അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അടുത്ത വർഷം നടക്കാനിരിക്കുന്ന നിർണ്ണായക നിയമസഭാ തിരഞ്ഞെടുപ്പിന് മുന്നോടിയായി, കേരളത്തിലെ രാഷ്ട്രീയ ചിത്രം മാറുന്നതിൻ്റെ സൂചനകൾ നൽകിക്കൊണ്ട് തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് ഫലം പുറത്തുവന്നു. തുടർച്ചയായി രണ്ട് തവണ ഇടതുപക്ഷ ജനാധിപത്യ മുന്നണിക്ക് (എൽഡിഎഫ്) ഭരണം നൽകിയതിലെ ജനവികാരം പ്രതിഫലിച്ചതാവാം ഈ ഫലങ്ങൾ എന്നാണ് യുണൈറ്റഡ് ഡെമോക്രാറ്റിക് ഫ്രണ്ട് (യുഡിഎഫ്) വിലയിരുത്തുന്നത്.
കഴിഞ്ഞ കാൽനൂറ്റാണ്ടിനിടെ യുഡിഎഫ് തദ്ദേശ സ്ഥാപനങ്ങളിൽ നേടുന്ന ഏറ്റവും വലിയ മുന്നേറ്റങ്ങളിൽ ഒന്നാണിത്.
തെരഞ്ഞെടുപ്പ് ഫലത്തെ കേവലം ഭരണവിരുദ്ധ വികാരം മാത്രമായി ലഘൂകരിക്കുന്നത് ശരിയല്ലെന്ന് നിരീക്ഷകർ പറയുന്നു. പ്രചാരണത്തിൻ്റെ അവസാന ഘട്ടത്തിൽ എൽഡിഎഫ് ശ്രദ്ധ കേന്ദ്രീകരിച്ചത് സർക്കാരിൻ്റെ വികസന നേട്ടങ്ങൾ ഉയർത്തിക്കാട്ടുന്നതിന് പകരം, വിവാദപരമായ വ്യക്തിപരമായ കേസുകളിലേക്കായിരുന്നു.
ഭരണപരമായ നേട്ടങ്ങൾ എണ്ണിപ്പറയാൻ പരിമിതികൾ ഉള്ളതുകൊണ്ടാണ് ഈ തന്ത്രം സ്വീകരിച്ചതെന്ന വിമർശനം ഉയർന്നിരുന്നു.
പ്രളയം, കോവിഡ് എന്നീ പ്രതിസന്ധി ഘട്ടങ്ങളിൽ സർക്കാർ വിതരണം ചെയ്ത ഭക്ഷ്യക്കിറ്റുകളും സാമൂഹ്യക്ഷേമ പെൻഷനുകളും ജനങ്ങൾക്കിടയിൽ സ്വാധീനം ചെലുത്തിയിരുന്നു. എന്നാൽ, കിറ്റുകളും സൗജന്യങ്ങളും നൽകി വോട്ടർമാരെ വിലക്കെടുക്കാൻ കഴിയുന്നവരല്ല മലയാളി വോട്ടർമാർ എന്നതിൻ്റെ സൂചനയാണ് ഈ ഫലം നൽകുന്നത്.
മറ്റു സംസ്ഥാനങ്ങളിൽ നിന്ന് വ്യത്യസ്തമായി, കേരളീയർ രാഷ്ട്രീയമായി ഉയർന്ന പ്രബുദ്ധതയുള്ളവരാണ്. ‘കിറ്റും പെൻഷനും വാങ്ങിയവർ വോട്ട് ചെയ്തില്ല’ എന്ന വിലയിരുത്തലിലാണ് ഇടതുപക്ഷം എത്തുന്നതെങ്കിൽ, അത് അവരുടെ വരുംകാല രാഷ്ട്രീയ നിലനിൽപ്പിനെ ബാധിക്കുമെന്നും രാഷ്ട്രീയ നിരീക്ഷകർ അഭിപ്രായപ്പെടുന്നു.
തദ്ദേശ സ്വയംഭരണ വാർഡുകൾ വിഭജിച്ച രീതിയും ഫലങ്ങളെ സ്വാധീനിച്ച ഒരു ഘടകമാണ്. കേരളത്തിലെ സകല പഞ്ചായത്ത് വാർഡുകളും തങ്ങൾക്ക് അനുകൂലമാകുന്ന രീതിയിൽ വെട്ടിമുറിച്ചു എന്ന് യുഡിഎഫ് ആരോപിക്കുന്നു.
ഇത്തരത്തിൽ എൽഡിഎഫിന് അനുകൂലമായ വാർഡ് വിഭജനത്തെ അതിജീവിച്ചാണ് യുഡിഎഫ് ഇത്തവണ പ്രതിരോധ വിജയം കണ്ടതെന്നാണ് രാഷ്ട്രീയ കേന്ദ്രങ്ങളുടെ പ്രസ്താവന. ഇത് വരാനിരിക്കുന്ന നിയമസഭാ തിരഞ്ഞെടുപ്പിൽ യുഡിഎഫിന് വലിയ ആത്മവിശ്വാസം നൽകുന്നു.
