ് ചിത്രം നിര്‍മിക്കുന്നത്. ഹരീഷ് പൈയാണ് ക്രിയേറ്റീവ് പ്രൊഡ്യൂസര്‍. എക്‌സിക്യുട്ടീവ് പ്രൊഡ്യൂസര്‍ അശ്വിന്‍ മണിയും.
