കഷണ്ടിക്ക് മരുന്നുണ്ട്! നിർണായക കണ്ടെത്തൽ

പുരുഷന്മാരുടെ ആത്മവിശ്വാസം നഷ്ടപ്പെടുത്തുന്ന ഒന്നാണ് കഷണ്ടി. പണ്ട് കാലത്ത് ഒരു പ്രായം കഴിഞ്ഞാലാണ് കഷണ്ടി ഉണ്ടായിക്കൊണ്ടിരുന്നത്. എന്നാൽ ഇന്ന് അങ്ങനെയല്ല. ചെറു പ്രായത്തിൽ തന്നെ പലരും മുടി നഷ്ടപ്പെട്ട് കഷണ്ടിയാകുകയാണ്.

ഒരു പഴമൊഴിയാണ് ‘കഷണ്ടിക്ക് മരുന്നില്ല’ എന്നത്. എന്നാൽ ഇനി ആ പഴമൊഴി പഴഞ്ചനായേക്കാം. പുരുഷന്മാരിൽ ഏറ്റവും സാധാരണമായി കാണപ്പെടുന്ന ആൻഡ്രോജനിക് അലോപ്പീസിയ, അതായത് പുരുഷ കഷണ്ടി ചികിത്സിക്കാൻ ഫലപ്രദമായ ഒരു മരുന്ന് കണ്ടെത്തിയതായി പുതിയ റിപ്പോർട്ടുകൾ സൂചിപ്പിക്കുന്നു.

മുടി ക്രമേണ കുറയുകയും കട്ടി നഷ്ടപ്പെടുകയും ഒടുവിൽ കഷണ്ടിയാകുകയും ചെയ്യുന്നത് പുരുഷ കഷണ്ടിയുടെ പ്രധാന ലക്ഷണങ്ങളാണ്. ഇതിന് വർഷങ്ങളായി വിപണിയിൽ നൂറുകണക്കിന് മരുന്നുകളും എണ്ണകളും ചികിത്സകളും വന്നെങ്കിലും ഭൂരിഭാഗവും ഫലപ്രദമല്ലായിരുന്നു.

അതേസമയം, അയർലണ്ടിലെ കോസ്മോ ഫർമസിസ്റ്റിക്കൽസ് എന്ന കമ്പനിയാണ് പുതിയൊരു പ്രതീക്ഷ ഉയർത്തുന്നത്. ഇവർ വികസിപ്പിക്കുന്ന Clascoterone എന്ന മരുന്നിന്റെ ഫേസ് 3 ക്ലിനിക്കൽ ട്രയൽ ഫലങ്ങൾ പുറത്തുവന്നതോടെയാണ് ഇതുസംബന്ധിച്ച വാർത്തകൾ വ്യാപകമായത്

1500 പുരുഷന്മാരെ ഉൾപ്പെടുത്തി നടത്തിയ പഠനത്തിൽ Clascoterone ശ്രദ്ധേയമായ ഫലങ്ങൾ കാഴ്ചവെച്ചതായി കമ്പനി അവകാശപ്പെടുന്നു. ആദ്യ പരീക്ഷണത്തിൽ 539% വരെ മെച്ചവും മറ്റൊരു പരീക്ഷണത്തിൽ 168% ഫലവും രേഖപ്പെടുത്തിയതായി റിപ്പോർട്ടിൽ പറയുന്നു. 5%മരുന്ന് രോഗികള്‍ക്ക് മികച്ച ചികിത്സയിലേക്കുള്ള വാതില്‍ തുറക്കുന്നതായി കമ്പനി വ്യക്തമാക്കുന്നു.

മരുന്നിന് 2026ഓടെ ഔദ്യോഗിക അംഗീകാരം ലഭിക്കുമെന്നാണ് പ്രതീക്ഷ. അങ്ങനെ സംഭവിച്ചാൽ, ആൻഡ്രോജനിക് അലോപ്പീസിയയെ ലക്ഷ്യമിട്ടുള്ള ലോകത്തിലെ ആദ്യ ഫലപ്രദ മരുന്ന് Clascoterone ആയിരിക്കും. 2020ൽ തന്നെ ഈ മരുന്നിന് മുഖക്കുരു ചികിത്സയ്ക്കായി അനുമതി ലഭിച്ചിരുന്നു എന്നത് ശ്രദ്ധേയമാണ്.

മുടികൊഴിച്ചിലിന് ഒരു ശാസ്ത്രീയ പരിഹാരത്തിനായി കാത്തിരുന്ന കോടിക്കണക്കിന് പുരുഷന്മാർക്ക് ഈ കണ്ടെത്തൽ വലിയ പ്രതീക്ഷയാണ് നൽകുന്നത്.