അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.തെലുങ്ക് സിനിമ ലോകത്തെ ആരാധകരുടെ ഇഷ്ട ജോഡികളായ വിജയ് ദേവരകൊണ്ടയും രശ്മിക മന്ദാനയും വിവാഹിതരാകുന്നു എന്ന വാർത്തകൾ യാഥാർഥ്യമായതായി റിപ്പോർട്ടുകൾ. വർഷങ്ങളായി തുടർന്ന ഊഹാപോഹങ്ങൾക്ക് വിരാമമിട്ട്, ഇരുവരും സ്വകാര്യമായി വിവാഹ നിശ്ചയം നടത്തിയെന്നും വിവാഹ തീയതി പുറത്തുവന്നതായുമാണ് സൂചന.
2018-ൽ ഇറങ്ങിയ ‘ഗീതാ ഗോവിന്ദം’ എന്ന സൂപ്പർഹിറ്റ് ചിത്രത്തിലൂടെയാണ് വിജയ് ദേവരകൊണ്ടയും രശ്മിക മന്ദാനയും ആദ്യമായി ഒരുമിച്ചത്. ഇവരുടെ ഓൺ-സ്ക്രീൻ കെമിസ്ട്രി പ്രേക്ഷകർക്കിടയിൽ വലിയ ചർച്ചയാവുകയും, ഉടൻ തന്നെ ഇരുവരും പ്രണയത്തിലാണെന്ന അഭ്യൂഹങ്ങൾ ശക്തമാവുകയും ചെയ്തിരുന്നു. ‘ഡിയർ കോമ്രേഡ്’ എന്ന ചിത്രത്തിലും ഇവർ ഒന്നിച്ചെത്തിയതോടെ ആരാധകരുടെ പ്രതീക്ഷകൾ വർദ്ധിച്ചു.
ഒടുവിൽ, അടുത്ത സുഹൃത്തുക്കളുടെയും കുടുംബാംഗങ്ങളുടെയും സാന്നിദ്ധ്യത്തിൽ വിജയ് ദേവരകൊണ്ടയുടെ ഹൈദരാബാദിലെ വസതിയിൽ വെച്ച് ഇരുവരുടെയും വിവാഹ നിശ്ചയം നടന്നതായി തെലുങ്ക് മാധ്യമങ്ങൾ റിപ്പോർട്ട് ചെയ്യുന്നു. താരങ്ങളുടെ ഭാഗത്ത് നിന്ന് ഔദ്യോഗിക പ്രതികരണം വന്നിട്ടില്ലെങ്കിലും, വിജയിയുടെ ടീം വാർത്ത സ്ഥിരീകരിച്ചതായും ചില റിപ്പോർട്ടുകളുണ്ട്.
വിവാഹത്തെക്കുറിച്ചുള്ള വിവരങ്ങളാണ് ഇപ്പോൾ ആരാധകരെ ആവേശത്തിലാക്കുന്നത്. റിപ്പോർട്ടുകൾ പ്രകാരം, ഇരുവരുടെയും വിവാഹം 2026 ഫെബ്രുവരിയിൽ നടക്കും. അടുത്ത വർഷത്തെ ഏറ്റവും വലിയ സെലിബ്രിറ്റി വിവാഹങ്ങളിൽ ഒന്നായി ഇത് മാറുമെന്നാണ് കരുതുന്നത്. താരങ്ങൾ ഉടൻ തന്നെ ഔദ്യോഗിക പ്രഖ്യാപനം നടത്തുമെന്ന പ്രതീക്ഷയിലാണ് ആരാധകർ.
