അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.അടൂർ ഗോപാലകൃഷ്ണനെതിരെ നടൻ ബൈജു സന്തോഷ് നടത്തിയ കമന്റ് സോഷ്യൽ മീഡിയയിൽ ശ്രദ്ധ നേടുന്നു.ദാദാസാഹേബ് ഫാൽക്കെ പുരസ്‌കാരം സ്വന്തമാക്കിയ മോഹൻലാലിനെ ആദരിക്കാൻ സർക്കാർ സംഘടിപ്പിച്ച പരിപാടിയിൽ അടൂർ നടത്തിയ പ്രസംഗവും അതിന് മോഹൻലാൽ നൽകിയ മറുപടിയും മുൻപ് അടൂർ മോഹൻലാലിനെക്കുറിച്ച് നടത്തിയ ഒരു പരാമർശവും ഉൾപ്പെടുത്തിക്കൊണ്ടുള്ള വിഡിയോ വൈറൽ ആയതിനു പിന്നാലെയാണ് ബൈജു സന്തോഷിന്റെ മാസ്സ് കമന്റ് വന്നത്.
മോഹൻലാലിനെ ആദരിച്ച പരിപാടിയിൽ സംസാരിച്ച അടൂർ ഗോപാലകൃഷ്ണൻ, തനിക്ക് രണ്ട് ദശാബ്ദം മുൻപ് ഈ അവാർഡ് ലഭിച്ചപ്പോൾ ഇത്തരത്തിലുള്ള ആദരവ് പ്രകടിപ്പിക്കലൊന്നും ഉണ്ടായിരുന്നില്ലെന്നും, ഇപ്പോൾ സർക്കാരും മുഖ്യമന്ത്രിയും പ്രത്യേക താത്പര്യമെടുത്താണ് മോഹൻലാലിനെ ആദരിക്കുന്നതെന്നും പറഞ്ഞിരുന്നു. ഈ വാക്കുകൾ, മുൻപും മോഹൻലാലിനെതിരെ സംസാരിച്ചിട്ടുള്ള അടൂർ വീണ്ടും വിമർശനം ആവർത്തിച്ചു എന്ന തരത്തിൽ സോഷ്യൽ മീഡിയയിൽ വിമർശിക്കപ്പെട്ടു. അടൂരിന്റെ പ്രസംഗത്തിന് ശേഷം സംസാരിച്ച മോഹൻലാലിന്റെ മറുപടി ഏറെ ശ്രദ്ധ നേടി.
‘എന്നെപ്പറ്റി ആദ്യമായി പറഞ്ഞ.., അല്ല മുൻപ് പലപ്പോഴും സംസാരിച്ചിട്ടുള്ള അടൂർ സാറിനും നന്ദി,’ എന്നായിരുന്നു മോഹൻലാലിന്റെ പ്രതികരണം. ഇതിനിടെയാണ്, മോഹൻലാലിനെ ഒരിക്കലും സിനിമയിൽ കാസ്റ്റ് ചെയ്യാത്തതിനെക്കുറിച്ച് അടൂർ മുൻപ് ഒരു അഭിമുഖത്തിൽ പറഞ്ഞ വാക്കുകൾ ഉൾപ്പെടെയുള്ള വിഡിയോ പ്രചരിച്ചത്. ‘മോഹൻലാലിന് വല്ലാത്തൊരു ഇമേജ് ആണ്. ഒരു നല്ലവനായ റൗഡി, എനിക്ക് ആ റോൾ പറ്റുകില്ല. നല്ലവനായ റൗഡി എന്ന അവസ്ഥയിൽ ഞാൻ വിശ്വസിക്കുന്നില്ല. റൗഡി റൗഡി തന്നെയാണ്. റൗഡി എങ്ങനെയാണ് നല്ലവനാകുന്നത്?’ എന്നായിരുന്നു അടൂരിന്റെ അന്നത്തെ പരാമർശം.
ഈ രണ്ട് സന്ദർഭങ്ങളും ചേർത്തുകൊണ്ടുള്ള വീഡിയോ സമൂഹമാധ്യമങ്ങളിൽ പ്രചരിച്ചപ്പോഴാണ് നടൻ ബൈജു സന്തോഷ് രൂക്ഷമായ കമന്റുമായി എത്തിയത്. ‘ഇങ്ങേരുടെ പടത്തിൽ അഭിനയിക്കാത്തതുകൊണ്ട് മോഹൻലാൽ സൂപ്പർസ്റ്റാർ ആയി’ എന്നായിരുന്നു ബൈജു സന്തോഷിന്റെ കമന്റ്. ബൈജുവിന്റെ ഈ പ്രതികരണം നിമിഷനേരം കൊണ്ട് വൈറലായി. ‘ബൈജു കൊല മാസ്സ്’, ‘അടൂരിന് ഈ മറുപടി തന്നെയാണ് വേണ്ടത്’ എന്നിങ്ങനെ നിരവധി കമന്റുകളാണ് ബൈജുവിന്റെ പോസ്റ്റിന് മറുപടിയായി വന്നുകൊണ്ടിരിക്കുന്നത്. മോഹൻലാലിനെ പിന്തുണച്ചുള്ള ബൈജുവിന്റെ ശക്തമായ നിലപാട് ആരാധകർ ഏറ്റെടുത്തിരിക്കുകയാണ്.
