അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സ്വാസികയെ കേന്ദ്ര കഥാപാത്രമാക്കി നേമം പുഷ്പരാജ് സംവിധാനം ചെയ്ത രണ്ടാം യാമം ഒടിടിയിലേക്ക്. ഈ വര്‍ഷം ഫെബ്രുവരി 28 ന് തിയറ്ററുകളില്‍ എത്തിയ ചിത്രം ഏഴ് മാസങ്ങള്‍ക്കിപ്പുറമാണ് ഒടിടിയിലേക്ക് എത്തുന്നത്. മനോരമ മാക്‌സിലൂടെയാണ് ചിത്രത്തിന്റെ സ്ട്രീമിംഗ്. സെപ്റ്റംബര്‍ 19 മുതല്‍ കാണാനാവും.
ഫോര്‍ച്യൂണ്‍ ഫിലിംസിന്റെ ബാനറില്‍ ആര്‍ ഗോപാലാണ് ഈ ചിത്രം തിരക്കഥ രചിച്ച് നിര്‍മ്മിക്കുന്നത്. കാലങ്ങളായി നേരിട്ടുകൊണ്ടിരിക്കുന്ന ചതിയ്ക്കും വഞ്ചനയ്ക്കുമെതിരെ സ്ത്രീകള്‍ വിരല്‍ ചൂണ്ടുന്ന ഈ കാലഘട്ടത്തിലെ സ്ത്രീകളുടെ പോരാട്ടത്തിന്റെ കഥയാണ് ഈ ചിത്രത്തിലൂടെ നേമം പുഷ്പരാജ് അവതരിപ്പിക്കുന്നത്. വ്യത്യസ്ഥ കാഴ്ച്ചപ്പാടുകള്‍ ഉള്ള ഇരട്ട സഹോദരന്മാരുടെ ജീവിതത്തിനും ഈ ചിത്രത്തില്‍ ഏറെ സ്ഥാനമുണ്ട്. ത്രില്ലും ആക്ഷനും ഇമോഷനുമൊക്കെ ചേരുന്ന, ഗാനങ്ങള്‍ക്കും ഏറെ പ്രാധാന്യം നല്‍കിയിട്ടുള്ള ഒരു ക്‌ളീന്‍ എന്റര്‍ടൈനറാണ് ഈ ചിത്രമെന്ന് അണിയറക്കാര്‍ അറിയിച്ചിരുന്നു. യുവനിരയിലെ ശ്രദ്ധേയരായ ധ്രുവനും ഗൗതം കൃഷ്ണയുമാണ് ഈ ചിത്രത്തിലെ നായകന്മാര്‍. ജോയ് മാത്യു, സുധീര്‍ കരമന, നന്ദു, ഷാജു ശ്രീധര്‍, രാജസേനന്‍, ജഗദീഷ് പ്രസാദ്, രേഖ രമ്യാ സുരേഷ്, ഹിമാശങ്കരി, എ ആര്‍ കണ്ണന്‍, അംബിക മോഹന്‍, രശ്മി സജയന്‍ എന്നിവരും പ്രധാന താരങ്ങളാണ്.
ഛായാഗ്രഹണം അഴകപ്പന്‍, എഡിറ്റിംഗ് വി എസ് വിശാല്‍, കലാസംവിധാനം ത്യാഗു തവനൂര്‍, മേക്കപ്പ് പട്ടണം റഷീദ്, പട്ടണം ഷാ, നൃത്തസംവിധാനം സമുദ്ര മധു ഗോപിനാഥ്, വക്കം സജി, ആക്ഷന്‍ മാഫിയ ശശി, ശബ്ദമിശ്രണം എന്‍ ഹരികുമാര്‍, നിശ്ചല ഛായാഗ്രഹണം ജയപ്രകാശ് അതളൂര്‍, കോസ്റ്റ്യൂം ഡിസൈന്‍ ഇന്ദ്രന്‍സ് ജയന്‍, എസ് ബി സതീഷ്, പ്രൊഡക്ഷന്‍ കണ്‍ട്രോളര്‍ പ്രതാപന്‍ കല്ലിയൂര്‍, പ്രൊജക്റ്റ് ഡിസൈന്‍ എ ആര്‍ കണ്ണന്‍. ഫോര്‍ച്യൂണ്‍ ഫിലിംസും ഫിയോക്കും ചേര്‍ന്നാണ് ചിത്രം തിയറ്ററുകളില്‍ പ്രദര്‍ശനത്തിന് എത്തിച്ചത്.
