ലൈറ്റ്ട്രാം വരുന്നു, കൊച്ചിക്ക് ആശ്വാസമായി ? : എന്താണ് ലൈറ്റ് ട്രാം ?

തിരക്കു കുറയ്ക്കാനും യാത്രാ സൗകര്യം മെച്ചപ്പെടുത്താനും നടപ്പാക്കിയ കൊച്ചി മെട്രോയ്ക്കു പിന്നാലെ കൊച്ചിയുടെ നിരത്തുകളില്‍ വരുന്നൂ പുതിയൊരു യാത്രാ സുഖം. വിദേശ രാജ്യങ്ങളിലും ഇന്ത്യയിലെ മെട്രോ സിറ്റികളും മാത്രം കണ്ടു പരിചയമുള്ള ‘ലൈറ്റ് ട്രാം’ ആണ് പുതിയ അതിഥി. നഗരത്തിലെ യാത്രാക്കുരുക്കിന് അറുതി വരുത്താന്‍ ലക്ഷ്യമിട്ടുള്ള ലൈറ്റ് ട്രാം (മെട്രോലൈറ്റ്) പദ്ധതിക്ക് ഉടന്‍ തുടക്കമാകുമെന്നാണ് അദികൃതര്‍ വ്യക്തമാക്കുന്നത്. നിലവിലെ മെട്രോ ശൃംഖല എത്തിച്ചേരാത്ത പ്രധാന കേന്ദ്രങ്ങളെ ബന്ധിപ്പിക്കാന്‍ രൂപകല്‍പ്പന ചെയ്തിട്ടുള്ള ഈ സംവിധാനം, കേരളത്തിന്റെ വ്യവസായ തലസ്ഥാനത്ത് ഗതാഗത രംഗത്ത് പുതിയൊരു മാറ്റത്തിന് വഴിയൊരുക്കും. പദ്ധതിയുടെ വിശദമായ പ്രോജക്ട് റിപ്പോര്‍ട്ട് (DPR) ഉടന്‍ പൂര്‍ത്തിയാക്കി നിര്‍മ്മാണത്തിലേക്ക് കടക്കാനാണ് അധികൃതര്‍ ലക്ഷ്യമിടുന്നത്.

• എന്താണ് ലൈറ്റ് ട്രാം?

ലൈറ്റ് ട്രാം അഥവാ മെട്രോലൈറ്റ് എന്നത് ചെലവ് കുറഞ്ഞതും, ഭാരം കുറഞ്ഞതുമായ ഇലക്ട്രിക് റെയില്‍ ഗതാഗത സംവിധാനമാണ്. മെട്രോ റെയിലിനേക്കാള്‍ കുറഞ്ഞ യാത്രാശേഷിയേ ഇതിനുണ്ടാകൂ എങ്കിലും, ഇത് സ്ഥാപിക്കുന്നതിനും പ്രവര്‍ത്തിപ്പിക്കുന്നതിനും കുറഞ്ഞ മുതല്‍മുടക്ക് മതിയാകും. റോഡ് നിരപ്പിലൂടെ പ്രത്യേക ട്രാക്കുകളിലൂടെയോ, ചിലപ്പോള്‍ റോഡിലെ മറ്റ് വാഹനങ്ങളുമായി പങ്കിട്ടോ സര്‍വീസ് നടത്താന്‍ ഇതിന് കഴിയും. തിരക്കേറിയ നഗരങ്ങള്‍ക്ക് ഏറ്റവും അനുയോജ്യമായ, പരിസ്ഥിതി സൗഹൃദപരമായ ഒരു ഗതാഗത മാര്‍ഗ്ഗമാണിത്.

• എവിടെ, എത്ര ദൂരം?

