അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഇരിട്ടി: മരക്കച്ചവടക്കാരെ ലക്ഷ്യമാക്കി പ്രവർത്തിച്ച അന്തർസംസ്ഥാന തട്ടിപ്പ് സംഘത്തിന്റെ പ്രധാനിയെ പൊലീസ് പിടികൂടി. കാങ്കോൽ തളിയിൽ വീട്ടിൽ താമസിക്കുന്ന ടി.വി. ഗണേശൻ (47) ആണ് അറസ്റ്റിലായത്. ഇരിട്ടി ഡിവൈ.എസ്.പി പി.കെ. ധനഞ്ജയബാബുവിന്റെ നിർദേശപ്രകാരം ഇൻസ്പെക്ടർ മെൽബിൻ ജോസും എസ്.ഐ കെ. ഷർഫുദ്ദീനും ചേർന്ന് വെള്ളിയാഴ്ച രാവിലെ കണ്ണൂരിൽ നിന്നുള്ള ട്രെയിൻ യാത്രയ്ക്കിടെയാണ് ഇയാളെ കസ്റ്റഡിയിൽ എടുത്തത്.
തട്ടിപ്പ് നടത്താനുള്ള ഗണേശനും സംഘവും ഉപയോഗിച്ച രീതി വളരെ കൃത്യതയോടെയായിരുന്നു. പ്ലൈവുഡ് ഫാക്ടറികൾക്കോ മറ്റോ മരം വിൽക്കുന്ന വ്യാപാരികളെയാണ് ആദ്യം കണ്ടെത്തുക. മരവുമായി ഫാക്ടറികളിലേക്കു പോകുന്ന ലോറിയുടെ ഡ്രൈവർമാരുടെ ഫോൺ നമ്പറുകൾ ശേഖരിച്ച് ബന്ധപ്പെടും. “കൂടുതൽ തുക നൽകാം, ഉടമയെ അറിയിക്കാതെ പണം കൈപ്പറ്റാം” എന്ന വാഗ്ദാനത്തോടെ ഡ്രൈവർമാരെ വശീകരിക്കും. തങ്ങൾ നിർദേശിക്കുന്നിടത്ത് ലോഡ് ഇറക്കണമെന്നും ആവശ്യപ്പെടും.
ഇതിനിടെ പ്ലൈവുഡ് കമ്പനികളുമായി ‘ഓർഡർ ഉറപ്പിച്ചു’ എന്ന പേരിൽ തട്ടിപ്പു സംഘം ഇടപാട് നടത്തുകയും പണം അക്കൗണ്ടിലേക്കു കൈമാറുകയും ചെയ്യും. ലോഡ് കൊടുത്തതിന് ശേഷം പണം ലഭിച്ചവരായ തട്ടിപ്പുകാർ അപ്രത്യക്ഷമാകുന്നതോടെ യഥാർത്ഥ മരംവിൽപനക്കാർ ഇടപാട് നിഷേധിക്കുകയും ഫാക്ടറി ഉടമകൾക്ക് വൻ സാമ്പത്തിക നഷ്ടമുണ്ടാകുകയും ചെയ്യുന്ന അവസ്ഥയാണ് ആവർത്തിക്കപ്പെട്ടിരുന്നത്.
കേരളത്തിലെ പല ജില്ലകളിലും തമിഴ്നാട്, കർണാടക തുടങ്ങിയ സംസ്ഥാനങ്ങളിലുമെല്ലാം ഗണേശന്റെ നേതൃത്വത്തിലുള്ള സംഘം ഇത്തരം തട്ടിപ്പുകൾ നടത്തിയിട്ടുണ്ടെന്നാണു അന്വേഷണത്തില് വ്യക്തമായത്. ഇരിട്ടി കോളിക്കടവ് സ്വദേശി അനിൽകുമാറിന്റെ പരാതിയെ തുടർന്നാണ് കേസ് രജിസ്റ്റർ ചെയ്യുകയും അന്വേഷണത്തിൽ തട്ടിപ്പിന്റെ മുഴുവൻ ചുരുളും അഴിയുകയും ചെയ്തത്.
പ്രതിയെ പിടികൂടിയ സംഘത്തിൽ എ.എസ്.ഐമാരായ പ്രവീൺ, ജോഷി സെബാസ്റ്റ്യൻ, കൂടാതെ ഇരിട്ടി ഡിവൈ.എസ്.പിയുടെ സ്പെഷ്യൽ സ്ക്വാഡ് അംഗങ്ങളായ എം.എം. ഷിജോയ്, കെ.ജെ. ജയദേവൻ, രതീഷ് കല്യാടൻ എന്നിവരും പങ്കെടുത്തു. പ്രതിയോട് കൂടുതൽ അന്വേഷണം തുടരുകയാണ്.
