അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.എപ്പോഴും മൊബൈൽ ഫോൺ കയ്യിൽ കൊണ്ട് നടക്കുന്നവരാണ് നമ്മൾ. ഒരുനിമിഷം പോലും ഫോൺ നിലത്തുവെയ്ക്കാറില്ല. ചിലർ ഫോൺ ടോയ്ലറ്റിൽ കൂടെ കൊണ്ടുപോകാറുമുണ്ട്. എന്നാൽ മൊബൈൽഫോൺ ടോയ്ലറ്റിൽ കൊണ്ടുപോകുന്നത് അത്രനല്ലതല്ല. ടോയ്ലറ്റിൽ ഇരുന്ന് ഫോൺ നോക്കുന്നവരിൽ മൂലക്കുരു വരാനുള്ള സാധ്യത 46 ശതമാനം കൂടുതലാണെന്നാണ് പുതിയ പഠനങ്ങൾ പറയുന്നത്.
ടോയ്ലറ്റിൽ ഫോൺ ഉപയോഗിക്കുന്നതും മൂലക്കുരുവും തമ്മിലെന്ത് ബന്ധം?
ടോയ്ലറ്റിൽ പോകുമ്പോഴും ഫോൺ ഉപയോഗിക്കുന്നവർ ദീർഘനേരം അവിടെത്തന്നെ ഇരിക്കും. ഇത്തരത്തിൽ ദീർഘനേരം ഇരിക്കുന്നത് മലാശയസിരകൾക്ക് സമ്മർദ്ദം നൽകും. ഇത് രക്തം അടിഞ്ഞുകൂടുന്നതിന് കാരണമാകുകയും മൂലക്കുരു സാധ്യത വർധിപ്പിക്കുകയും ചെയ്യുന്നു. മലാശയത്തിലെ മർദ്ദം വർധിപ്പിക്കുന്നത് എന്തും മൂലക്കുരുവിന് കാരണമാകാം. മലബന്ധം, കൂടുതൽ നേരം ഇരിക്കുന്നത്, ഗർഭകാലം, വിട്ടുമാറാത്ത വയറിളക്കം, നാരുകളുള്ള ഭക്ഷണം കഴിക്കാത്തത് എന്നിവയെല്ലാം ഇതിന് കാരണമാകാം. ഈ കാരണങ്ങളെല്ലാം സിരകൾ വീർക്കുന്നതിന് കാരണമാകുന്നു. അതാണ് മൂലക്കുരു ഉണ്ടാകുന്നതിന് കാരണമായി മാറുന്നതും.
പലർക്കും മൂലക്കുരു നാണക്കേട് ഉണ്ടാക്കുന്ന ഒരു അസുഖമാണ്. എന്നാൽ, ചില ലക്ഷണങ്ങൾ കണ്ടാൽ നിർബന്ധമായും ഡോക്ടറെ കാണേണ്ടതുണ്ട്. ടോയ്ലറ്റിൽ പോയിരുന്നുള്ള ഫോൺ സ്ക്രോളിംഗ് മൂലക്കുരു സാധ്യത കൂട്ടും. ചൊറിച്ചിൽ, മലദ്വാരത്തിന് ചുറ്റും വീക്കം, മലവിസർജ്ജനത്തിന് ശേഷം രക്തം വരൽ എന്നിവയെല്ലാം ഇതിന്റെ ലക്ഷണങ്ങളാണ്. ചില രോഗികളിൽ വ്രണവും കാണപ്പെടാറുണ്ട്. മിക്കവർക്കും മൂലക്കുരു എന്ന് പറയുന്നത് തന്നെ നാണക്കേടാണ്. അതുകൊണ്ടു തന്നെ മിക്കപ്പോഴും ലക്ഷണങ്ങൾ ഗുരുതരമാകുമ്പോൾ മാത്രമാണ് ഡോക്ടറെ സമീപിക്കുകയുള്ളൂ. രക്തസ്രാവം, മലം നിറം മാറുന്നത് എന്നീ ലക്ഷണങ്ങൾ കണ്ടാൽ തന്നെ ചികിത്സ തേടേണ്ടതാണ്.
ഫോൺ കൊണ്ടുപോകാതിരിക്കുക തന്നെയാണ് ഏറ്റവും പ്രധാനപ്പെട്ട കാര്യം. കൂടാതെ, ടോയ്ലറ്റിൽ പോകുമ്പോൾ കാല് പൊക്കി വെക്കാൻ ഒരു ചെറിയ പീഠം ഉപയോഗിക്കുന്നത് നല്ലതായിരിക്കും. ഇത് കൂടാതെ ഭക്ഷണക്രമത്തിലും കാര്യമായി ശ്രദ്ധിക്കണം. നാരുകളടങ്ങിയ ഭക്ഷണം കൂടുതൽ ഉൾപ്പെടുത്താൻ ശ്രമിക്കുക. ധാരാളം വെള്ളം കുടിക്കുകയും വേണം. ഇത് മലബന്ധം കുറയ്ക്കുകയും മലവിസർജ്ജനം എളുപ്പമാക്കുകയും ചെയ്യുന്നു. സ്ഥിരമായി സംസ്കരിച്ച ഭക്ഷണങ്ങൾ കഴിക്കുന്നത് മലബന്ധം കൂടുതൽ വഷളാക്കും. പഴങ്ങൾ, പച്ചക്കറികൾ, ധാന്യങ്ങൾ എന്നിവ എല്ലാ ദിവസവും ഭക്ഷണത്തിൽ ഉൾപ്പെടുത്തുക. ശരീരത്തിന് ആവശ്യമായ വെള്ളം കുടിക്കുകയും ചെയ്യണം. എല്ലാദിവസവും കുറച്ച് നേരമെങ്കിലും വ്യായാമം ചെയ്യുക.
