അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കൊയിലാണ്ടി: പട്ടണത്തിലുള്ള വ്യാപാര മേഖലയിൽ വീണ്ടും മോഷണം. പുതിയ ബസ് സ്റ്റാൻഡിന് സമീപമുള്ള ലിങ്ക് റോഡിലെ മാമീസ് ആർക്കേഡ് ഷോപ്പിംഗ് സെന്ററിലുള്ള നാല് കടകളിലാണ് കള്ളൻ കയറിയത്. റിവ ഡിസൈനർ, അഞ്ജന ടെക്സ്റ്റെയിൽസ്, നന്ദന ടെക്സ്, ഐ മാർക്ക് എന്നീ സ്ഥാപനങ്ങളാണ് മോഷണത്തിനിരയായത്.
കഴിഞ്ഞ ഒരു മാസത്തിനിടെ ഇതേ കോംപ്ലക്സിൽ പല തവണ മോഷണം നടന്നിരുന്നു. ഇതോടെ വ്യാപാരികൾ അടിയന്തര സുരക്ഷാ നടപടികൾ ആവശ്യപ്പെടുന്നുണ്ട്. ഇതുവരെയും നാലാം തവണയാണ് ഇതേ ഷോപ്പിംഗ് സെന്ററിൽ മോഷണം നടക്കുന്നത് എന്നതും ഭീതിക്കും ആശങ്കക്കും ഇടയാക്കിയിരിക്കുകയാണ്.
സംഭവത്തിൽ കൊയിലാണ്ടി പൊലീസ് സ്ഥലത്തെത്തി പരിശോധന നടത്തി. സമീപത്തെ സ്ഥാപനത്തിലെ സിസിടിവി ദൃശ്യങ്ങൾ പരിശോധിക്കുന്നതിലൂടെ പ്രതിയെ തിരിച്ചറിയാനുള്ള ശ്രമം തുടരുകയാണ്. കള്ളൻ കടകളിൽ കയറിയെങ്കിലും കാര്യമായ പണവും വിലപ്പെട്ട വസ്തുക്കളും ലഭിച്ചിട്ടില്ലെന്ന് പ്രാഥമിക വിവരം.
വ്യാപാരികൾ കൂടുതൽ സുരക്ഷാ സംവിധാനങ്ങൾ ഏർപ്പെടുത്തണമെന്നും പൊലീസിന്റെ പട്രോളിംഗ് വർധിപ്പിക്കണമെന്നും ആവശ്യപ്പെട്ടു. തുടർച്ചയായ മോഷണങ്ങളാൽ വ്യാപാരികൾക്ക് ഗൗരവമായ ആശങ്ക നിലനിൽക്കുകയാണ്. സംഭവത്തിൽ അന്വേഷണം ആരംഭിച്ചതായി പോലീസ് അറിയിച്ചു.
