അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഇന്ദ്രജിത്ത് സുകുമാരൻ പ്രധാന വേഷത്തിലെത്തുന്ന ക്രൈം ഇൻവെസ്റ്റിഗേഷൻ ത്രില്ലർ ചിത്രമാണ് ‘ധീരം’. ജിതിൻ ടി. സുരേഷ് ആണ് ചിത്രത്തിന്റെ സംവിധാനം. ദീപു എസ്. നായർ, സന്ദീപ് സദാനന്ദൻ എന്നിവർ ചേർന്നാണ് തിരക്കഥ രചിച്ചിരിക്കുന്നത്. ഇപ്പോഴിതാ റിലീസിനോടനുബന്ധിച്ച് തിയറ്റർ വിസിറ്റിനെത്തിയ നടി ദിവ്യ പിള്ളയോട് സിനിമകണ്ടിറങ്ങിയ പ്രേക്ഷകൻ പറയുന്നതാണ് സോഷ്യൽ മീഡിയയിൽ ശ്രദ്ധ നേടുന്നത്. പ്രേക്ഷകന്റെ അപ്രതീക്ഷിത പ്രതികരണത്തിന് നടി കൊടുക്കുന്ന മറുപടിയും ശ്രദ്ധേയമാകുന്നു.
‘‘വളരെ മോശം സിനിമ. ഞങ്ങളുടെ പെങ്ങന്മാരും കുഞ്ഞുങ്ങളും ഒക്കെ കാണുന്ന സിനിമയാണ്. ഇത് ഇങ്ങനെ കാണിച്ചത് തെറ്റായിപ്പോയി. സമൂഹത്തിൽ ഇങ്ങനെ കാണിക്കരുത്. എനിക്ക് ഈ സിനിമ ഇഷ്ടപ്പെട്ടില്ല, ഇത് എന്റെ അഭിപ്രായമാണ്, എ സർട്ടിഫിക്കറ്റ് നിങ്ങൾ ആസ്വദിച്ചിട്ടുണ്ടാകും. ഇത്രയും പ്രതീക്ഷിച്ചില്ല, വളരെ മോശം.’’ ഇങ്ങനെയാണ് പ്രേക്ഷകൻ തുറന്നുപറഞ്ഞത്. ഇതോടെ അണിയറപ്രവർത്തകരിൽ ചിലർ പ്രേക്ഷകന്റെ അഭിപ്രായത്തോട് വിയോജിപ്പ് പ്രകടിപ്പിച്ച് തർക്കത്തിലായി.
എന്നാൽ വിഷയത്തിൽ ഉടൻ തന്നെ ഇടപെട്ട നായിക ദിവ്യ പിള്ള, പ്രേക്ഷകന്റെ നിലപാടിനെ പിന്തുണച്ചു. സിനിമയെക്കുറിച്ച് നെഗറ്റീവ് പറയാൻ പ്രേക്ഷകന് പൂർണ അവകാശമുണ്ടെന്ന് ദിവ്യ പിള്ള വ്യക്തമാക്കി.
‘‘നെഗറ്റീവ് പറയുന്നതിന് കുഴപ്പമില്ല, സിനിമ കാണുന്ന പ്രേക്ഷകന് അത് പറയാൻ അവകാശമുണ്ട്, അത് കുഴപ്പമില്ല. എല്ലാവരും നല്ലത് പറയണം എന്ന് നമുക്ക് പറയാൻ പറ്റില്ലല്ലോ, കുറച്ചു നെഗറ്റീവ് കൂടി വരണ്ടേ, അത് ഓക്കേ ആണ്,’’ ദിവ്യ പിള്ള പ്രതികരിച്ചു.
ഇന്ദ്രജിത്ത് സുകുമാരൻ പോലീസ് വേഷത്തിൽ എത്തിയ ‘ധീരം’ ഒരു ക്രൈം ഇൻവെസ്റ്റിഗേഷൻ ത്രില്ലറാണ്. റെമോ എന്റർടെയ്ൻമെന്റ്സിന്റെ ബാനറിൽ റെമോഷ് എം.എസ്, മലബാർ ടാക്കീസിന്റെ ബാനറിൽ ഹാരിസ് അമ്പഴത്തിങ്കൽ എന്നിവർ ചേർന്ന് നിർമ്മിച്ച ചിത്രത്തിൽ ദിവ്യ പിള്ള, അജു വർഗീസ്, നിഷാന്ത് സാഗർ, രഞ്ജി പണിക്കർ, റെബ മോണിക്ക ജോൺ, സാഗർ സൂര്യ, അവന്തിക മോഹൻ, ആഷിക അശോകൻ, സജൽ സുദർശൻ തുടങ്ങിയവരും പ്രധാന വേഷങ്ങളിലുണ്ട്.
