അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.പരിഹാസങ്ങളെയും ദുരിതങ്ങളെയും അതിജീവിച്ച്, സ്വന്തമായി ഒരു വീട് എന്ന സ്വപ്നം സാക്ഷാത്കരിച്ചിരിക്കുകയാണ് ബിഗ് ബോസ് മലയാളം അഞ്ചാം സീസണിലൂടെ പ്രശസ്തയായ നാദിറ മെഹബൂബ്. നജീബിൽ നിന്ന് നാദിറയിലേക്കുള്ള അവരുടെ യാത്ര അത്രയേറെ വെല്ലുവിളികൾ നിറഞ്ഞതായിരുന്നു. ഈ നേട്ടത്തിന് പിന്നിലെ അവരുടെ കഠിനാധ്വാനം അറിയുമ്പോൾ, സൈബർ ഇടങ്ങളിലെ പരിഹാസ കമന്റുകൾ എത്രമാത്രം അനാവശ്യമാണെന്ന് ആർക്കും മനസ്സിലാകും.
1999-ൽ കാസർഗോഡ് ജില്ലയിലെ കാഞ്ഞങ്ങാട് ജനിച്ച നാദിറക്ക്, എട്ടാം ക്ലാസ്സിൽ വെച്ച് സഹപാഠികളിൽ നിന്ന് ലൈംഗികാതിക്രമം നേരിടേണ്ടി വന്നു. 15-ാം വയസ്സിൽ സ്വന്തം സ്വത്വം തിരിച്ചറിഞ്ഞതോടെ, 17-ാം വയസ്സിൽ അവർക്ക് വീട് വിട്ടിറങ്ങേണ്ടി വന്നു. പല ജോലികൾ ചെയ്തും കഷ്ടപ്പെട്ടുമാണ് അവർ വിദ്യാഭ്യാസം പൂർത്തിയാക്കിയത്. പിന്നീട് ആക്ടിവിസ്റ്റ്, മോഡൽ, അഭിനേത്രി എന്നീ നിലകളിൽ അവർ ശ്രദ്ധേയയായി. കാലടി സർവ്വകലാശാല യൂണിയൻ തിരഞ്ഞെടുപ്പിൽ എ.ഐ.എസ്.എഫ്. പ്രതിനിധിയായി പാനലിനെ നയിച്ചതും അവരുടെ പോരാട്ട വീര്യത്തിന് ഉദാഹരണമാണ്.
ബിഗ് ബോസ് വീട്ടിലെ നാദിറയുടെ തമാശ കലർന്ന സംസാരവും തഗ്ഗ് ഡയലോഗുകളും അവരെ മലയാളി പ്രേക്ഷകർക്ക് പ്രിയങ്കരിയാക്കി. സീസണിലെ ശക്തരായ മത്സരാർത്ഥികളിൽ ഒരാളായിരുന്നു അവർ.
ഇപ്പോഴിതാ, തൻ്റെ കഠിനാധ്വാനത്തിലൂടെ സ്വന്തമായൊരു വീട് എന്ന സ്വപ്നം നാദിറ യാഥാർത്ഥ്യമാക്കിയിരിക്കുന്നു. പുതിയ വീടിൻ്റെ ഗൃഹപ്രവേശ ചടങ്ങിൽ നിരവധി ബിഗ് ബോസ് സുഹൃത്തുക്കളും പങ്കെടുത്തിരുന്നു. വീടിൻ്റെ ദൃശ്യങ്ങൾ പങ്കുവെച്ചുകൊണ്ട് നാദിറ കുറിച്ചത്, തൻ്റെ പോരാട്ട ജീവിതത്തിൻ്റെ വിജയഗാഥയാണ്:
“മഴവില്ല് ആകാശത്തു നിന്നും ഭൂമിയിലേക്ക്!! ഈ വീടിൻ്റെ മുന്നിൽ ഇങ്ങനെ തല ഉയർത്തി നിൽക്കുമ്പോൾ എവിടന്നോ ഒരു അഹങ്കാരം ഉള്ളിൽ തോന്നി. ജീവിക്കാനും അത് സ്വപ്നം കാണാനും തുടങ്ങീട്ട് അധികം കാലമായില്ല. ആ ഇടത്തു നിന്നും ഈ സ്വപ്നത്തിലേക്ക് ഇത്ര വേഗം എത്തിച്ചതിൽ പടച്ച റബ്ബിനോട് നന്ദി പറയുന്നു.”
പരിഹാസ കമന്റുകൾക്ക് താൻ അടിമപ്പെടില്ലെന്നും, അതിനെ മറികടന്ന് ഉയർന്നു പറക്കുമെന്നും അവർ കുറിച്ചു. മറ്റൊരാൾക്കും ദോഷകരമല്ലാത്ത സ്വന്തം ഇഷ്ടങ്ങൾക്കനുസരിച്ച് ജീവിക്കുന്ന നാദിറയെ പോലുള്ളവരെ സൈബർ ആക്രമണങ്ങളിൽ നിന്ന് ഒഴിവാക്കി, അവരുടെ നേട്ടങ്ങളെ അഭിനന്ദിക്കുകയാണ് വേണ്ടത്.