കൊച്ചി മെട്രോ എത്തിച്ചേരാത്ത സുപ്രധാന കേന്ദ്രങ്ങളെ ബന്ധിപ്പിക്കുക എന്ന ലക്ഷ്യത്തോടെയാണ് ഈ പദ്ധതി ആസൂത്രണം ചെയ്യുന്നത്. എം.ജി. റോഡ് വഴി ഹൈക്കോടതി മുതല്‍ മെനക വരെയുള്ള പാതയിലാണ് ലൈറ്റ് ട്രാം സംവിധാനം സ്ഥാപിക്കാന്‍ ഒരുങ്ങുന്നത്. നിലവില്‍, മെട്രോയില്ലാത്ത മറൈന്‍ ഡ്രൈവ് ഉള്‍പ്പെടെയുള്ള ഈ ഭാഗത്തെ യാത്രക്കാര്‍ നേരിടുന്ന യാത്രാക്ലേശത്തിന് ഇതോടെ വലിയൊരു പരിഹാരമാകും. ലൈറ്റ് ട്രാം പദ്ധതിയുടെ ആദ്യ ഘട്ടം 6.2 കിലോമീറ്റര്‍ ദൂരത്തിലാണ് ആസൂത്രണം ചെയ്തിട്ടുള്ളത്. മറൈന്‍ ഡ്രൈവ് പോലുള്ള പ്രധാന വാണിജ്യ മേഖലകളെ കാര്യക്ഷമമായി ബന്ധിപ്പിക്കാന്‍ ഈ റൂട്ട് സഹായിക്കും. യാത്രാസമയം കുറയ്ക്കാനും, നഗരത്തിലെ പ്രധാന കേന്ദ്രങ്ങളിലേക്കുള്ള പ്രവേശനം എളുപ്പമാക്കാനും ലൈറ്റ് ട്രാം സഹായകമാകും.

• ചെലവ് എത്ര?

മെട്രോയുമായി താരതമ്യം ചെയ്യുമ്പോള്‍ സാമ്പത്തികമായി പദ്ധതിയെ ആകര്‍ഷകമാക്കുന്നത് അതിന്റെ കുറഞ്ഞ നിര്‍മ്മാണച്ചെലവാണ്. ഒരു കിലോമീറ്റര്‍ ലൈറ്റ് ട്രാം പാത സ്ഥാപിക്കുന്നതിന് ഏകദേശം ?75 കോടി രൂപ മാത്രമാണ് ചെലവ് പ്രതീക്ഷിക്കുന്നത്. ഇത് ഒരു കണ്‍വെന്‍ഷണല്‍ മെട്രോ പദ്ധതിക്ക് ചിലവായ ഏകദേശം ?300 കോടി/കി.മീ വേണ്ടിവരുന്ന ചെലവിന്റെ നാലിലൊന്ന് മാത്രമാണ്. ആദ്യ ഘട്ടത്തിലെ 6.2 കിലോമീറ്റര്‍ പൈലറ്റ് റൂട്ടിന്റെ ആകെ ചെലവ് ഏകദേശം ?465 കോടിയായിരിക്കും. സംസ്ഥാനത്തിന്റെ ധനകാര്യത്തിന് അധികഭാരം വരുത്താതെ പൊതുഗതാഗത സൗകര്യം വികസിപ്പിക്കാന്‍ ഈ മാതൃക സഹായകമാകും.

• ഇന്ത്യന്‍ നഗരങ്ങളുടെ ട്രാം ചരിത്രം.

കൊച്ചിയിലെ പദ്ധതി യാഥാര്‍ത്ഥ്യമായാല്‍, നിലവില്‍ ട്രാം സംവിധാനം പ്രവര്‍ത്തിക്കുന്ന കൊല്‍ക്കത്ത കഴിഞ്ഞാല്‍ ഈ നൂതന ഗതാഗത സംവിധാനം ലഭ്യമാകുന്ന രണ്ടാമത്തെ പ്രധാന ഇന്ത്യന്‍ നഗരമായി കൊച്ചി മാറും. ഇന്ത്യയില്‍ ഒരു കാലത്ത് മുംബൈ, ചെന്നൈ, ഡല്‍ഹി ഉള്‍പ്പെടെയുള്ള നിരവധി നഗരങ്ങളില്‍ ട്രാം സര്‍വീസുകള്‍ സജീവമായിരുന്നെങ്കിലും 1960-കളോടെ അവ നിര്‍ത്തലാക്കുകയായിരുന്നു. കുറഞ്ഞ ചെലവിലുള്ള ഗതാഗതത്തിനായി കോഴിക്കോട്, തിരുവനന്തപുരം, ജമ്മു, ശ്രീനഗര്‍ തുടങ്ങിയ നഗരങ്ങളിലും ഇപ്പോള്‍ മെട്രോലൈറ്റ്/ലൈറ്റ് മെട്രോ പദ്ധതികള്‍ പരിഗണനയിലുണ്ട്. കൊച്ചിയിലെ പദ്ധതി മറ്റ് നഗരങ്ങള്‍ക്കും മാതൃകയാകും.