അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.“എത്രയാണ് ചേട്ടാ ഒരു മാസം അടയ്ക്കുന്ന EMI?” എന്നൊരു അവതാരകൻ ചോദിച്ചപ്പോൾ പറഞ്ഞ സത്യസന്ധമായ മറുപടി വാർത്തയും ട്രോളുമായി മാറിയ പശ്ചാത്തലത്തിൽ, സംവിധായകനും ബിഗ് ബോസ് വിജയിയുമായ അഖിൽ മാരാർ തന്റെ സാമ്പത്തിക ജീവിതത്തിലെ പ്രതിസന്ധികളെക്കുറിച്ചും തിരിച്ചുവരവിനെക്കുറിച്ചും തുറന്നുപറയുന്നു.
“ഒന്നുകിൽ നിങ്ങൾ എന്നെ പരിഹസിക്കുക, അല്ലെങ്കിൽ ഞാൻ എത്തിച്ചേർന്ന അവസ്ഥയിലേക്ക് എത്തി മറ്റുള്ളവരുടെ പരിഹാസം കേൾക്കാൻ തയ്യാറാവുക” എന്ന വെല്ലുവിളിയോടെയാണ് അഖിൽ തന്റെ ജീവിതാനുഭവങ്ങൾ പങ്കുവെച്ചത്. തന്നെ എതിർക്കുന്നവരുടെ പുച്ഛം അവസാനിക്കാൻ, അവർ താൻ എത്തിച്ചേർന്ന നിലയിലേക്ക് വളർന്നാൽ മതി എന്നും അദ്ദേഹം കൂട്ടിച്ചേർത്തു.
ദാരിദ്ര്യത്തിന്റെ കറുത്ത ദിനങ്ങൾ
2017-ൽ ഷെയർ മാർക്കറ്റിലുണ്ടായ നഷ്ടം നികത്താൻ കാർഷിക വായ്പയെടുത്താണ് അഖിലിന്റെ ദുരിതകാലം തുടങ്ങുന്നത്. 2018-ൽ മൊബൈൽ ടവറിന് ഡീസലടിക്കാൻ വേണ്ടി രണ്ട് വാഹനങ്ങൾ കടം വാങ്ങി, എന്നാൽ നാല് മാസങ്ങൾക്കകം കോൺട്രാക്റ്റ് നഷ്ടപ്പെട്ട് വരുമാനം നിലച്ചു.
“കാറിന്റെ ലോൺ അടയ്ക്കാൻ പറ്റാത്ത അവസ്ഥയായി. നാട്ടുകാരുടെ മുന്നിലും വീട്ടുകാരുടെ മുന്നിലും അഭിമാനം പണയം വെച്ച് ജീവിക്കാൻ കഴിയാത്ത അവസ്ഥ വന്നു,” അദ്ദേഹം പറയുന്നു.
മകളുടെ അസുഖത്തിന് 150 രൂപ ഡോക്ടർ ഫീസ് നൽകാൻ കഴിയാത്ത ദയനീയ അവസ്ഥയുണ്ടായി.
ഭാര്യവീട്ടിൽ അവരുടെ ചിലവിൽ കഴിയുന്ന ഗതിയില്ലാത്ത അവസ്ഥ വന്നതോടെ അവസാനം വീട് വിട്ടിറങ്ങേണ്ടി വന്നു.
“ആരുമില്ലാതെ ഞാൻ കാറിൽ ഇരുന്ന് കരഞ്ഞു. വണ്ടിയുടെ സി.സി. മുടങ്ങി, മാസം 800 രൂപ പലിശ അടയ്ക്കാൻ കഴിയാതെ വന്നു.”
സിനിമയിലേക്ക്: ‘ദൈവമായി അവതരിച്ച യോഹന്നാൻ സാർ’
എല്ലാം നഷ്ടപ്പെട്ടു എന്ന് കരുതിയ അവസ്ഥയിലാണ് അഖിൽ സിനിമയ്ക്ക് വേണ്ടി തിരക്കഥ എഴുതിയത്. പല നിർമാതാക്കളെ കണ്ടെങ്കിലും, അവസാനം യോഹന്നാൻ സാർ ദൈവമായി അവതരിച്ചു. അദ്ദേഹം പറയുന്ന ബഡ്ജറ്റിൽ സിനിമ ചെയ്യണം എന്നതായിരുന്നു നിബന്ധന.
