അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സിനിമയുടെ തിരക്കുകളിൽ നിന്നും ഇടവേളയെടുത്ത് തമിഴ് സൂപ്പർതാരം രജനീകാന്ത് നടത്തുന്ന ഹിമാലയൻ യാത്രയുടെ ചിത്രങ്ങളാണ് സോഷ്യൽ മീഡിയയിൽ തരംഗമായിരിക്കുന്നത്. തന്റെ അടുത്ത സുഹൃത്തുക്കൾക്കൊപ്പം ആത്മീയ യാത്ര നടത്തുന്നതിനിടെ ഋഷികേശിലെ ശാന്തമായ അന്തരീക്ഷത്തിൽ അഭയം തേടിയിരിക്കുകയാണ് അദ്ദേഹം. ഒരു സാധാരണ ഭക്തനെപ്പോലെ, യാതൊരു താരപ്പൊലിമയുമില്ലാതെ യാത്ര ചെയ്യുന്ന രജനീകാന്തിൻ്റെ ചിത്രങ്ങൾ ആരാധകർക്ക് കൗതുകമായി.
മലയാളികളുടെ പ്രിയപ്പെട്ട താരമായ രജനീകാന്ത് പൊതുവെ അവധിക്കാലം ചിലവഴിക്കാൻ തിരഞ്ഞെടുക്കാറുള്ളത് ഹിമാലയ സാനുക്കളാണ്. എന്നാൽ ഇത്തവണത്തെ യാത്രാചിത്രങ്ങളിൽ ഏറ്റവും ശ്രദ്ധേയമായത് റോഡരികിലെ ലഘുഭക്ഷണം ആസ്വദിക്കുന്ന താരത്തിൻ്റെ ദൃശ്യങ്ങളാണ്. ആഢംബരങ്ങളോ സുരക്ഷാ അകമ്പടിയോ ഇല്ലാതെ, തെരുവോരത്തെ സാധാരണ കടയിൽ നിന്ന് ഭക്ഷണം കഴിക്കുന്ന രജനിയെയാണ് ചിത്രങ്ങളിൽ കാണാൻ സാധിക്കുന്നത്.
സന്യാസിമാരുടെ വേഷത്തോടു സാമ്യമുള്ള വെള്ള വസ്ത്രങ്ങൾ ധരിച്ചാണ് താരം യാത്ര ചെയ്യുന്നത്. തിരക്കുകളിൽ നിന്നും മാറി, ആത്മീയ ചിന്തകൾക്ക് പ്രാധാന്യം നൽകി, മനസ്സിനെ ശാന്തമാക്കാനുള്ള ശ്രമത്തിലാണ് സൂപ്പർസ്റ്റാർ. ഈ ലാളിത്യമാണ് അദ്ദേഹത്തെ മറ്റ് താരങ്ങളിൽ നിന്നും വ്യത്യസ്തനാക്കുന്നതും ജനപ്രിയനാക്കുന്നതും. പുതിയ സിനിമകളുടെ പ്രഖ്യാപനത്തിന് മുൻപ് ഊർജ്ജം സംഭരിക്കാനുള്ള താരത്തിൻ്റെ ഈ ഇടവേള, ആരാധകർക്ക് വലിയ സന്തോഷമാണ് നൽകുന്നത്. ഈ അവധിക്കാല ചിത്രങ്ങൾ, സിനിമാലോകത്തെ അദ്ദേഹത്തിന്റെ അടുത്ത പ്രോജക്റ്റിനായുള്ള ആകാംഷ വർദ്ധിപ്പിക്കുന്നു.
