അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കൊടുവള്ളി: ഉപജില്ലാ കലോത്സവ വേദികളിൽ ചോദ്യക്കടലാസ് ചോർച്ചക്കേസിലെ ഒന്നാം പ്രതിയുടെ പേരിലുള്ള ആശംസാ ബോർഡുകൾ സ്ഥാപിച്ചതിനെ തുടർന്ന് വിവാദം. സംഭവത്തെത്തുടർന്ന് കൊടുവള്ളി നഗരസഭാ അധികൃതർ ബോർഡുകൾ നീക്കം ചെയ്തു.
എം.എസ്. സൊലൂഷൻസ് സിഇഒ മുഹമ്മദ് ഷുഹൈബിന്റെ ചിത്രം ഉൾപ്പെടുത്തിയ ആശംസാ ബോർഡുകളായിരുന്നു വിദ്യാർത്ഥി പ്രതിഭകളെ സ്വാഗതം ചെയ്ത് കൊടുവള്ളി ഗവ. ഹയർ സെക്കൻഡറി സ്കൂൾ റോഡിന്റെ ഇരുവശങ്ങളിലും സ്ഥാപിച്ചിരുന്നത്. ബോർഡുകളിൽ സ്ഥാപനത്തിന്റെ പരസ്യവിവരങ്ങളും ഉൾപ്പെടുത്തിയിരുന്നു.
വിവാദം ഉയർന്നതിനെ തുടർന്ന് കൊടുവള്ളി എഇഒ സി.പി. അബ്ദുൽ ഖാദർ നൽകിയ നിർദേശപ്രകാരം നഗരസഭാ ഉദ്യോഗസ്ഥർ ഇരുപത്തിയഞ്ചോളം വലിയ ബോർഡുകൾ ഇന്നലെ നീക്കം ചെയ്തു.
നഗരസഭയുടെ അനുമതിയില്ലാതെ മാർക്കറ്റ് റോഡിൽ നിന്ന് ഹൈസ്‌കൂൾ കവാടം വരെയുള്ള ഭാഗത്ത് ബോർഡുകൾ സ്ഥാപിച്ചതായും, നവീകരിച്ച നടപ്പാതയിലും ഹാൻഡ് റെയിലുകളിലും ബോർഡുകൾ വെച്ചതായും നഗരസഭാ അധ്യക്ഷൻ അബ്ദു വെള്ളറ അറിയിച്ചു.
കലോത്സവ കമ്മിറ്റിയുടെ അനുമതിയും വാങ്ങാതെയാണ് ബോർഡുകൾ സ്ഥാപിച്ചതെന്ന് എഇഒ ഖാദറും കലോത്സവ മീഡിയ ആൻഡ് പബ്ലിസിറ്റി കമ്മിറ്റി കൺവീനർ മുജീബ് ചളിക്കോട്യും വ്യക്തമാക്കി.
എം.എസ്. സൊലൂഷൻസ് പ്രതിനിധികൾ വേദിയുടെ പരിസരത്തും എൽഇഡി സ്ക്രീനുകളിലും പരസ്യം നടത്താൻ വൻതുക വാഗ്ദാനം ചെയ്ത് പബ്ലിസിറ്റി കമ്മിറ്റിയെ സമീപിച്ചിരുന്നുവെങ്കിലും, അവരുടെ വാഗ്ദാനം നിരസിച്ചിരുന്നുവെന്ന് എഇഒ പറഞ്ഞു.
പത്താം ക്ലാസ് ഇംഗ്ലീഷ്, പ്ലസ് വൺ കണക്ക് തുടങ്ങിയ വിഷയങ്ങളുടെ ക്രിസ്മസ് പരീക്ഷാ ചോദ്യങ്ങൾ ചോർന്നതുമായി ബന്ധപ്പെട്ട കേസിലെ ഒന്നാം പ്രതിയാണ് എം.എസ്. സൊലൂഷൻസ് സിഇഒ മുഹമ്മദ് ഷുഹൈബ്. ക്രൈംബ്രാഞ്ച് അന്വേഷണം നടത്തുന്ന കേസിൽ ഇയാൾ മുന്‍പ് അറസ്റ്റിലായിരുന്നുവും ഇപ്പോൾ ജാമ്യത്തിലുമാണ്.
