ദളപതി വിജയ് ചിത്രം ‘ജനനായക’നിലെ ഗാനം ഉടന്‍ പുറത്തെന്ന് റിപ്പോര്‍ട്ട്

ഇളയദളപതി വിജയ്യെ നായകനാക്കി എച്ച് വിനോദ് സംവിധാനം ചെയ്യുന്ന ചിത്രമാണ് ജനനായകന്‍. രാഷ്ട്രീയ പ്രവേശനത്തിന് മുന്നോടിയായി വിജയ് അഭിനയിക്കുന്ന അവസാന ചിത്രമാണിത്. ഇപ്പോഴിതാ സിനിമയിലെ ആദ്യ ഗാനത്തിനെക്കുറിച്ചുള്ള റിപ്പോര്‍ട്ടുകള്‍ പുറത്തുവരുകയാണ്.

ദീപാവലിയോട് അനുബന്ധിച്ച് ഒക്ടോബറില്‍ സിനിമയിലെ ആദ്യ ഗാനം പുറത്തിറങ്ങുമെന്നാണ് റിപ്പോര്‍ട്ട്. ദളപതി വിജയ് തന്നെ ആലപിച്ച ഒരു പക്കാ ഡാന്‍സ് നമ്പര്‍ ഗാനമാണ് പുറത്തുവരാന്‍ ഒരുങ്ങുന്നത്. അനിരുദ്ധിന്റെ സംഗീതത്തില്‍ ഒരുങ്ങുന്ന ഗാനം ഹിറ്റ് ചാര്‍ട്ടില്‍ ഇടം നേടുമെന്നാണ് ഏവരുടെയും പ്രതീക്ഷ. സിനിമയുടെ തമിഴ്‌നാട് വിതരണാവകാശം റെക്കോര്‍ഡ് തുകയ്ക്കാണ് റോമിയോ പിക്ചേഴ്സ് സ്വന്തമാക്കിയിരിക്കുന്നത്.

#JanaNayagan – First Single to Release as Diwali Special..💥 A Grand Celebration Song Sung by #ThalapathyVijay ..🔥 Gonna be a "Blast"ing Dance Number from #Anirudh..✌️ Meanwhile TN Rights are Said to be Acquired by Romeo Pictures Raahul..💥🤝 pic.twitter.com/qxfi5Oclaz

— Laxmi Kanth (@iammoviebuff007) September 23, 2025

ചിത്രത്തില്‍ വിജയ് പൊലീസ് ഓഫീസര്‍ ആയിട്ടാണ് എത്തുന്നതെന്ന സൂചനയാണ് ടീസര്‍ നല്‍കുന്നത്. കയ്യില്‍ ഒരു വാളുമായി പൊലീസ് വേഷത്തില്‍ വില്ലന്മാരുടെ മുന്നിലേക്ക് നടന്നുവരുന്ന വിജയ്യെ ആണ് ടീസറില്‍ കാണാനാകുന്നത്. ഒരു പക്കാ മാസ്സ് പടമായിരിക്കും ജനനായകന്‍ എന്ന സൂചനയും ടീസര്‍ നല്‍കുന്നുണ്ട്. ‘എന്‍ നെഞ്ചില്‍ കുടിയിരിക്കും’ എന്ന വിജയ്യുടെ ഹിറ്റ് ഡയലോഗോടെയാണ് ടീസര്‍ ആരംഭിക്കുന്നത്.

2026 ജനുവരി 9 ആണ് ‘ജനനായകന്‍’ തിയേറ്ററില്‍ എത്തുന്നത്. ബോബി ഡിയോള്‍, പൂജാ ഹെഡ്ഗെ, പ്രകാശ് രാജ്, ഗൗതം വാസുദേവ് മേനോന്‍, നരേന്‍, പ്രിയാമണി, മമിതാ ബൈജു തുടങ്ങി വമ്പന്‍ താരനിരയാണ് ജനനായകനില്‍ അണിനിരക്കുന്നത്. കെ വി എന്‍ പ്രൊഡക്ഷന്റെ ബാനറില്‍ വെങ്കട്ട് നാരായണ നിര്‍മിക്കുന്ന ഈ ചിത്രത്തിന് സംഗീതം ഒരുക്കുന്നത് അനിരുദ്ധ് രവിചന്ദര്‍ ആണ്. ജഗദീഷ് പളനിസ്വാമിയും ലോഹിത് എന്‍ കെയുമാണ് സഹനിര്‍മാണം.