അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ലുക്മാന്‍, ധ്യാന്‍ ശ്രീനിവാസന്‍ എന്നിവരെ പ്രധാന കഥാപാത്രങ്ങളാക്കി മുഹാഷിന്‍ സംവിധാനം ചെയ്ത ‘വള’ തിയേറ്ററുകളില്‍ മികച്ച പ്രേക്ഷക പ്രതികരണങ്ങളുമായി മുന്നേറുകളായാണ്. ഇപ്പോഴിതാ ചിത്രത്തിലെ പുതിയ ഗാനം പുറത്തുവിട്ടിരിക്കുകയാണ് അണിയറപ്രവര്‍ത്തകര്‍. ദസ്താന്‍ എന്ന് തുടങ്ങുന്ന ഗാനം ഗോവിന്ദ് വസന്തയാണ് സംഗീത സംവിധാനം നിര്‍വഹിച്ചിരിക്കുന്നത്. യവാര്‍ അബ്ദാല്‍ ആണ് ഗാനത്തിന് വരികളെഴുതിയിരിക്കുന്നതും ആലപിച്ചിരിക്കുന്നതും.
ഉണ്ട, പുഴു തുടങ്ങിയ സിനിമലക്ക് തൂലിക ചലിപ്പിച്ച ഹര്‍ഷാദാണ് വളയുടെ തിരക്കഥ അണിയിച്ചൊരുക്കിയിരിക്കുന്നത്. വളരെ മികച്ച രീതിയില്‍ ആണ് ഇരുവരും ചേര്‍ന്ന് ഈ സിനിമയെ സമീപിച്ചിരിക്കുന്നത് എന്നാണ് തീയേറ്ററുകളില്‍ നിന്നും ലഭിക്കുന്ന പ്രേക്ഷക പിന്തുണ സൂചിപ്പിക്കുന്നത്.
ധ്യാന്‍ ശ്രീനിവാസനും ലുക്മാനും ആണ് ചിത്രത്തിലെ പ്രധാന വേഷങ്ങള്‍ കൈകാര്യം ചെയ്തിരിക്കുന്നത്. ഇരുവരുടെയും കരിയറിലെ തന്നെ ഏറ്റവും മികച്ച പ്രകടനങ്ങള്‍ ആണ് അവര്‍ കാഴ്ച വെച്ചിരിക്കുന്നത് എന്നാണ് പ്രേക്ഷകര്‍ അഭിപ്രായപ്പെടുന്നത്. രവീണ രവിയും, ശീതള്‍ ജോസഫും, ധ്യാനിന്റേയും ലുക്മാന്റേയും ഭാര്യമാരുടെ വേഷങ്ങള്‍ ഭംഗി ആയി തന്നെ അവതരിപ്പിച്ചിട്ടുണ്ട്.
വിജയരാഘവന്റേയും ശാന്തികൃഷ്ണയുടേയും പ്രകടനം അതി ഗംഭീരം എന്നാണ് പ്രേക്ഷകര്‍ പറയുന്നത്. അബു സലീം, അര്‍ജുന്‍ രാധാകൃഷ്ണന്‍, നവാസ് വള്ളിക്കുന്ന്, ഷാഫി കൊല്ലം, യൂസുഫ് ഭായ്, ഗോകുലന്‍ തുടങ്ങി നിരവധി താരങ്ങള്‍ ഈ ചിത്രത്തില്‍ ഉണ്ട്.
സംഗീതസംവിധായകന്‍ ഗോവിന്ദ് വസന്ത ശ്രദ്ധേയമായൊരു കഥാപാത്രമായി എത്തുന്നു എന്നതാണ് ചിത്രത്തിന്റെ മറ്റൊരു പ്രത്യേകത. പതിവ് ക്ലീഷേകളില്‍ നിന്നും വ്യത്യസ്തമായൊരു പ്രതിനായക വേഷമാണ് ഗോവിന്ദ് വസന്ത കൈകാര്യം ചെയ്തിരിക്കുന്നത്. ചിത്രത്തിന്റെ മൂഡിനോട് ചേര്‍ന്ന രീതിയില്‍ ആണ് അഫ്നാസ് വി യുടെ ഛായാഗ്രഹണവും സിദ്ദിഖ് ഹൈദറിന്റെ എഡിറ്റിംഗും ഗോവിന്ദ് വസന്തയുടെ സംഗീതവും. ചിത്രത്തിലെ പാട്ടുകള്‍ക്ക് എല്ലാം മികച്ച അഭിപ്രായം ആണ് ലഭിച്ചിരിക്കുന്നത്. ഫെയര്‍ബെ ഫിലിംസ് നിര്‍മ്മിച്ച വളയുടെ വിതരണം നിര്‍വഹിച്ചിരിക്കുന്നത് വേഫറര്‍ ഫിലിംസ് ആണ്.