മരണത്തെ മാത്രം മുന്നിൽ കണ്ടു ജീവിച്ചിരുന്ന തനിക്ക് മുന്നോട്ട് പോകാനുള്ള ഏക മാർഗ്ഗമായി ഈ അവസരത്തെ കണ്ടുവെന്ന് അദ്ദേഹം പറയുന്നു. “സിനിമ പരാജയമായിരിക്കാം. പക്ഷേ എന്റെ നിശ്ചയദാർഢ്യം, കഠിന പരിശ്രമം, പ്രതിസന്ധികൾ അതിജീവിച്ച മനസ്സ് ഇതൊന്നും ഒരിക്കലും പരാജയപ്പെട്ടിട്ടില്ല.” ഷോർട്ട് ഫിലിം പോലും എടുക്കില്ലെന്ന് കളിയാക്കിയവർക്ക് മുന്നിൽ, ഇന്നും പലരും ചർച്ച ചെയ്യുന്ന ഒരു സിനിമ താൻ തീയേറ്ററിൽ എത്തിച്ചുവെന്നും അദ്ദേഹം അഭിമാനത്തോടെ പറഞ്ഞു.
കടം വീട്ടിയതിന്റെ കണക്കുകൾ; EMI ലക്ഷങ്ങളിൽ
വണ്ടിയുടെ സി.സി. അടയ്ക്കാൻ ഗതിയില്ലാതിരുന്ന അവസ്ഥയിൽ നിന്ന് താൻ എത്രത്തോളം മുന്നോട്ട് പോയി എന്ന് തെളിയിക്കുന്ന കണക്കുകളും അഖിൽ മാരാർ പങ്കുവെച്ചു:
വാഹന EMI: “കഴിഞ്ഞ രണ്ട് വർഷമായി വാഹനങ്ങളുടെ EMI അടയ്ക്കുന്നത് 1.27 ലക്ഷം രൂപയാണ്.” EMI ഇല്ലാത്ത കാറുകൾ വേറെയുമുണ്ട്.
ലോൺ ക്ലോസ് ചെയ്തത്: രണ്ടര ലക്ഷം രൂപയുണ്ടായിരുന്ന കാർഷിക വായ്പ പിന്നീട് റവന്യൂ റിക്കവറി ആയി വന്നപ്പോൾ അഞ്ചേമുക്കാൽ ലക്ഷം അടച്ച് ക്ലോസ് ചെയ്തു.
പഴയ ലോൺ തീർത്തു: 2013-ൽ 8000 രൂപ പെൻഡിങ് ഉണ്ടായിരുന്ന മുത്തൂറ്റിന്റെ ലോൺ, പിന്നീട് 1.40 ലക്ഷം രൂപ ആവശ്യപ്പെട്ടപ്പോൾ അതും അടച്ച് ക്ലോസ് ചെയ്തു.
നിലവിലെ സാമ്പത്തിക സ്ഥിതി: സിബിൽ സ്കോർ ഇല്ലാത്തതുകൊണ്ട് ഒരു മൊബൈൽ പോലും വാങ്ങാൻ പറ്റാതിരുന്ന തനിക്ക് കഴിഞ്ഞ മാസം 20 ലക്ഷം രൂപയുടെ പ്രീ-അപ്രൂവ്ഡ് ഓഡി കാർ ലോണും 15 ലക്ഷം രൂപയുടെ പേഴ്സണൽ ലോണും പാസ്സായി കിടപ്പുണ്ട്.
വർത്തമാനകാലത്തിലെ EMI വിശദാംശങ്ങൾ
ഹോം ലോൺ: മാസം 24,000 രൂപ (കൊച്ചിയിൽ ഒരു 3BHK ഫ്ലാറ്റ് ഫർണിഷ് ചെയ്യുന്നതിനായി എടുത്ത ലോണാണിത്, ഇതിൽ 5 ലക്ഷം രൂപ ഫിക്സഡ് ഡിപ്പോസിറ്റാണ്).
ആകെ EMI: ഒന്നര ലക്ഷം രൂപ.
ചിട്ടി: 15,000 രൂപ (15 ലക്ഷം രൂപയുടെ ചിട്ടി).
ലോൺ അനുപാതം: തന്റെ എല്ലാ ലോണുകളും ആകെ മുതലിന്റെ 20% മാത്രമാണ്.
“മൂന്നര ലക്ഷം അല്ല, പത്ത് ലക്ഷം ചിലവ് വരട്ടെ, അത് അടയ്ക്കാനുള്ള ശേഷി ഉണ്ടാക്കിയെടുക്കാൻ ആണ് പരിശ്രമിക്കുന്നത്,” അദ്ദേഹം ഉറപ്പിച്ചു പറഞ്ഞു.
“എവിടെയെങ്കിലും ആരെങ്കിലും പടച്ചുവിടുന്ന വാർത്തകളിൽ നിങ്ങൾ മനസ്സിലാക്കിയ അഖിൽ അല്ല ഞാൻ. ബിഗ് ബോസ് കണ്ട പ്രേക്ഷകരോട് ചോദിക്കൂ… അവർക്കറിയാം ഞാൻ ആരാണെന്നും എന്റെ മനസ്സിന്റെ നന്മ എന്താണെന്നും എനിക്കുള്ള കഴിവുകൾ എന്താണെന്നും,” അഖിൽ മാരാർ കൂട്ടിച്ചേർത്തു.
“എല്ലാവർക്കും നന്മകൾ നേരുന്നു.”
