അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തൻ്റെ പേരിൽ വ്യാജ ഫോൺ നമ്പർ ഉപയോഗിച്ച് ചിലർ തട്ടിപ്പ് നടത്തുന്നതായി വെളിപ്പെടുത്തി നടി ശ്രിയാ ശരൺ. തട്ടിപ്പുകാരൻ ഉപയോഗിക്കുന്ന ഫോൺ നമ്പർ സഹിതമുള്ള സ്ക്രീൻഷോട്ട് സോഷ്യൽ മീഡിയയിൽ പങ്കുവെച്ചുകൊണ്ടാണ് താരം രംഗത്തെത്തിയത്. താൻ അല്ല ഈ സന്ദേശങ്ങൾ അയക്കുന്നതെന്നും, ആളുകളെ തെറ്റിദ്ധരിപ്പിക്കുന്നത് നിർത്തണമെന്നും തട്ടിപ്പുകാരനോട് ശ്രിയാ ശരൺ രോഷത്തോടെ ആവശ്യപ്പെട്ടു.
‘ആരാണ് ഈ വിഡ്ഢി? ആളുകൾക്ക് സന്ദേശങ്ങൾ അയച്ച് സമയം കളയുന്നത് ദയവായി നിർത്തൂ. ഇത് വിചിത്രമാണ്, ആളുകളുടെ സമയം വെറുതെ പാഴാക്കുന്നതിൽ എനിക്ക് വിഷമം തോന്നുന്നു. ഇത് ഞാനല്ല, ഇത് എൻ്റെ നമ്പറുമല്ല,’ എന്ന് ശ്രിയാ ശരൺ ഇൻസ്റ്റഗ്രാമിൽ കുറിച്ചു. 7676361162 എന്ന നമ്പറിൽ നിന്നാണ് ശ്രിയാ ശരണാണെന്ന് പരിചയപ്പെടുത്തി തട്ടിപ്പ് നടക്കുന്നത്.
തന്നെ ആരാധിക്കുന്നവരെയും ഒപ്പം ജോലി ചെയ്യണമെന്ന് ആഗ്രഹിക്കുന്നവരെയും ആണ് ഈ തട്ടിപ്പുകാരൻ സമീപിക്കുന്നത് എന്നതാണ് ഇതിലെ ഏക നല്ല കാര്യമെന്ന് ശ്രിയ പരിഹാസരൂപേണ പറഞ്ഞു. “വളരെ വിചിത്രമാണിത്. എന്തിനാണ് ഇങ്ങനെ ചെയ്ത് സമയം കളയുന്നത്? മറ്റൊരാളുടെ വേഷം കെട്ടി നടക്കാതെ പോയി നന്നായി ജീവിക്കൂ,” എന്നും താരം കൂട്ടിച്ചേർത്തു.
ഇൻസ്റ്റഗ്രാം സ്റ്റോറിയിലൂടെയും ശ്രിയ തൻ്റെ സുഹൃത്തുക്കൾക്കും ആരാധകർക്കും മുന്നറിയിപ്പ് നൽകിയിരുന്നു. “ഞാനാണെന്ന് പറഞ്ഞ് ആരോ വിലസുണ്ടെന്ന് എൻ്റെ സുഹൃത്തുക്കളിൽ നിന്ന് കോളുകൾ വരുന്നു. ദയവായി ഈ വ്യാജ നമ്പറിൽ നിന്നുള്ള എല്ലാത്തരം ആശയവിനിമയങ്ങളിൽ നിന്നും അകലം പാലിക്കുക. ഒരു കാരണവശാലും പണം നൽകരുത്,” എന്നായിരുന്നു സ്റ്റോറിയിലെ മുന്നറിയിപ്പ്. ശ്രിയയ്ക്ക് പിന്തുണയുമായി നിരവധി പേർ ഇൻസ്റ്റഗ്രാം പോസ്റ്റിന് താഴെ കമൻ്റ് ചെയ്യുകയും നിയമപരമായി മുന്നോട്ട് പോകാൻ ഉപദേശിക്കുകയും ചെയ്തിട്ടുണ്ട്.
