അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ആപ്പിളിന്റെ ഏറ്റവും പുതിയ ജനപ്രിയ ഉത്പന്നങ്ങള്‍ നാളെ എത്തും. ആപ്പിളിന്റെ ഓ ഡ്രോപ്പിങ് (Awe-dropping) പരിപാടി നാളെയാണ് നടക്കുന്നത്. സെപ്റ്റംബര്‍ ഒമ്പത് ചൊവ്വാഴ്ച ഇന്ത്യന്‍ സമയം രാത്രി 10.30 നാണ് പരിപാടി ആരംഭിക്കുക.
പുതിയ ഐഫോണ്‍ 17 ലൈനപ്പിനൊപ്പം ആപ്പിള്‍ വാച്ച് സീരീസ്, എയര്‍പോഡ്‌സ്, മറ്റ് അനുബന്ധ ഉത്പന്നങ്ങള്‍ എന്നിവ കമ്പനി പുറത്തിറക്കും.
ഐഫോണ്‍ 17, ഐഫോണ്‍ 17 പ്രോ, ഐഫോണ്‍ 17 പ്രോ മാക്‌സ്, ഐഫോണ്‍ 17 എയര്‍ എന്നിങ്ങനെ നാല് പുതിയ മോഡലുകളാണ് ആപ്പിള്‍ ഐഫോണ്‍ 17 സീരീസില്‍ അവതരിപ്പിക്കുന്നത്.
മുന്‍പ് ഐഫോണ്‍ 12, 13 സീരീസുകളില്‍ മിനി മോഡല്‍ ഉള്‍പ്പെടുത്തിയിരുന്ന ആപ്പിള്‍, ഐഫോണ്‍ 14, 15, 16 സീരീസുകളില്‍ പ്ലസ് മോഡല്‍ അവതരിപ്പിച്ചിരുന്നു.
എന്നാല്‍, ഈ മിനി, പ്ലസ് മോഡലുകള്‍ക്ക് പകരമായി ഇത്തവണ അവതരിപ്പിക്കുന്നത് ഐഫോണ്‍ 17 എയര്‍ ആണ്. വെറും 5.5 മില്ലിമീറ്റര്‍ കനം മാത്രമുള്ള ഈ മോഡല്‍ ഡിസൈനില്‍ വിപ്ലവകരമായ മാറ്റം കൊണ്ടുവരുന്നുണ്ട്.
അതേസമയം ഐഫോണ്‍ 17 സീരീസ് പുത്തന്‍ രൂപകല്‍പ്പനയിലാണ് എത്തുന്നത്. പുതിയ നിറങ്ങളും മെച്ചപ്പെടുത്തിയ ക്യാമറ ബമ്പ് ഡിസൈനും ഇതിന്റെ പ്രധാന ആകര്‍ഷണങ്ങളാണ്.
