അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സോഷ്യൽ മീഡിയയിൽ നടൻ അജ്മൽ അമീറിനെതിരെയുള്ള ലൈംഗിക ആരോപണ വിവാദത്തിൽ തെളിവുകൾ നിരത്തി ഡിസൈനറും മേക്കപ്പ് ആർട്ടിസ്റ്റുമായ റോഷ്ന ആൻ റോയ്. അജ്മൽ അയച്ച മെസേജുകളുടെ സ്ക്രീൻഷോട്ട് പങ്കുവെച്ചാണ് റോഷ്ന രംഗത്തെത്തിയത്. ‘ഹൗ ആർ യു’, ‘നീ അവിടെ ഉണ്ടോ’ തുടങ്ങിയ മെസ്സേജുകളാണ് നടൻ റോഷ്‌നയ്ക്ക് അയച്ചത്.
പ്രചരിക്കുന്ന സന്ദേശങ്ങൾ എഐ നിർമിതമാണെന്നും അക്കൗണ്ട് കൈകാര്യം ചെയ്തവർ അയച്ചതാണെന്നുമാണ് അജ്മലിന്റെ വിശദീകരണ വിഡിയോക്കൊപ്പമാണ് നടൻ അയച്ച മെസ്സേജിന്റെ സ്ക്രീൻഷോട്ട് പങ്കുവച്ചത്.
‘‘എത്ര നല്ല വെള്ളപൂശൽ. ചുമ്മാ ഇൻബോക്സ് നോക്കിയപ്പോൾ ദേ കിടക്കുന്നു അണ്ണന്റെ എഐ മെസ്സേജ്,’’ എന്നാണ് സ്ക്രീന്‍ഷോട്ടിനൊപ്പം റോഷ്ന കുറിച്ചത്. ‘ഹൗ ആർ യു’, ‘നീ അവിടെ ഉണ്ടോ’ തുടങ്ങിയ മെസ്സേജുകളാണ് സ്ക്രീൻഷോട്ടിൽ കാണുന്നത്. നടൻ അവകാശപ്പെടുന്നതുപോലെ ഈ സന്ദേശങ്ങളും എഐയുടെ ഭാഗമാണോ എന്ന സംശയമാണ് റോഷ്ന ഉയർത്തുന്നത്.
നേരത്തെ, തന്റേതെന്ന പേരിൽ പ്രചരിച്ച വിഡിയോ കോൾ ദൃശ്യങ്ങളും ശബ്ദസന്ദേശങ്ങളും എഐ ഉപയോഗിച്ച് നിർമിച്ചതാണെന്ന് വിശദീകരിച്ചുകൊണ്ട് അജ്മൽ അമീർ ഒരു വീഡിയോ പുറത്തിറക്കിയിരുന്നു. എന്നാൽ, ഈ വിഡിയോയുടെ കമന്റ് ബോക്സിൽ നിരവധി യുവതികളാണ് നടനെതിരെ കൂടുതൽ വെളിപ്പെടുത്തലുകളുമായി രംഗത്തെത്തിയത്.
അജ്മൽ അമീറിൽ നിന്ന് ദുരനുഭവം നേരിട്ടതായും, വിഡിയോ കോളുകൾ ചെയ്തതായും മോശം സന്ദേശങ്ങൾ അയച്ചതായും കമന്റുകളിൽ പറയുന്നു. സിനിമയിൽ തനിക്കൊപ്പം അഭിനയിച്ച സഹതാരങ്ങളോടും അജ്മൽ മോശമായി പെരുമാറിയതായി ആരോപണമുണ്ട്.
തനിക്കെതിരായ ആരോപണങ്ങൾ നിഷേധിച്ച അജ്മൽ, പുറത്തുവന്ന സന്ദേശങ്ങളും ശബ്ദങ്ങളും വ്യാജമായി സൃഷ്ടിച്ചതാണെന്ന് പറഞ്ഞിരുന്നു. മെസ്സേജുകൾ തന്റെ അക്കൗണ്ട് കൈകാര്യം ചെയ്തിരുന്നവരാണ് അയച്ചതെന്നും, ഇനിയങ്ങോട്ട് തന്റെ സോഷ്യൽ മീഡിയ അക്കൗണ്ടുകൾ താൻ മാത്രമേ ഉപയോഗിക്കുകയുള്ളൂ എന്നും അജ്മൽ അറിയിച്ചു. ഇതുമായി ബന്ധപ്പെട്ട് അജ്മൽ ഇൻസ്റ്റഗ്രാമിൽ സ്റ്റോറിയും പങ്കുവെച്ചിട്ടുണ്ട്. എന്നാൽ ഇത് വിശ്വസിക്കില്ലെന്നും ഭാര്യയോടൊപ്പം ഇക്കാര്യം വന്നു പറയാൻ ധൈര്യമുണ്ടോ എന്നും ചോദിച്ച് ചിലർ രംഗത്തെത്തിയിരുന്നു. ഇതിനു പിന്നാലെയാണ് ഇപ്പോൾ നടി റോഷ്ന ആൻ റോയ് പുതിയ വെളിപ്പെടുത്തലുമായി എത്തിയത്.
