അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അച്ഛന്റെ പാത പിന്തുടർന്ന് പ്രണവ് സിനിമയിലെത്തിയെങ്കിലും ഇത്രനാളും വെളളിത്തിരയിൽനിന്നും അകന്നു നിൽക്കുകയായിരുന്നു വിസ്മയ. പൊതുചടങ്ങുകളിലും കുടുംബ ഫൊട്ടോകളിലും വിസ്മയയെ വളരെ അപൂർവ്വമായേ കാണാറുണ്ടായിരുന്നുള്ളൂ. എന്നാൽ ജൂഡ് ആന്തണിയുടെ സിനിമയിലൂടെ മലയാളസിനിമയിൽ അരങ്ങേറ്റം കുറിക്കാൻ ഒരുങ്ങുകയാണ് വിസ്മയ. മാർഷൽ ആർട്സ് പ്രമേയമായി വരുന്ന ചിത്രമാണിത്.
മാർഷൽ ആർട്സിൽ ട്രെയിൻ ചെയ്യുന്നതിന്റെ തായ് ലാന്റിൽ നിന്നുള്ള ചിത്രങ്ങളാണ് വിസ്മയ ഇപ്പോൾ പങ്കിട്ടിരിക്കുന്നത്. ചിത്രങ്ങൾ കണ്ട് ജൂഡ് ആന്തണി ചിത്രം ചെയ്യുന്ന ‘തുടക്കം’ എന്ന സിനിമയ്ക്കുള്ള തയ്യാറെടുപ്പാണോ എന്നാണ് ആരാധകർ ചോദിക്കുന്നത്.
വരകളുടെയും എഴുത്തിന്റെയും നാടകാഭിനയത്തിന്റെയുമെല്ലാം ലോകത്താണ് വിസ്മയ. ഇതിനു പുറമേ തായ് ആയോധന കലയിലും വിസ്മയയ്ക്ക് ഏറെ താൽപ്പര്യമുണ്ട്.
തായ് ആയോധന കലയായ മുവായ് തായ് ഉൾപ്പെടെയുള്ള ആയോധന കലകളിൽ വിസ്മയ പരിശീലനം നേടിയിട്ടുണ്ട്. ഇവ അഭ്യസിക്കുന്നതിന്റെ വീഡിയോകൾ ഇടയ്ക്ക് വിസ്മയ ഇൻസ്റ്റഗ്രാം പേജിൽ പങ്കുവക്കാറുണ്ട്.
എഴുത്താണ് വിസ്മയയുടെ മറ്റൊരിഷ്ടം. താൻ എഴുതിയ കവിതകളും വരച്ച ചിത്രങ്ങളും ചേര്ത്ത് ‘ഗ്രെയ്ന്സ് ഓഫ് സ്റ്റാര്ഡസ്റ്റ്’ എന്നൊരു പുസ്തകവും വിസ്മയ അടുത്തിടെ പുറത്തിറക്കിയിരുന്നു. മോഹൻലാൽ, അമിതാഭ് ബച്ചൻ, ദുൽഖർ സൽമാൻ, നസ്രിയ, സുപ്രിയ പൃഥ്വിരാജ് തുടങ്ങിയവരെല്ലാം വിസ്മയയുടെ പുസ്തകത്തിന് ആശംസകളുമായി എത്തിയിരുന്നു.
