അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ദീപങ്ങളുടെ ആഘോഷമാണ് ദീപാവലി. തിന്മയുടെ മേൽ നന്മ നേടിയ വിജയത്തെയാണ് ഈ ആഘോഷം കാണിക്കുന്നത്. സന്തോഷത്തിന്റെ ഭാഗമായി എല്ലാവരും പരസ്പരം പല തരത്തിലുള്ള മധുരപലഹാരങ്ങൾ കൈമാറാറുണ്ട്. ദീപാവലി ആഘോഷങ്ങളുടെ ഭാഗമായി ഒരു കിലോഗ്രാമിന് 1,00,000 രൂപയിലധികം വിലയുള്ള സ്വർണം പൂശിയ മധുരപലഹാരങ്ങളാണ് ഇപ്പോൾ വാർത്തകളിലിടം പിടിച്ചിരിക്കുന്നത്. ജയ്പൂരിലെ ഒരു കടയിലാണ് ഈ മധുരപലഹാരങ്ങൾ ഉണ്ടാക്കുന്നത്.
ഫുഡ് ഇന്നൊവേറ്ററും ‘ത്യോഹാർ’ എന്ന സ്ഥാപനത്തിന്റെ സ്ഥാപകയുമായ അഞ്ജലി ജെയിൻ ആണ് കാഴ്ചയിൽ ആഡംബരം നിറഞ്ഞതും വില കൂടിയതുമായ ഈ ദീപാവലി മിഠായി തയ്യാറാക്കിയത്. ദീപാവലി ആഘോഷങ്ങൾക്ക് മുന്നോടിയായാണ് ജയ്പൂരിൽ ‘ത്യോഹാർ’ സ്വർണവും വെള്ളിയും പൂശിയ ആഡംബര മധുരപലഹാരങ്ങൾ പുറത്തിറക്കിയത്.
സ്വർണാഭരണങ്ങൾ അണിയാൻ മാത്രമല്ല മധുരപലഹാരത്തിന്റെ രൂപത്തിൽ ആസ്വദിക്കാനും കഴിയുമെന്നതാണ് പ്രത്യേകത. ‘ഗോൾഡ് സീരീസ് ബൈ ത്യോഹാർ’-ന്റെ ഭാഗമായാണ് ഈ മധുരപലഹാരങ്ങൾ.
സ്വർണത്തിന്റെ പൊടി ഉപയോഗിക്കുന്നത് അലങ്കാരത്തിന് വേണ്ടി മാത്രമല്ലെന്ന് അഞ്ജലി ജെയിൻ അഭിമുഖത്തിൽ വിശദീകരിച്ചു. ആയുർവേദത്തിലെ, രോഗപ്രതിരോധ ശേഷി വർധിപ്പിക്കാൻ സ്വർണ ഭസ്മം സഹായിക്കുമെന്ന വിവരത്തിൽനിന്നാണ് ഇതിന് പ്രചോദനം ലഭിച്ചതെന്ന് അവർ പറയുന്നു.
പട്ടികയിലെ മറ്റ് ആഡംബര വിഭവങ്ങൾ
ചാന്ദി ഭസ്മ് ഭരത് – ഒരു കഷ്ണത്തിന് 1,150 രൂപ
സ്വർണ ഭസ്മ് ഭരത് – ഒരു കഷ്ണത്തിന് 1,950 രൂപ / ഒരു കിലോഗ്രാമിന് 85,000 രൂപ
24 കാരറ്റ് കാജു കട്ലി – ഒരു കിലോഗ്രാമിന് 3,500 രൂപ
24 കാരറ്റ് പിസ്ത ലോഞ്ച് – ഒരു കിലോഗ്രാമിന് 7,000 രൂപ
24 കാരറ്റ് ലഡ്ഡു – ഒരു കിലോഗ്രാമിന് 2,500 രൂപ.
‘സ്വർണ പ്രസാദം’ ആണ് ഈ പട്ടികയിലെ ഏറ്റവും വിലകൂടിയ വിഭവങ്ങളിലൊന്ന്. കിലോഗ്രാമിന് 1,11,000 രൂപയാണ് വില’ – അഞ്ജലി ജെയിൻ പറഞ്ഞു, ‘കേവലം ഒരു മധുരം എന്നതിലുപരി, ആരോഗ്യത്തിന്റെയും രാജകീയതയുടെയും കൂടിച്ചേരലാണ് ഈ പലഹാരമെന്നും അഞ്ജലി പറയുന്നു.
