അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.യുഎസ് പ്രസിഡന്റ് ഡൊണാൾഡ് ട്രംപ് മുസ്ലിം ബ്രദർഹുഡിന്റെ ചില പ്രമുഖ ഘടകങ്ങളെ ഭീകര സംഘടനകളായി പ്രഖ്യാപിക്കുന്നത് പരിഗണിക്കാൻ ഉന്നത ഉദ്യോഗസ്ഥർക്ക് നിർദ്ദേശം നൽകി. സംഘടനയ്ക്കെതിരെ സാമ്പത്തിക, യാത്രാ ഉപരോധങ്ങൾ ഏർപ്പെടുത്താനാണ് ഈ നീക്കം ലക്ഷ്യമിടുന്നത്. ഈജിപ്ത്, ലബനൻ, ജോർദാൻ എന്നിവിടങ്ങളിലെ പ്രാദേശിക ശാഖകളെ വിദേശ ഭീകര സംഘടനകളായും ആഗോള ഭീകരരായും പട്ടികപ്പെടുത്തണമോ എന്ന് അന്വേഷിച്ച് റിപ്പോർട്ട് സമർപ്പിക്കാനാണ് ട്രംപ് ആവശ്യപ്പെട്ടത്.
സംഘടനയ്ക്ക് ഹമാസുമായുള്ള ബന്ധത്തെക്കുറിച്ചുള്ള ആരോപണങ്ങളും അതുപോലെ യുഎസ് പൗരന്മാർക്കും യുഎസ് താൽപ്പര്യങ്ങൾക്കും ഹാനികരമായേക്കാവുന്ന ശ്രമങ്ങളും ഈ ഉത്തരവിൽ കാരണങ്ങളായി ചൂണ്ടിക്കാട്ടുന്നുണ്ട്. ഈ നീക്കത്തിലൂടെ ബ്രദർഹുഡിന് പിന്തുണ നൽകുന്നത് നിയമവിരുദ്ധമാക്കാനും സാമ്പത്തിക ഉപരോധങ്ങൾ ഏർപ്പെടുത്താനും അംഗങ്ങൾക്ക് യുഎസിൽ പ്രവേശിക്കുന്നതിന് വിലക്കേർപ്പെടുത്താനും കഴിയും. നിലവിൽ, മുസ്ലിം ബ്രദർഹുഡിന് ജോർദാനിലും ഈജിപ്തിലും നിരോധനമുണ്ട്.
യുഎസ് സ്റ്റേറ്റ് സെക്രട്ടറി മാർക്കോ റൂബിയോ, ട്രഷറി സെക്രട്ടറി സ്‌കോട്ട് ബെസ്സന്റ് എന്നിവരാണ് അറ്റോർണി ജനറൽ പാം ബോണ്ടി, നാഷണൽ ഇന്റലിജൻസ് ഡയറക്ടർ തുൾസി ഗബ്ബാർഡ് എന്നിവരുമായി കൂടിയാലോചിച്ച് റിപ്പോർട്ട് സമർപ്പിക്കേണ്ടത്. എക്‌സിക്യൂട്ടീവ് ഉത്തരവ് പ്രകാരം ഇതിനായി 30 ദിവസത്തെ സമയമാണ് അനുവദിച്ചിട്ടുള്ളത്. ഉപരോധം ആവശ്യമാണെന്ന് കണ്ടെത്തിയാൽ, അത് നടപ്പാക്കാൻ യുഎസ് ഉദ്യോഗസ്ഥർക്ക് 45 ദിവസത്തെ അധിക സമയം നൽകും.
ഏകദേശം 100 വർഷം മുൻപ് ഈജിപ്തിലാണ് ബ്രദർഹുഡ് സ്ഥാപിക്കപ്പെട്ടത്. ലോകമെമ്പാടും ഇതിന് പ്രാദേശിക ശാഖകളുണ്ട്. ഓരോ ഘടകത്തിനും പ്രത്യയശാസ്ത്രത്തിൽ വ്യത്യാസങ്ങളുണ്ടെങ്കിലും ഇസ്ലാമിക നിയമം അനുസരിച്ച് ഭരിക്കുന്ന ഒരു രാഷ്ട്രം സ്ഥാപിക്കുക എന്നതാണ് അതിന്റെ പ്രധാന ലക്ഷ്യങ്ങളിലൊന്ന്. കഴിഞ്ഞയാഴ്ച, ടെക്‌സസ് ഗവർണർ മുസ്ലിം ബ്രദർഹുഡിനെ വിദേശ ഭീകര സംഘടനയായും അതിർത്തി കടന്നുള്ള ക്രിമിനൽ സംഘടനയായും പ്രഖ്യാപിച്ചിരുന്നു.
