അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ബിഗ് ബോസ് മലയാളം ആറാം സീസണിലൂടെ പ്രേക്ഷക ശ്രദ്ധ നേടിയ മല്‍സരാര്‍ത്ഥികളാണ് സിജോ ജോണും അര്‍ജുന്‍ ശ്യാം ഗോപനും. ഇപ്പോഴിതാ ബിഗ് ബോസിനുള്ളില്‍ വെച്ച് തങ്ങള്‍ നല്ല സുഹൃത്തുക്കളായിരുന്നെന്നും എന്നാല്‍ പുറത്തെത്തിയപ്പോള്‍ അര്‍ജുന്‍ മാറിപ്പോയെന്നും പറയുകയാണ് സിജോ. ജിഞ്ചര്‍ മീഡിയക്കു നല്‍കിയ അഭിമുഖത്തിലായിരുന്നു സിജോ ഇക്കാര്യം പറഞ്ഞത്.
സിജോയുടെ വാക്കുകള്‍….
‘ബിഗ് ബോസില്‍ ഞാന്‍ ഏറ്റവും കൂട്ടായിരുന്നത് അര്‍ജുനുമായിട്ടാണ്. നിന്റെ കല്യാണത്തിന് ഉപ്പ് വിളമ്പാന്‍ ഞാനായിരിക്കും മുന്നില്‍ എന്ന് അര്‍ജുന്‍ ബിഗ് ബോസില്‍ വെച്ച് എന്നോട് തമാശയായി പറയുമായിരുന്നു. എന്നാല്‍ പുറത്തിറങ്ങി കഴിഞ്ഞപ്പോള്‍ എന്നെ വേദനിപ്പിച്ച ഒരു സംഭവമുണ്ടായി. എന്റെ കല്യാണത്തിന് അര്‍ജുന്‍ പള്ളിയില്‍ വന്നിരുന്നു. അര്‍ജുനെ കണ്ടപ്പോള്‍ പെട്ടെന്ന് എന്റെ വൈഫിനടുത്ത് നിന്ന് ഓടിച്ചെന്ന് അര്‍ജുനോട് മിണ്ടി. ഷെയ്ക്ക് ഹാന്റ് കൊടുത്ത്, എടാ കാണണം എന്ന് പറഞ്ഞു. ഏറ്റവും നല്ലൊരു സുഹൃത്തിനെ കണ്ട എക്‌സൈറ്റ്‌മെന്റിലാണ് ഞാന്‍ ഓടി ചെല്ലുന്നത്.
എന്റെ നിശ്ചയത്തിനും ബാച്ചിലേര്‍സ് പാര്‍ട്ടിക്കും മനസമ്മതത്തിനുമൊന്നും അര്‍ജുന്‍ വന്നിരുന്നില്ല. തിരക്കുണ്ട്, ഒരു ഉദ്ഘാടനമുണ്ടെന്ന് എന്നോട് പറഞ്ഞിരുന്നു. പക്ഷേ, കല്യാണത്തിനുണ്ടാകുമെന്ന് ഞാന്‍ കരുതി. എന്നാല്‍ പള്ളിയില്‍ വന്ന ശേഷം പിന്നെ അര്‍ജുനെ കണ്ടില്ല. വിവാഹത്തിന് സഹോദരന്റെ സ്ഥാനത്ത് നിന്ന് എന്റെ കാര്‍ തുറന്നുതന്നത് സായ് ആണ്. എന്നെ അത് വേദനിപ്പിച്ചു, ഒന്ന് വരാമായിരുന്നല്ലോ എന്നു ഞാന്‍ വിചാരിച്ചു.
അര്‍ജുനെ കുറ്റപ്പെടുത്തുന്നതല്ല. ഒരുപക്ഷേ, അദ്ദേഹത്തിന്റെ പേഴ്‌സണലായ തിരക്ക് കൊണ്ടായിരിക്കാം. അദ്ദേഹത്തിന്റെ കംഫര്‍ട്ട് സോണ്‍ അല്ലായിരിക്കും. വളരെ ശാന്തമായി പോകാനാഗ്രഹിക്കുന്ന ഒരു പ്രശ്‌നങ്ങളിലും ഇടപെടാന്‍ താല്‍പര്യമില്ലാത്ത, എനിക്കെന്റെ കാര്യം എന്ന രീതിയില്‍ പോകുന്ന ആളാണ് താന്‍ മനസിലാക്കിയിടത്തോളം അര്‍ജുന്‍”.
