അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സ്വയം നിയന്ത്രിത വാഹനങ്ങളായ റോബോ ടാക്സികൾ ദുബായിയുടെ നിരത്തുകൾ കീഴടക്കാൻ ഒരുങ്ങുന്നു. 2026-ന്റെ ആദ്യ പാദത്തിൽ ഈ സേവനം ആരംഭിക്കാനാണ് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) ലക്ഷ്യമിടുന്നത്.
ഇതിന്റെ ഭാഗമായി ജുമൈറ ഉൾപ്പെടെ നഗരത്തിന്റെ വിവിധ ഭാഗങ്ങളിൽ പരീക്ഷണയോട്ടം പുരോഗമിക്കുകയാണെന്ന് ആർടിഎയുടെ പബ്ലിക് ട്രാൻസ്പോർട്ട് ഏജൻസിയിലെ ട്രാൻസ്പോർട്ടേഷൻ സിസ്റ്റംസ് ഡയറക്ടർ ഖാലിദ് അൽ അവാധി അറിയിച്ചു.
ഡ്രൈവറില്ലാ വാഹനങ്ങൾ ദുബായിയുടെ ഗതാഗത രംഗത്ത് വിപ്ലവകരമായ മാറ്റങ്ങൾ കൊണ്ടുവരുമെന്നാണ് അധികൃതർ കരുതുന്നത്. റോബോ ടാക്സി പദ്ധതിയെക്കുറിച്ചുള്ള വിവരങ്ങൾ ദുബായ് വേൾഡ് കോൺഗ്രസ് ആൻഡ് ചാലഞ്ച് ഫോർ സെൽഫ് ഡ്രൈവിങ് ട്രാൻസ്പോർട്ടിലാണ് വ്യക്തമാക്കിയത്.
ദുബായിലെ സ്വയം നിയന്ത്രിത വാഹനഗതാഗതം കൂടുതൽ കാര്യക്ഷമമാക്കുക എന്ന ലക്ഷ്യത്തോടെ, ആർടിഎ മൂന്ന് പ്രമുഖ കമ്പനികളുമായി കരാറിലേർപ്പെട്ടു. ബൈഡു (അപ്പോളോ ഗോ), പോണി.എഐ, വിറൈഡ് എന്നീ കമ്പനികളുമായി സഹകരിച്ചാണ് ദുബായിൽ റോബോ ടാക്സികൾ വ്യാപകമാക്കുന്നത്. ഈ കരാർ ഭാവി ഗതാഗത സംവിധാനങ്ങൾക്ക് വലിയ മുതൽക്കൂട്ടാകുമെന്നാണ് അധികൃതർ കരുതുന്നത്.
