അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കോഴിക്കോട്: ന്യൂ സെൻട്രൽ മാർക്കറ്റ് പദ്ധതിയുടെ ശിലാസ്ഥാപനത്തോടെ കോഴിക്കോട് മറ്റൊരു നാഴികക്കല്ല് കുറിച്ചു. പദ്ധതി ഉദ്ഘാടനം കേന്ദ്രമന്ത്രി ജോർജ് കുര്യൻ ഓൺലൈനായി നിർവഹിച്ചു.
മത്സ്യത്തൊഴിലാളികളുടെ ക്ഷേമത്തോടൊപ്പം അടിസ്ഥാന സൗകര്യവികസനത്തെയും സർക്കാർ തുല്യമായി പരിഗണിക്കുന്നതായി ചടങ്ങിൽ സംസാരിച്ച മന്ത്രി സജി ചെറിയാൻ വ്യക്തമാക്കി.
സംസ്ഥാനത്തെ തന്നെ രണ്ടാമത്തെ ഏറ്റവും വലിയ മത്സ്യമാർക്കറ്റാണ് വലിയങ്ങാടിയിൽ യാഥാർത്ഥ്യമാകുന്നത്. ആധുനിക സൗകര്യങ്ങളോടെ വിപുലമായ വിപണിസ്ഥലം രൂപപ്പെടുത്തുക എന്നതാണ് പദ്ധതിയുടെ ലക്ഷ്യം.
₹55.17 കോടി ചെലവിട്ട് പ്രധാനമന്ത്രി മത്സ്യസമ്പത്ത് പദ്ധതി (PMMSY) യുടെ ഭാഗമായി മാർക്കറ്റ് നിർമിക്കുകയാണ്. 1,23,274 ചതുരശ്ര അടി വിസ്തീർണ്ണമുള്ള മൂന്ന് നിലകളിലായി കെട്ടിടം ഉയരും.
മത്സ്യവിൽപ്പനയ്ക്കൊപ്പം ഫുഡ് റെസ്റ്റോറന്റ്, തൊഴിലാളികൾക്കും വ്യാപാരികൾക്കും രാത്രി പാർക്കാൻ സൗകര്യമുള്ള ഡോർമിറ്ററി, മാലിന്യസംസ്‌കരണ സംവിധാനം തുടങ്ങിയവയും ഉൾപ്പെടുത്തിയാണ് പദ്ധതി രൂപകൽപ്പന ചെയ്തിരിക്കുന്നത്.
ചടങ്ങിൽ മന്ത്രി സജി ചെറിയാൻ അധ്യക്ഷനായി, പ്രാദേശിക ജനപ്രതിനിധികളും, മത്സ്യബന്ധന വകുപ്പ് ഉന്നത ഉദ്യോഗസ്ഥരും പങ്കെടുത്തു.
