അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മോഹന്‍ലാലിനെ നായകനാക്കി തരുണ്‍ മൂര്‍ത്തി സംവിധാനം ചെയ്ത ചിത്രമാണ് തുടരും. ചിത്രം ബോക്‌സ് ഓഫീസില്‍ വമ്പന്‍ കളക്ഷനാണ് നേടിയത്. ഇപ്പോഴിതാ തുടരുമിന്റെ റിലീസിന്റെ ആദ്യ ദിനം ചിത്രം വിജയിച്ചെന്നറിഞ്ഞപ്പോഴുള്ള മോഹന്‍ലാലിന്റെ പ്രതികരണത്തെക്കുറിച്ച് മനസുതുറക്കുകയാണ് സത്യന്‍ അന്തിക്കാട്.
സത്യന്‍ അന്തിക്കാടിന്റെ വാക്കുകള്‍……..
ഹൃദയപൂര്‍വ്വത്തിന്റെ ഷൂട്ടിനിടയിലാണ് തുടരും ഹിറ്റായെന്നുള്ള ഫോണ്‍ കോളുകള്‍ മോഹന്‍ലാലിന് വന്നത്. ‘ദൈവമേ…’ എന്നൊരു മന്ത്രിക്കല്‍ മാത്രമായിരുന്നു മോഹന്‍ലാലിന്റെ മറുപടി. എത്ര വലിയ വിജയമായാലും നിലത്ത് കാലുറപ്പിച്ചു നില്‍ക്കാന്‍ മോഹന്‍ലാലിന് കഴിയുന്നു. ‘വിജയവും പരാജയവും നിസ്സംഗതയോടെ കാണാനുള്ള കഴിവുണ്ട് മോഹന്‍ലാലിന്. ‘തുടരും’ എന്ന സിനിമ റിലീസ് ചെയ്യുമ്പോള്‍ ഞങ്ങള്‍ ‘ഹൃദയപൂര്‍വ്വ’ത്തിന്റെ ഷൂട്ടിങ്ങിനായി പുനെയിലാണ്. സംഗീതയും മാളവികയും സംഗീത പ്രതാപുമൊക്കെയുള്ള രസകരമായ ഒരു രംഗം എടുത്തു കൊണ്ടിരിക്കെ നാട്ടില്‍ നിന്നു തുരുതുരാ ഫോണുകള്‍ വരുന്നു.
‘ലാലേട്ടാ.. പടം സൂപ്പര്‍ ഹിറ്റ്. ‘ദൈവമേ..’ എന്നൊരു മന്ത്രിക്കല്‍ മാത്രമാണ് മറുപടി. ഉച്ചയാവുമ്പോഴേക്കും വിവരം കിട്ടി തുടരും. ഒരു സര്‍വകാല റെക്കോര്‍ഡിലേക്ക് കുതിക്കുകയാണ്. വീഡിയോ കോളിലൂടെ തരുണ്‍ മൂര്‍ത്തിയും രഞ്ജിത്തും ബി ഉണ്ണികൃഷ്ണനുമൊക്കെ ആഹ്‌ളാദാരവങ്ങള്‍ മുഴക്കി. ഞാന്‍ പറഞ്ഞു, ‘ബാക്കി നമുക്കു നാളെയെടുക്കാം… ലാല്‍ മുറിയിലേക്കു പൊയ്‌ക്കൊള്ളു’. ‘എന്തിന്? നമുക്ക് ഷൂട്ട് ചെയ്യാം. ഇതൊക്കെ ഈശ്വരന്റെ അനുഗ്രഹം. അത്രയേയുള്ളു…’, എന്നാണ് മോഹന്‍ലാല്‍ പറഞ്ഞത്. എപ്പോഴും പരാജയങ്ങളെക്കാള്‍ പേടിക്കേണ്ടത് വിജയത്തെയാണ്. അറിയാതെ അടിതെറ്റിപ്പോവും. പക്ഷേ, എത്ര വലിയ വിജയത്തിലും നിലത്ത് കാലുറപ്പിച്ചു നില്‍ക്കാന്‍ മോഹന്‍ലാലിന് കഴിയുന്നു’.
അതേസമയം, ബോക്‌സ് ഓഫീസില്‍ 50 കോടിയും കടന്ന് മുന്നേറുകയാണ് ഹൃദയപൂര്‍വ്വം. റിലീസ് ചെയ്തു 12 ദിവസങ്ങള്‍ പിന്നിടുമ്പോള്‍ 31.25 കോടിയാണ് ഹൃദയപൂര്‍വ്വത്തിന്റെ കേരളത്തില്‍ നിന്നുള്ള നേട്ടം. ആദ്യ ദിനം 8.42 കോടി നേടി സിനിമയ്ക്ക് തുടര്‍ന്നുള്ള ദിവസങ്ങളിലും വലിയ നേട്ടമുണ്ടാക്കാനായി. രണ്ടാം ദിനം 7.93 കോടിയും മൂന്നാം ദിവസം 8.66 കോടിയും ഹൃദയപൂര്‍വം നേടി.
