അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.തെന്നിന്ത്യയില്‍ ഏറ്റവും കൂടുതല്‍ ആരാധകരുളള നടിമാരില്‍ ഒരാളാണ് സാമന്ത റൂത്ത് പ്രഭു. ഇപ്പോഴിതാ സിനിമാ ലോകത്തെ തിരക്കിട്ട ജീവിതത്തില്‍ നിന്ന് മാറി, കൂടുതല്‍ ശാന്തവും സന്തോഷവും നിറഞ്ഞ ഒരു ഘട്ടത്തിലൂടെയാണ് കടന്ന് പോകുന്നത് സാമന്ത പറഞ്ഞു. ‘ഓള്‍ ഇന്ത്യ മാനേജ്മെന്റ് അസോസിയേഷന്റെ’ 52-ാമത് നാഷണല്‍ മാനേജ്മെന്റ് കണ്‍വെന്‍ഷനില്‍ സംസാരിക്കവെയാണ് താരം ഇക്കാര്യം തുറന്നുപറഞ്ഞത്.
സാമന്തയുടെ വാക്കുകള്‍……
‘മുന്‍പ്, ഓരോ വെള്ളിയാഴ്ചയും എന്റെ ആത്മാഭിമാനം അളന്നിരുന്നത് സിനിമയുടെ വിജയത്തെ അടിസ്ഥാനമാക്കിയായിരുന്നു. ഒരു സിനിമ വിജയിച്ചാല്‍ അതിന്റെ സന്തോഷം അടുത്ത ദിവസം തന്നെ മാഞ്ഞുപോകും. എന്നാല്‍ ഒരു പരാജയത്തിന്റെ വേദന ഞാന്‍ ഒരുപാട് കാലം മനസ്സില്‍ കൊണ്ടുനടക്കുമായിരുന്നു,ഈ മാനസികാവസ്ഥയില്‍ നിന്ന് പുറത്തുവരാന്‍ തന്നെ സഹായിച്ചത് മയോസൈറ്റിസ് എന്ന രോഗമാണ്. രോഗം ബാധിച്ചപ്പോഴാണ് ആരോഗ്യം കരിയറിനേക്കാള്‍ പ്രധാനപ്പെട്ടതാണെന്ന് താന്‍ തിരിച്ചറിഞ്ഞത്.
രോഗം ബാധിച്ചതിന് ശേഷം ജീവിതത്തെക്കുറിച്ചുള്ള തന്റെ കാഴ്ചപ്പാട് പൂര്‍ണ്ണമായും മാറി. വര്‍ഷത്തില്‍ അഞ്ച് സിനിമകള്‍ ചെയ്യുക, ബ്ലോക്ക്ബസ്റ്ററുകള്‍ നേടുക, ടോപ്പ് 10 താരങ്ങളുടെ പട്ടികയില്‍ ഇടം നേടുക എന്നിങ്ങനെയുള്ള കരിയര്‍ ലക്ഷ്യങ്ങള്‍ ഇപ്പോള്‍ തനിക്കില്ല. കഴിഞ്ഞ രണ്ട് വര്‍ഷത്തിനിടെ ഒരു സിനിമ പോലും റിലീസ് ചെയ്തിട്ടില്ല. ആയിരം കോടി ക്ലബ്ബില്‍ ഇടം നേടിയ സിനിമകളുമില്ല. എന്നിട്ടും താന്‍ മുമ്പെങ്ങുമില്ലാത്തവിധം സന്തോഷവതിയാണ്.
എല്ലാ ദിവസവും നന്ദി പറഞ്ഞുകൊണ്ട് ഡയറി എഴുതുന്നത് എന്റെ ജീവിതത്തിലെ പ്രധാനപ്പെട്ടൊരു ഭാഗമായി മാറി. എന്റെ ആരാധകര്‍ എന്നെ പിന്തുടരുന്നത് ഒരു ഗ്ലാമറസ് ജീവിതം കാണാനാണ് എന്നെനിക്കറിയാം. പക്ഷേ എന്റെ പോഡ്കാസ്റ്റിലൂടെ ആരോഗ്യപരമായ കാര്യങ്ങള്‍ കൂടി അവര്‍ക്ക് നല്‍കാന്‍ ഞാന്‍ ശ്രമിക്കുന്നുണ്ട്.
താന്‍ അനുഭവിച്ച നിസ്സഹായത മറ്റൊരാള്‍ക്കും ഉണ്ടാകാതിരിക്കാന്‍ വേണ്ടിയാണ് തന്റെ ഈ പുതിയ സംരംഭങ്ങള്‍. പരാജയങ്ങളെയും തിരിച്ചടികളെയും സമീപിക്കുന്നതില്‍ ഇപ്പോള്‍ തന്റെ മനോഭാവം പൂര്‍ണ്ണമായും മാറിയിരിക്കുന്നു’.
