അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തെലുങ്ക് സിനിമാലോകത്തെ ശ്രദ്ധേയ ദമ്പതികളായ നടൻ നാഗാർജുനയും നടി അമല അക്കിനേനിയും തങ്ങളുടെ മരുമക്കളായ ശോഭിത ധുലിപാലയെയും സൈനബ് റാവദ്ജിയെയും കുറിച്ചുള്ള സന്തോഷം പങ്കുവെക്കുന്നു. മരുമക്കൾ കുടുംബത്തിലേക്ക് കൊണ്ടുവന്ന സ്നേഹത്തെക്കുറിച്ചും, വ്യത്യസ്തമായ വിശ്വാസങ്ങൾക്കിടയിലും വീട്ടിലുള്ള പരസ്പര ബഹുമാനത്തെക്കുറിച്ചും അടുത്തിടെ ഒരു അഭിമുഖത്തിലാണ് അമല അക്കിനേനി മനസ്സ് തുറന്നത്.
നാഗാർജുനയുടെ മൂത്ത മകൻ നാഗചൈതന്യ 2024-ൽ നടിയും മോഡലുമായ ശോഭിത ധുലിപാലയെ വിവാഹം കഴിച്ചു. തൊട്ടുപിന്നാലെ, ഇളയ മകൻ അഖിൽ അക്കിനേനി തന്റെ ദീർഘകാല സുഹൃത്തും ലൈഫ് സ്റ്റൈൽ വ്ലോഗറുമായ സൈനബ് റാവദ്ജിയെയും വിവാഹം ചെയ്തു. പ്രമുഖ വ്യവസായി സുൽഫി റാവദ്ജിയുടെ മകളാണ് സൈനബ്. ഒരു അമ്മായിയമ്മയാകുന്നത് വളരെ അത്ഭുതകരമാണെന്നും, തനിക്ക് രണ്ട് സുന്ദരികളായ മരുമക്കളെ ലഭിച്ചതിൽ ഭാഗ്യമുണ്ടെന്നും അമല എൻ.ടി.വിയോട് പറഞ്ഞു.
ശോഭിതയെയും സൈനബിനെയും കുറിച്ചുള്ള വാത്സല്യം അമലയുടെ വാക്കുകളിൽ നിറഞ്ഞു നിന്നു. “ശോഭിത വളരെ കഴിവുള്ള, സ്വതന്ത്രയായ, സുന്ദരിയായ യുവതിയാണ്. ഞങ്ങൾക്ക് അവളോട് വലിയ ആരാധനയുണ്ട്, അവൾ വളരെ സ്നേഹമുള്ള വ്യക്തിയാണ്. ശോഭിതയോടൊപ്പം സമയം ചെലവഴിക്കുന്നത് ഞാൻ ശരിക്കും ആസ്വദിക്കുന്നു,” അമല പറഞ്ഞു. അഖിലിന്റെ ഭാര്യയായ സൈനബ് വളരെ നല്ല വ്യക്തിയാണെന്നും സ്വന്തം മേഖലയിൽ നേട്ടങ്ങൾ കൈവരിക്കുന്ന വ്യക്തിയാണെന്നും അമല കൂട്ടിച്ചേർത്തു. ഈ രണ്ട് പെൺമക്കൾ വന്നശേഷം വീട്ടിൽ വളരെയധികം സ്നേഹവും സന്തോഷവുമാണ് ഉള്ളതെന്നും ഇത് ഹൃദയസ്പർശിയാണെന്നും അവർ വ്യക്തമാക്കി.
സൈനബിന്റെ വരവോടെ കുടുംബത്തിൽ പുതിയൊരു അവബോധം രൂപപ്പെട്ടതിനെക്കുറിച്ചും അമല സംസാരിച്ചു. ഇസ്ലാം മതത്തെക്കുറിച്ച് കൂടുതൽ മനസ്സിലാക്കാൻ സൈനബ് സഹായിച്ചുവെന്നും, ഒരു ഹിന്ദു വീട്ടിൽ സുഖകരമായി ജീവിക്കാൻ വേണ്ട കാര്യങ്ങൾ എന്തൊക്കെയാണെന്ന് അവൾക്ക് അറിയാമെന്നും അമല പറഞ്ഞു. വീട്ടിലെ അംഗങ്ങൾ വ്യത്യസ്ത വിശ്വാസങ്ങൾ പിന്തുടരുന്നുണ്ടെങ്കിലും, ഓരോരുത്തരുടെയും വിശ്വാസങ്ങളെ പരസ്പരം ആഴത്തിൽ ബഹുമാനിക്കുന്നുണ്ടെന്നും അവർ കൂട്ടിച്ചേർത്തു.
അമലയുടെ കുടുംബ പശ്ചാത്തലവും ഈ വിശ്വാസ വൈവിധ്യത്തിന് അടിവരയിടുന്നു. തന്റെ അമ്മ കത്തോലിക്ക മതത്തിൽ ജനിച്ച് പിന്നീട് സൂഫിസം സ്വീകരിച്ചെന്നും, അച്ഛൻ ഹിന്ദുവായിരുന്നെന്നും അമല വെളിപ്പെടുത്തി. നാഗാർജുനയുടെ പിതാവ് നാഗേശ്വര റാവുവിന് മതമുണ്ടായിരുന്നില്ലെന്നും, ‘ജോലിയോടാണ് ആരാധന’ എന്ന് അദ്ദേഹം പറയാറുണ്ടായിരുന്നുവെന്നും അമല ഓർമ്മിച്ചു. അമലയുടെ ആത്മീയ പാത രൂപപ്പെടുത്തിയത് ബുദ്ധമത വഴികളാണ്. ഇപ്പോൾ ഇസ്ലാം മതം കൂടി വീട്ടിലേക്ക് പ്രവേശിച്ചതോടെ, അക്കിനേനി കുടുംബം മനോഹരമായ ഒരു വിശ്വാസങ്ങളുടെ മിശ്രിതമായി മാറിയെന്നും അമല അഭിപ്രായപ്പെട്ടു.
