അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ധ്യാന്‍ ശ്രീനിവാസന്‍,ലുക്ക്മാന്‍ അവറാന്‍ എന്നിവരെ കേന്ദ്ര കഥാപാത്രമാക്കി മുഹഷിന്‍ സംവിധാനം ചെയ്ത പുതിയ ചിത്രമാണ് ‘വള’. ചരിത്രത്തിന്റെ രഹസ്യങ്ങള്‍ നിറഞ്ഞ ആ വള കാലത്തിനപ്പുറം നിന്നും വര്‍ത്തമാനത്തിലേക്ക് എത്തി, പലരുടെയും ജീവിതങ്ങളുമായി ചേര്‍ന്ന് പോകുന്നതാണ് കഥയുടെ പ്രമേയം. ഇപ്പോഴിതാ ത്രില്ലിംഗ് ഫണ്‍ എന്റര്‍ടെയ്‌നര്‍ ആയി സിനിമ തിയേറ്ററുകളില്‍ മികച്ച പ്രതികരണം നേടി മുന്നേറിക്കൊണ്ടിരിക്കുകയാണ്.
‘കഠിന കഠോരമീ അണ്ഡകടാഹം’ വഴിയായിരുന്നു മുഹഷിന്‍ ആദ്യമായി ശ്രദ്ധേയനായത്. രണ്ടാമത്തെ ചിത്രമായ വളയില്‍, അദ്ദേഹം തിരക്കഥാകൃത്തായ ഹര്‍ഷദുമായി ( ഉണ്ട, പുഴു) ചേര്‍ന്ന്, വിവിധ കാലഘട്ടങ്ങളില്‍ പിണഞ്ഞുകിടക്കുന്ന ഒരു കഥയെ പുതുമയാര്‍ന്ന ദൃശ്യഭാഷയിലും ആകര്‍ഷകമായ രീതിയിലും ആണ് അവതരിപ്പിച്ചിരിക്കുന്നത്. അവതരണത്തിലെ പുതുമ തന്നെയാണ് പ്രേക്ഷകരെ തിയറ്ററുകളിലേക്ക് എത്തിക്കുന്നതും.
രാഷ്ട്രീയക്കാരനായി ധ്യാനും, പൊലീസുകാരനായി ലുക്മാനും മത്സരിച്ചാണ് ചിത്രത്തില്‍ അഭിനയിച്ചിരിക്കുന്നത്. രവീണ രവി ധ്യാനിന്റെ ഭാര്യയായും ശീതള്‍ ജോസഫ് ലുക്മാന്റെ ഭാര്യയായും തങ്ങളുടെ വേഷങ്ങള്‍ മനോഹരമാക്കിയിരിക്കുന്നു. വളരെയധികം അഭിനയപ്രാധാന്യം ഉള്ള വേഷങ്ങള്‍ ആണ് വിജയരാഘവനും ശാന്തികൃഷ്ണയും ചിത്രത്തില്‍ ചെയ്തിരിക്കുന്നത്. അബു സലിം, അര്‍ജുന്‍ രാധാകൃഷ്ണന്‍, നവാസ് വള്ളിക്കുന്ന്, ഷാഫി കൊല്ലം, യൂസുഫ് ഭായ്, ഗോകുലന്‍ തുടങ്ങി നിരവധി താരങ്ങളും സിനിമയില്‍ അഭിനയിക്കുന്നുണ്ട്.
സംഗീതസംവിധായകന്‍ ഗോവിന്ദ് വസന്ത ശ്രദ്ധേയമായൊരു കഥാപാത്രമായി എത്തുന്നു എന്നതാണ് ചിത്രത്തിന്റെ മറ്റൊരു പ്രത്യേകത. പതിവ് ക്ലീഷേകളില്‍ നിന്നും വ്യത്യസ്തമായൊരു പ്രതിനായക വേഷമാണ് ഗോവിന്ദ് വസന്ത കൈകാര്യം ചെയ്തിരിക്കുന്നത്. ചിത്രത്തിന്റെ മൂഡിനോട് ചേര്‍ന്ന രീതിയില്‍ ആണ് അഫ്‌നാസ് വി യുടെ ഛായാഗ്രഹണവും സിദ്ദിഖ് ഹൈദറിന്റെ എഡിറ്റിംഗും ഗോവിന്ദ് വസന്തയുടെ സംഗീതവും. ചിത്രത്തിലെ പാട്ടുകള്‍ക്ക് എല്ലാം മികച്ച അഭിപ്രായം ആണ് ലഭിച്ചിരിക്കുന്നത്. ഫെയര്‍ബെ ഫിലിംസ് നിര്‍മ്മിച്ച വളയുടെ വിതരണം നിര്‍വഹിച്ചിരിക്കുന്നത് വേഫറര്‍ ഫിലിംസ് ആണ്.
