അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മൂന്നാർ: നല്ലതണ്ണി കല്ലാർ പ്രദേശത്ത് പഞ്ചായത്തിന്റെ നിയന്ത്രണത്തിലുള്ള മാലിന്യസംസ്കരണ കേന്ദ്രം വീണ്ടും കാട്ടാനാക്രമണത്തിന് ഇരയായി. ‘ഒറ്റക്കൊമ്പൻ’ എന്നറിയപ്പെടുന്ന കാട്ടാന ബുധനാഴ്ച വൈകുന്നേരം പ്ലാന്റിന്റെ ചുറ്റുമതിൽ തകർത്തു.
മൂന്നാർ ടൗണിൽ നിന്നു ശേഖരിക്കുന്ന പഴം, പച്ചക്കറി തുടങ്ങി മാലിന്യങ്ങൾ ഈ പ്ലാന്റിനടുത്ത് നിക്ഷേപിക്കുന്നത് പതിവായതോടെ, വന്യമൃഗങ്ങൾ ഇവിടെ പഴകിക്കഴിഞ്ഞ ഭക്ഷ്യവും അവശിഷ്ടങ്ങളും തേടി എത്തുന്നത് പതിവായി. ഇതോടെ ആക്രമണം തടയുന്നതിനായി പഞ്ചായത്ത് അടുത്തിടെ ചുറ്റുമതിലിനോട് ചേർന്ന് വൈദ്യുതവേലി സ്ഥാപിച്ചിരുന്നു.
എന്നാൽ വേലി കാരണം ഉൾവശത്തേക്കു പ്രവേശിക്കാൻ കഴിയാതായതോടെ രോഷഭരിതനായ ഒറ്റക്കൊമ്പൻ, ചുറ്റുമതിൽ തന്നെയാണ് തകർത്ത് മാറ്റിയത് എന്നാണു നാട്ടുകാർ പറയുന്നത്. മാലിന്യത്തിന്റെ മണവും എളുപ്പത്തിൽ ലഭിക്കുന്ന ഭക്ഷണവുമായാണ് കാട്ടാനകളെ ഈ മേഖല ആകർഷിക്കുന്നത്.
ഇതോടെ മാലിന്യസംസ്കരണ കേന്ദ്രത്തിന്റെ സുരക്ഷാ സംവിധാനത്തെക്കുറിച്ച് വീണ്ടും ചർച്ചകൾ ഉയർന്നിരിക്കുകയാണ്. അധികം താമസിയാതെ ശക്തമായ പ്രതിരോധനടപടികൾ സ്വീകരിക്കണമെന്ന ആവശ്യം പ്രാദേശികർ മുന്നോട്ടു വക്കുന്നു.
